Jeremías 33:11 - Q'eqchi Bible

¹¹ li b'ichank ut li sahil ch'oolejil, li ninq'ehik, li xb'ich li b'eelomej ut li ixaqilb'ej; taa'ab'imanq xyaab' xkuxeb' chixjunileb' li te'chalq chi mayejak re b'anyoxink sa' rochoch li Qaawa', yooqeb' chi xyeeb'al: «Chexyoxinq chiru li Nimajwal Yos xb'aan naq chaab'il li Qaawa', ut li xnimal xrahom wank chi junelik!». Relik chi yaal naq tink'ameb' chaq wi' chik sa' li xna'ajeb' li wankeb' chaq chi preexil, re naq te'wanq wi' chik jo' naq ke'wank chaq xb'enwa”, chan li Qaawa'.

Li Santil hu

¹¹ Ta̱abima̱nk cuiꞌchic xya̱b xcuxeb li yo̱queb chixjapbal reheb xban xsahil xchꞌo̱leb. Ta̱abima̱nk nak yo̱keb chi sahokꞌ saꞌ xchꞌo̱leb li yo̱queb chi ninkꞌei̱c saꞌ li sumla̱c. Ta̱abi̱k ajcuiꞌ xya̱b xcuxeb nak yo̱keb chixlokꞌoninquil li Dios ut nequeꞌxye: Lokꞌoninbil taxak li Ka̱cuaꞌ li nimajcual Dios xban nak aꞌan cha̱bil ut kꞌaxal nim li ruxta̱n saꞌ kabe̱n junelic. Ta̱abi̱k ajcuiꞌ xya̱b xcuxeb nak yo̱keb chixcꞌambal lix mayejeb re bantioxi̱nc saꞌ lix templo li Ka̱cuaꞌ. Tebinqꞌue cuiꞌchic chi sukꞌi̱c saꞌ lix naꞌajeb eb li queꞌcꞌameꞌ chi pre̱xil ut teꞌcua̱nk cuiꞌchic joꞌ nak queꞌcuan junxil.

Jeremías 33:11 ပူးပေါင်းရင်းမြစ်များ

1 Crónicas 16:34

“Chexyoxinq chiru li Qaawa' xb'aan naq chaab'il, li xrahom wank chi junelik!

Salmos 107:22

Chexmayejaq ut chexyoxinq, yehomaq resil li xninqal xb'aanuhom chi sa sa' eech'ool!

Salmos 107:1

Chexyoxinq chiru li Qaawa' xb'aan naq chaab'il, li xrahom wank chi junelik!

Salmos 106:1

Aleluya! Chexyoxinq chiru li Qaawa' xb'aan naq chaab'il, li xrahom wank chi junelik!

Hebreos 13:15

Sa' xk'ab'a' li Jesus qamayejaaq ut qayeechi'iiq junelik li qatij re li Yos, naraj naxye, a' li xk'anjel li xtz'uumal qe li naqanima wi' li xk'ab'a'.

Isaías 51:11

Jo'ka'in naq te'sutq'iiq chaq li te'kole'q xb'aan li Qaawa', yooqeb' chi b'ichank naq te'ok Sión. Li rahilal ut li yaab'ak taasachmanq chi junajwa; numtajenaqaq li xsahil xch'ooleb', ut a'an taak'utunq tz'aqal sa' xnaq' ruheb'.

2 Crónicas 29:31

Chirix chik a'an laj Esekías kixye reheb': “Anaqwan laa'ex q'axtesinb'ilex chejunqxaqalil chiru li Qaawa'. Jilonqex chaq, k'amomaq chaq leeyeechi'om ut mayejanqex re xnimankil xloq'al li Qaawa' sa' li rochoch”, chan. Ut eb' li ch'utch'uukeb' aran ke'mayejak re b'anyoxink, ut eb' li chaab'ileb' xch'ool ke'xk'at ajwi' li xmayejeb'.

2 Crónicas 5:13

Toja' naq sa' komonil ke'ok chi xyaab'asinkileb' li tronpeet ut chi b'ichank chi junaj xyaab' xkuxeb', re yoxink ut xnimankil xk'ab'a' li Qaawa', rik'in xyaab'asinkileb' li xtronpeet, eb' li xtzojtzoj ut li xkomon xwajb'eb'; yookeb' ajwi' chi xb'ichankil: “Chenima ru li Qaawa', xb'aan naq a'an q'axal chaab'il ut li xrahom wank chi junelik”. Sa' ajwi' li honal a'an li rochoch li Yos kinujak rik'in jun li choql.

Apocalipsis 18:23

Li xxamlel li saqenk ink'a' chik taasaqeno'q wankat wi', ut li xyaab' xkuxeb' li b'eelomej ut li ixaqilb'ej ink'a' chik taa'ab'iiq aawik'in. Xb'aan naq eb' laj yakonel ke'wank aawik'in a'aneb' li xninqaleb' ru winq sa' ruuchich'och', ut rik'in li tuulak xab'aanu xab'alaq'i chixjunileb' li tenamit”.

San Juan 3:29

Li ani aj ik'in wank li ixaqilb'ej a'an li b'eelomej; ut li ramiiw li b'eelomej li nawank aran ut narab'i, k'ajo' naq nasaho'k sa' xch'ool chi rab'inkil xyaab' xkux li b'eelomej. A'an a'in li xsahil inch'ool, ut ak tz'aqlojenaq chik ru.

1 Crónicas 16:8

“Chexyoxinq chiru li Qaawa', cheyaab'a li xk'ab'a', chepuktesi resil li xninqal ru xb'aanuhom reheb' li tenamit.

Zacarías 8:19

“Jo'ka'in naxye li Nimajwal Yos: Li ayuunik chiru li xka po, li ro', li xwuq ut li xlaje po, a'anaq li xnimal sahil ch'oolej cho'q reheb' laj Judá; taasutq'iiq cho'q nimla ninq'e re paab'ank ut loq'onink. Cherahaq b'i' li tiikilal ut li tuqtuukilal.

Sofonías 3:14

B'ichan, at tenamit Sión. Jap aawe xb'aan xsahil aach'ool, at Israel. Saho'qat chi x'anchalil laawaanm, at Jerusalén.

Jeremías 33:7

Tinsutq'isiheb' chaq eb' laj Judá ut eb' laj Israel sa' li xna'ajeb' ut tink'ojob'eb' wi' chik sa' li xtenamiteb' re naq te'wanq jo' naq ke'wank chaq junxil.

Jeremías 7:34

Tinsach li sahil ch'oolejil sa'eb' li tenamit re Judá ut sa'eb' li b'e re Jerusalén; ink'a' chik taa'ab'iiq li b'ichank na'uxk sa' xkutankil li sumlaak. Xb'aan naq nakirirnak taakanaaq chixjunil li na'ajej”.

Isaías 52:9

Japomaq eere chi b'ichank chi junaj xyaab' leekux, ex xpo'lemil Jerusalén, xb'aan naq li Qaawa' xril xtoq'ob'aal ru li xtenamit, ak xkol Jerusalén.

Salmos 116:17

Tinmayejaq chawu re b'anyoxink ut tinloq'oni laak'ab'a'.

2 Crónicas 7:3

Naq chixjunileb' laj Israel ke'ril li xam ut li xloq'al li Qaawa' yo chi kub'eek sa' xb'een li loq'laj ochoch, ke'wiq'laak ut ke'xhupub' rib' chiru ch'och', ke'yoxink ut ke'xloq'oni ru li Qaawa', yookeb' chi xyeeb'al: “Xb'aan naq a'an jwal chaab'il, li xrahom wank chi junelik”, chankeb'.

Zacarías 10:7

Eb' laj Efraín kama'aqeb' li kaweb' rib' chi yalok. Q'axal te'saho'q sa' xch'ool jo'aqeb' li xe'uk'ak b'iin; ut naq te'ril a'an, te'saho'q ajwi' xch'ool eb' li ralal xk'ajol. K'ajo' naq te'yoxinq chiru li Qaawa'.

Zacarías 9:17

K'ajo'aq xch'ina'usal ut xchaab'ilal li na'ajej! Li triiw taak'iiresinq reheb' li saaj winq ut li b'iin taasahob'resinq xch'ooleb' li tuq'ixq.

Jonás 2:9

A'ut laa'in tinyoxinq ut tinmayejaq chawu; tinb'aanu li k'aru inyeechi'om aawe. At Qaawa', ka'ajwi' aawik'in nachalk li kolb'a ib'”.

Jeremías 33:26

tintz'eqtaanaheb' aj raj wi' eb' li ralal xk'ajol laj Jakob ut eb' li ralal xk'ajol laj David, laj k'anjel chiwu. Ut ink'a' raj tinxaqab' junaq li ralal chi awab'ejink sa' xb'eeneb' li ralal xk'ajol laj Abrahán, laj Isahak ut laj Jakob. Xb'aan naq wajom laa'in naq te'sutq'iiq chaq wi' chik sa' li xna'ajeb' ke'k'ame'k wi' chi preexil ut twuxtaana ruheb'”, chan li Qaawa'.

Jeremías 25:10

Ink'a' chik taa'ab'imanq li ninq'ehik sa' xyanqeb', chi moko li sahil ch'oolejil ut li b'ichank re li sumlaak; ink'a' chik taa'ab'iiq xyaab' li ke'leb' ut maak'a'aq chik li xsaqenkil li xam.

Jeremías 16:9

Xb'aan naq jo'ka'in ninye laa'in, li Nimajwal Yos, li xYos laj Israel: tinsach chixjunil li sahil ch'oolejil sa' li tenamit a'in chiru leeyu'am; maak'a'aq chik ninq'ehik ut b'ichank sa' li sumlaak. Laa'ex teeril rik'in leeru.

Nehemías 12:43

Naab'al li mayej kiyeechi'imank sa' li kutan a'an ut k'ajo'eb' li tenamit chi ninq'ehik, xb'aan naq jun nimla sahil ch'oolej xk'ehom li Yos reheb'. Ke'ninq'ehik ajwi' eb' li ixq ut eb' li kok'al; ut toj chi najt ki'ab'iik li xsahilal xch'ooleb' laj Jerusalén.

Nehemías 8:12

Toja' naq chixjunileb' koheb' chi wa'ak ut chi uk'ak, chi xwotzb'al li xtzekemqeb' ut xb'aanunkil jun nimla ninq'e, xb'aan naq ke'xtaw ru li aatin ke'tzole'k wi'.

Esdras 6:22

Chiru wuqub' kutan ke'xninq'ehi li xKutankil li wa ink'a' yuub'il, chi sa sa' xch'ooleb', xb'aan naq li Qaawa' kixnujob'resiheb' rik'in sahil ch'oolej naq kixjal xk'a'uxl li awab'ej re Asiria re xtenq'ankileb' chi xyiib'ankil wi' chik li rochoch li Qaawa', li xYos laj Israel.

Isaías 51:3

Laa'in tink'ojob' xch'ool Sión ut twil xtoq'ob'aal ru li xpo'lemil; tinsutq'isi li chaqich'och' cho'q sahil na'ajej, ut li joxk' ch'och' tkanaaq cho'q xna'aj li Qaawa': k'ajo'aq li b'ichank ut sahil ch'oolej aran, taawanq li wajb'ak ut b'anyoxink sa' ink'ab'a'.

2 Crónicas 20:21

Ut naq ak xraqe'k chi k'uub'ank rik'ineb' li tenamit, kixxaqab'eb' aj b'ichanel re naq te'xb'icha ru li Qaawa' ut ke'xye: “Chexyoxinq chiru li Qaawa', xb'aan naq li xrahom wank chi junelik!”. Tiqtookeb' laj b'ichanel rik'in loq'laj aq'ej ut aj k'amol b'eheb' chiruheb' laj puub'.

Isaías 35:10

Eb' li kolb'ileb' xb'aan li Qaawa' te'sutq'iiq chaq, te'ok Sión yooqeb' chi b'ichank, ut chi xnaq' ruheb' taak'utunq li xsahilaleb' xch'ool chi junelik. Nimla sahilal taa'ochb'eeninq reheb' ut maak'a'aq chik li yaab'ak ut li rahil ch'oolej sa' xyanqeb'.

Jeremías 17:26

Te'chalq eb' laj Judá li wankatqeb' chaq chi xsutam Jerusalén, eb' li wankeb' chaq sa' xteepal Benjamín ut chiru taq'a, li wankeb' chaq chiru tzuul ut sa' xtaq'ahil Nejeb. Te'xk'amatq chaq eb' li xxul ut eb' li ru awimq cho'q xmayejeb', li k'ajpom jo'wi' chixjunil li k'a'aq re ru nayeechi'imank re b'anyoxink sa' rochoch li Yos.

Jeremías 30:19

Ut aran taa'ab'iiq li b'ichank re b'anyoxink ut li japok e xb'aan li sahil ch'oolejil. Teb'ink'e wi' chik chi k'ihank toj reetal te'naab'alo'q; maajoq'e chik te'tz'eqtaanaaq, xb'aan naq tink'e wi' chik xloq'aleb'.

Jeremías 32:44

Te'xloq'atq xch'och'eb' ut te'xtoj rik'in plaat; te'xtz'iib'a xhuhul, te'xkaaxti ut eb' li testiiw te'xjuch' li xk'ab'a'eb' sa' xhuhul li ch'och'. A'in taak'ulmanq sa' xteepal Benjamín, sa' xsutam Jerusalén ut sa'atqeb' li tenamit re Judá, sa'eb' li tzuultaq'a ut sa' xteepal Nejeb, xb'aan naq te'sutq'iiq chaq wi' chik li wankeb' chaq chi preexil”, chan li Qaawa'.

Nahum 1:7

Li Qaawa' a'an q'axal chaab'il cho'q re li kaw xch'ool chirix; a'an li kawilal sa' xhonalil li rahil ch'oolej ut narileb' li neke'oyb'enink rik'in

Salmos 85:7

Ma ink'a' taak'e wi' chik qayu'am re naq tsaho'q xch'ool laatenamit aawik'in?

Salmos 147:13

A'an xk'ehok xkawub' laawokeb'aal ut xrosob'tesiheb' laawalal aak'ajol chasutam;

Isaías 52:8

Ab'i li xyaab' xkuxeb' laj k'aak'alenel: japjookeb' re sa' junajil xb'aan xsahilaleb' xch'ool, xb'aan naq xe'ril rik'in ruheb' naq li Qaawa' xchalk wi' chik Sión.

Jeremías 29:14

Tink'e wib' chi tawe'k eeb'aan ut tink'eheb' chaq chi sutq'iik leekomon li wankeb' chaq chi preexil; texwisi chaq sa' chixjunileb' li tenamit ut na'ajej b'arwi' xexincha'cha'i, texinch'utub' ut texinsutq'isi wi' chik sa' li na'ajej b'arwi' kexwisi. Laa'in, li Qaawa', ninyehok re a'in».

Jeremías 30:3

xb'aan naq twulaq xkutankil naq tinsutq'isiheb' chaq wi' chik eb' lintenamit Israel ut Judá li wankeb' chaq chi preexil. Laa'in, li Qaawa', ninyehok re a'in. Tink'eheb' chi wank sa' li xna'ajeb' ink'ehom reheb' li xxe'toonil yuwa'”, chan li Qaawa'.

Amós 9:14

Toja' naq tink'ameb' chaq wi' chik lintenamit Israel sa' li xna'ajeb'. Te'xyiib' wi' chik eb' li tenamit li ke'juk'mank, ut aran te'wanq; te'awq uub' ut te'uk'aq b'iin; te'awq ut te'xtzeka li ru.