Josué 18:16 - Q'eqchi Bible

¹⁶ Chirix chik a'an nakub'eek sa' xmaril li tzuul li wank chiru li xtaq'ahil Ben-Hinón, sa' releb'l iq' re li xTaq'ahil Refaín, nakub'eek sa' li xtaq'ahil Hinón, sa' rokeb'l iq' wankeb' wi' laj Jebús, ut nakub'eek wi' chik toj En-Rokel.

Li Santil hu

¹⁶ Li nuba̱l naticla chak cuan cuiꞌ li tzu̱l li cuan saꞌ xcaꞌyaba̱l li ru takꞌa Ben-hinom, li cuan saꞌ li norte riqꞌuin li ru takꞌa re Refaim. Naxic saꞌ li ru takꞌa re Hinom li cuan saꞌ li sur cuanqueb cuiꞌ laj jebuseo ut chirix aꞌan naxic cuan cuiꞌ li yuꞌam haꞌ Rogel.

Josué 18:16 ပူးပေါင်းရင်းမြစ်များ

2 Reyes 23:10

Kixmux ru li na'ajej na'uxk wi' mayejak sa' xtaq'ahil Ben-Hinón, re naq maajun chik tixq'axtesi chi k'ate'k li ralal xk'ajol sa' xk'ab'a' laj Molok.

Isaías 30:33

Xb'aan naq li na'ajej Tófet ak kawresinb'il chaq najter cho'q re Asiria jo'wi' cho'q re li x'awab'ej. Li na'ajej a'an q'axal nim ru ut jwal cham, k'ajo' li xsi'ul. Naq taamusiq'aq li Yos, tixloch xxamlel; chanchan roq nima' nujenaq chi asuupr naq taachalq li xjosq'il li Qaawa' sa' xb'een.

Jeremías 32:35

Xe'xyiib'atq ajwi' x'artal laj Bahal sa' xtaq'ahil Ben-Hinón, re xk'atb'al li ralal xk'ajoleb' cho'q xmayejeb' chiru laj Molok. Chi jo'kan xe'xk'e chi maakob'k eb' laj Judá, li maajun wa inyehom reheb' chi moko xnume'k b'ayaq sa' inch'ool naq jo'kan te'xb'aanu.

Jeremías 19:11

ut taaye reheb': «Li Nimajwal Yos xye chi jo'ka'in: Jo'ka'in tz'aqal tinb'aanu re li tenamit a'in ut eb' li xpoyanamil, jo' naq najormank junaq ch'och'kuk, li ink'a' chik naru xyiib'ankil. Ut chixjunileb' li poyanam te'muqmanq Tófet, xb'aan naq maak'a'aq chik na'ajej re muquk.

Jeremías 19:6

Jo'kan naq taawulaq xkutankil naq li na'ajej a'in ink'a' chik tixk'ab'a'in Tófet chi moko xTaq'ahil Ben-Hinón, tixk'ab'a'in b'an chik xTaq'ahil li kamsink -chan li Qaawa'-.

Jeremías 19:2

Chirix chik a'an tatxik sa' xtaq'ahil Ben-Hinón, sa' li Rokeb'aal laj Pak'onel, ut aran toxaaye li aatin tinye aawe.

2 Crónicas 33:6

Kixk'ateb' li ralal cho'q xmayej sa' xtaq'ahil Ben-Hinón ut kixtzol li q'ehink, li nawalink ut li tuulak. Kipatz'okatq rik'ineb' laj q'e ut rik'ineb' li musiq'ej; xikenaq wi' chik xb'een li maa'usilal kixb'aanu toj reetal kixpoq' xjosq'il li Qaawa'.

2 Crónicas 28:3

Kik'atok pom sa' xtaq'ahil Ben-Hinón, ut kixq'axtesi li ralal chi k'ate'k, jo' li tz'i'b'eetalil neke'xb'aanu eb' li tenamit li ke'sache'k ruheb' xb'aan li Qaawa' chiruheb' laj Israel.

1 Crónicas 14:9

Toja' naq ke'wulak eb' laj Filistea ut ke'xtzolob' rib' sa' xTaq'ahil Refaín.

1 Reyes 1:9

Sa' jun kutan laj Adonías kixk'uub' jun ninq'e chi xtoon li Saqoonak re Sojélet, chire li ha' Rokel. Aran kixyeechi'iheb' li karneer, li b'ooyx ut wakax li ninq xtib'eleb'. Kixb'oqeb' li ras eb' li riitz'in, ralaleb' li awab'ej, ut chixjunileb' li winq aj Judá aj k'anjeleb' chiru li awab'ej.

2 Samuel 17:17

Laj Jonatán ut laj Ajimás wankeb' chire li ha' Rokel, xb'aan naq ink'a' neke'raj te'ile'q chi ok sa' li tenamit. Jun moosej ixq koho chi xyeeb'al resil reheb', ut tikto eb' a'an koheb' rik'in laj David li awab'ej.

Jueces 19:10

Ab'an li winq ink'a' kiraj xnumsinkil li q'oqyink aran; kixaqliik, koho ut kiwulak sa' xka'yab'aal Jebús, naraj naxye Jerusalén, rochb'een li ixq, li xmoos ut xkab'ichaleb' li xb'uur chi wankeb' riiq.

Jueces 1:21

Ab'anan eb' laj Benjamín ink'a' ke'ruuk risinkileb' laj Jebús li wankeb' chaq Jerusalén. Jo'kan naq chalen toj anaqwan eb' laj Jebús wankeb' Jerusalén rochb'eeneb' li ralal xk'ajol laj Benjamín.

Jueces 1:8

Eb' laj Judá ke'yalok rik'ineb' laj Jerusalén, ke'xchap li tenamit, ke'xkamsi chi ch'iich' chixjunileb' li poyanam ut ke'xk'e xxamlel li tenamit.

Josué 18:28

Selá-Jalef, Jebús (naraj naxye: Jerusalén), Kibehá ut Kiryat: kaalaju chi tenamit rochb'eeneb' xk'aleb'aaleb'. A'an a'in li reechanihomeb' li ralal xk'ajol laj Benjamín, chi ch'uutal.

Josué 15:63

Ab'anan eb' li ralal xk'ajol laj Judá ink'a' ke'ruhank chi risinkileb' laj Jebús li wankeb' Jerusalén. Jo'kan naq eb' laj Jebús toj wankeb' ajwi' Jerusalén anaqwan, rochb'eeneb' li ralal xk'ajol laj Judá.

2 Samuel 5:18

Toja' naq ke'wulak eb' laj Filistea ut ke'xtzolob' rib' sa' li xTaq'ahil Refaín.