Jeremías 8:2 - Q'eqchi Bible

² ut te'hire'q chiru li saq'e, chiru li po ut chiruheb' chixjunil li xchahimal li choxa li ke'xra ut ke'xk'anjela ru, li ke'xtaaqe, li ke'patz'ok wi' ut ke'xloq'oni ru. Ink'a' chik te'xoke'q chi moko te'muqmanq; jo'kaqeb' aj chik li k'ot chiru ch'och'.

Li Santil hu

² Nequeꞌtꞌanaxin teꞌcana̱k saꞌ chꞌochꞌ chiru li sakꞌe ut li po joꞌ ajcuiꞌ chiru li chahim li queꞌxra ut queꞌxlokꞌoniheb. Teꞌcanaba̱k lix bakeleb chiruheb li queꞌxsicꞌ cuiꞌ xnaꞌlebeb. Ut ma̱ ani ta̱xocok reheb, chi moco teꞌmukekꞌ. Chanchanakeb chic li cꞌot tzꞌektzꞌo saꞌ chꞌochꞌ.

Jeremías 8:2 ပူးပေါင်းရင်းမြစ်များ

2 Reyes 23:5

Chirix chik a'an kirisiheb' sa' xk'anjel eb' li ke'xaqab'aak xb'aaneb' li awab'ej re Judá chi k'atok pom sa'eb' li tijob'aal sa' xjolomeb' li tzuul, sa'eb' li tenamit sa' xteepal Judá, chi xsutam Jerusalén, jo' ajwi' eb' li ke'mayejak pom chiru laj Bahal, chiru li saq'e, li po ut chixjunileb' xsaqenkil li choxa.

Hechos 7:42

Toja' naq li Yos kixkanab'eb' ut kixq'axtesiheb' chi xloq'oninkil eb' li chahim wankeb' chiru choxa, jo' tz'iib'anb'il chaq sa' xhuheb' li Propeet: «Ex aj Israel, ma xexmayejak tab'i' chiwu laa'in ut xeyeechi'i we leek'atb'il mayej chiru ka'k'aal chihab' sa' li chaqich'och'?

Jeremías 9:22

Neke'jilixink eb' li kamenaq chanchaneb' li k'ot chiru ch'och'; neke't'anlok chiru ch'och' jo' li pim naq ak xyok'e'k, ut maajun chik naxokok reheb'”. A' li Qaawa' xyehok re.

Deuteronomio 4:19

Naq taawil li choxa, li saq'e, li po, eb' li chahim ut chixjunil li wank chiru choxa, maak'e aawib' chi b'alaq'iik chi moko taawiq'ib' aawib' chiruheb' chi xloq'oninkileb' ru, xb'aan naq li Qaawa' laaYos kixyiib' eb' a'an re naq te'k'anjelaq chiruheb' chixjunil li tenamit wankatqeb' junsut junrub'el choxa.

Sofonías 1:5

Tinsach ruheb' li neke'taqe'k sa' xb'een li kab'l chi xloq'oninkileb' ru li chahim, eb' li neke'xwiq'ib' rib' chiwu laa'in ut neke'xpatz' ajwi' xk'ab'a' laj Milkón li xyoseb';

Ezequiel 8:16

Moqon chik kinxk'am toj chiru li neb'aal wank chisa' li rochoch li Qaawa', ut kink'e reetal naq, sa' xyanq li artal rik'in li neb'aal, wankeb' oob' xka'k'aal chi winq, neke'rixkin li rochoch li Yos ut yookeb' chi ilok sa' xjayal releb'l saq'e, wiq'wookeb' chi xloq'oninkil ru li saq'e.

Jeremías 36:30

At Johakín, awab'ej re Judá, laa'in li Qaawa' ninye aawe naq maajun aawalal taak'ojlaaq chi awab'ejink sa' li xk'ojarib'aal laj David; ut naq tatkamq, jiljo taakanaaq laatz'ejwal chiru xtiqwal li kutan ut chiru xkehal li q'oqyink.

Jeremías 22:19

Taamuqmanq jo' junaq b'uur: chi jukunb'il te'risi sa' li tenamit ut toxe'xtz'eq chaq chirix xsuttz'akil Jerusalén”.

Jeremías 19:13

Chixjunileb' li ochoch re Jerusalén, li rochocheb' li awab'ej re Judá ut eb' li kab'l xe'mayejak wi' k'ajpom chiru chixjunileb' li chahim ut xe'mayejak b'iin chiruheb' li jalanil yos, te'kanaaq chi muxb'il ruheb', jo' tz'aqal Tófet»”.

Jeremías 16:4

te'kamq xb'aan li xiwajel yajel, ut maajun taayaab'aq chirixeb' chi moko te'muqe'q. Neke'jilixink chiru ch'och' te'kanaaq jo'kaqeb' li k'ot. Li raaxiik' ut li we'ej taakamsinq reheb'; te'lowe'q xb'aaneb' li so'sol ut eb' li josq' aj xul”.

Salmos 83:10

Chab'aanu taxaq reheb' jo' xab'aanu reheb' laj Madián, jo' xab'aanu re laj Sísara ut laj Jabín chire li nima' Kisón.

2 Reyes 21:3

Kixyiib' wi' chik eb' li tijob'aal sa' xjolomeb' li tzuul, li kixjuk'eb' laj Esekías li xyuwa'. Kixxaqab'eb' li x'artal laj Bahal ut kixyiib' ajwi' jun xjalam u lix Aserá, jo' li kixyiib' laj Ajab, awab'ej re Israel. Kixwiq'ib' rib' chiruheb' li xsaqenkil ru li choxa ut kixloq'oniheb',

Sofonías 1:17

Jo'ka'in xye li Qaawa': “Tinrahob'tesi xch'ooleb' li poyanam ut te'b'eeq sa' mutz'il, xb'aan naq xe'maakob'k chiwu. Taahoye'q li xkik'eleb' jo' li pojtz', ut li xtib'eleb' kama'aq aj chik li k'ot”.

Eclesiastés 6:3

Wi junaq najt roq li xyu'am ut o'k'aal ralal taawanq, ab'anan wi ink'a' naxyal xsahil li k'aru wank re chi moko namuqe'k sa' xyaalal, laa'in ninye naq q'axal chik us junaq k'uula'al li xyo'laak chi kamenaq chiru li winq a'an.

2 Reyes 21:5

Kixyiib'atq x'artaleb' li xsaqenkil li choxa chiru xkab'ichal xneb'aalil li rochoch li Qaawa'.

2 Reyes 17:16

Ke'xkanab' xpaab'ankil chixjunil li xchaq'rab' li Qaawa' li xYoseb' ut ke'xha'lesi li q'anch'iich' re xyiib'ankil li xyoseb', eb' li wiib' xjalam uheb' li wakax jo' ajwi' li xjalam u lix Aserá. Ke'xwiq'ib' rib' chi xloq'oninkil ru eb' li chahim chiru choxa ut ke'mayejak chiru laj Bahal.

Deuteronomio 17:3

tixloq'oni ruheb' li jalanil yos ut tixwiq'ib' rib' chiruheb', a' yaal ma chiru li saq'e, li po malaj chiruheb' li chahim, ut chi jo'kan tixq'et rib' chiru linchaq'rab'.

Salmos 53:5

Ma ink'a' te'xtaw xyaalal eb' laj b'aanuhom maa'usilal, chixjunileb' li neke'xlow lintenamit jo' nawa'e'k li wa, eb' li ink'a' neke'xpatz' xk'ab'a' li Qaawa'?

Jeremías 14:16

Ut eb' li tenamit a'an te'kanaaq chi t'ant'o sa'atqeb' li b'e re Jerusalén: te'kamq xb'aan li raaxiik' ut li we'ej, chi maajun taamuquq reheb', rochb'eeneb' li rixaqil ut eb' li ralal xk'ajoleb'. A' ajwi' li xmaa'usilaleb' tinq'aplusi sa' xb'eeneb'.

Jeremías 16:11

Toja' naq taaye reheb': «Xb'aan naq kine'xtz'eqtaana eb' leena' leeyuwa' -chan li Qaawa'- ut koheb' xch'ool chirixeb' li jalanil yos; ke'xloq'oni ruheb' ut ke'k'anjelak chiruheb'. Kine'xtz'eqtaana laa'in ut ink'a' ke'xpaab' linchaq'rab' ink'ehom reheb'.

Jeremías 31:40

Chixjunil li ru taq'a b'arwi' neke'muqmank eb' li kamenaq ut natz'eqe'k wi' li cha, ut chixjunil li na'ajej li wank chire li nima' Sedrón toj sa' li Rokeb'aaleb' li kawaay li wank sa' xjayal releb'l saq'e, a'an q'axtesinb'ilaq cho'q re li Qaawa': maajoq'e chik taasachmanq chi moko taajuk'manq”.

Ezequiel 6:5

Tinkuti eb' li kamenaq chiruheb' li jalanil yos ut tinpaji li xb'aqeleb' laj Israel chi xsutameb' li artal.

Ezequiel 29:5

Tatinkanab' sa' li chaqich'och', aawochb'een chixjunileb' li kar wankeb' sa' laanima'; t'ant'o tatkanaaq chiru ch'och' ut maajun taaxokoq aawe re aamuqb'al. Tatink'e chi xt'upiheb' li so'sol ut eb' li josq' aj xul.

Salmos 83:11

Xe'sache'k ru aran Endor ut xe'kanaak cho'q xq'emal ru li ch'och'.

Jeremías 9:20

Ex ixq, ab'ihomaq li raatin li Qaawa'; k'uulahomaq sa' leech'ool li aatin na'elk chi xtz'uumal re. Tzolomaqeb' leeko' rik'in li b'ich a'in re rahil ch'oolejil ut tzolomaqeb' ajwi' leeramiiw ixq chi jo'ka'in:

Jeremías 9:21

“Li kamk x'ok sa'eb' li qab'entaan, xwulak toj sa' li qachaq'alil ru ochoch. Xkamsiheb' li kok'al sa'atqeb' li b'e, ut sa'eb' li k'ayiil xe'kamsiik eb' li saaj al.

Jeremías 16:6

Sa' li tenamit a'in te'kamq eb' li kok' ut ninqi poyanam, ut maajun reheb' taamuqe'q. Ink'a' taawanq rahil ch'oolejil; maajun taayaab'aq chirixeb' chi moko te'xjo li xjolomeb'.

Jeremías 25:33

Chiru li kutan a'an, eb' li te'k'ehe'q chi kamk xb'aan li Qaawa' t'anaxinq te'kanaaq sa' chixjunil li ruuchich'och'; maajun taayaab'aq chirixeb', maajun taamuquq reheb' ut t'anaxinqeb' chiru ch'och' jo'kaqeb' li k'ot.

Ezequiel 39:5

Jiljo tatkanaaq chi kutankil. Laa'in, li Qaawa', xinyehok re a'in, chan li Qaawa'.