Josué 13:3 - Q'eqchi Bible

³ chalen chaq Sijor li wank chi xk'atq Ejiipt toj sa' xnub'ajl Ekrón, sa' xjayal releb'l iq'. Li ch'och' a'in nayeemank naq reheb' laj Kanahán, ut eb' li neke'taqlank sa' xb'eeneb' laj Filistea, a'aneb' li wankeb' aran Gasa, Asdod, Askalón, Gat ut Ekrón.

Li Santil hu

³ Li naꞌajej aꞌan naticla chak saꞌ li nimaꞌ Sihor saꞌ li este re li tenamit Egipto li nacuulac toj saꞌ li nuba̱l re li tenamit Ecrón li cuan saꞌ li norte li nequeꞌxye nak reheb laj cananeo. Saꞌ li naꞌajej aꞌan cuanqueb o̱b li rey. Ut aꞌaneb li nequeꞌtaklan saꞌ xbe̱neb laj filisteo li cuanqueb saꞌ eb li tenamit Gaza, Asdod, Ascalón, Gat ut Ecrón, joꞌ ajcuiꞌ eb laj aveo;

Josué 13:3 ပူးပေါင်းရင်းမြစ်များ

Jeremías 2:18

Ut anaqwan, k'aru teetaw chirix naq texxik Ejiipt re ruk'b'al li xha'il li nima' Nilo? K'aru aj e naq texxik Asiria chi uk'uk ha' sa' li nima' Éwfrates?

Jueces 3:3

Ke'kanaak li oob' chi xninqal ru winq aj Filistea, chixjunileb' laj Kanahán, eb' laj Sidón ut eb' laj Hit li wankeb' sa'eb' li tzuul re Líbano, chalen chaq sa' li tzuul Bahal-Hermón toj wan wi' li rokeb'aal Jamat.

Deuteronomio 2:23

A'an ajwi' ke'xk'ul eb' laj Abí, li ke'wank sa'eb' li na'ajej re Gasa; a'atqeb' laj Kaftor li chalenaqeb' chaq Kaftor, ke'xsacheb' ru ut ke'kanaak sa' li xna'ajeb'.)

1 Samuel 6:4

“K'aru tqataqla re xtojb'al rix li qamaak?”, chankeb' laj Filistea. Ke'chaq'ok eb' laj tij ut eb' laj q'e: “A' yaal jo'k'ihaleb' li xjolomileb' laj Filistea, teetaqla oob' chi saqijoj ut oob' chi ch'o yiib'anb'ileb' rik'in oor, xb'aan naq a' ajwi' li rahilal xek'ul laa'ex, xe'xk'ul li neke'taqlank sa' eeb'een.

Josué 13:13

Ab'anan eb' laj Israel ink'a' ke'risiheb' laj Jesur chi moko eb' laj Mahaká; jo'kan naq eb' laj Jesur ut laj Mahaká toj wankeb' anaqwan sa' xyanqeb' laj Israel.

Génesis 10:6

A'aneb' a'in li ralal xk'ajol laj Kam: laj Kus, laj Misrahim, laj Put ut laj Kanahán.

Jueces 16:5

Eb' li xjolomileb' laj Filistea koheb' wan wi' li ixq ut ke'xye re: “Q'unb'esi laj Sansón re naq tixye aawe b'ar nachalk li xnimal xmetz'ew ut chan raj ru tooruuq chi xq'axb'al ru, re xchapb'al ut xb'ak'b'al chi kaw. O'lajuk'aal rox o'q'ob' (1,100) chi tumin plaat taaqak'e aawe chiqajunjunqal”, chankeb'.

1 Samuel 5:1

Naq eb' laj Filistea ke'xchap li xLoq'laj Kaax li Yos aran Ebén-Eser, ke'xk'am toj Asdod.

1 Reyes 8:65

Sa' li kutan a'an laj Salomón kixninq'ehi li xNinq'eheb' li Muheb'aal. Chixjunileb' laj Israel ke'ochb'eenink re, k'ajo' tz'aqal xk'ihaleb' li poyanam chalen chaq sa' li tenamit Jamat toj chire li ch'ina ha' re Ejiipt. Ke'ninq'ehik chiru li Qaawa' li qaYos chiru wuqub' kutan ut, chirix a'an, chiru wuqub' kutan chik: kaalaju kutan ke'ninq'ehik sa' komonil.

Isaías 23:3

Xetaw eeb'ihomal aran Ejiipt, rik'in li triiw na'elk chaq chire li nima' Nilo, ut xek'ayihatq reheb' chixjunil li tenamit.

Génesis 15:18

Sa' li kutan a'an li Qaawa' kixk'ojob' jun Sumwank rik'in laj Abrán: “Xink'e li ch'och' a'in reheb' laawalal aak'ajol chalen chaq sa' li nima' re Ejiipt toj sa' li nimla nima', a' li Éwfrates.

1 Samuel 5:8

Jo'kan naq ke'xb'oqeb' chixjunil li xjolomileb' laj Filistea, ke'xch'utub'eb' ut ke'xye: “K'aru tento tqab'aanu rik'in li xLoq'laj Kaax li xYos laj Israel?”. Ke'xsume: “Li xLoq'laj Kaax li xYos laj Israel tento taak'ame'q aran Gat”, chankeb'. Ut ke'xk'am aran li xLoq'laj Kaax li xYos laj Israel.

1 Samuel 5:10

Toja' naq ke'xtaqla li xLoq'laj Kaax li Yos Ekrón. Ab'an naq kiwulak aran, eb' laj Ekrón ke'xjap re chi xyeeb'al: “Xe'xk'am chaq li xLoq'laj Kaax li xYos laj Israel yal re qasachb'al laa'o ut eb' li qatenamit!”, chankeb'.

1 Crónicas 13:5

Toja' naq laj David kixch'utub' chixjunileb' laj Israel, chalen chaq Sijor sa' xnub'ajlil Ejiipt toj wan wi' li okeb'aal re Jamat, re xk'amb'al chaq li xLoq'laj Kaax li Yos li wan chaq aran Kiryat-Yeharín.