Jeremías 25:30 - Q'eqchi Bible

³⁰ “At Jeremías, ye chixjunileb' li aatin a'in sa' ink'ab'a'. Ye reheb' chi jo'ka'in: «Li Qaawa' tixjap chaq re sa' li choxa ut taa'aatinaq chaq chi kaw toj sa' li xsantil muheb'aal. Tixjap chaq re chi raatinankil li xtenamit, jo' naq neke'xjap reheb' li neke'yatz'ok ru li uub'.

Li Santil hu

³⁰ At Jeremías, ta̱ye reheb chixjunil li tinye a̱cue. Ta̱ye reheb chi joꞌcaꞌin: Li Ka̱cuaꞌ ta̱a̱tinak chak saꞌ choxa chi cau xya̱b xcux. Toj saꞌ lix santil naꞌaj ta̱a̱tinak ut tixye resil li raylal cha̱lc re saꞌ xbe̱n lix tenamit. Tixjap re joꞌ nak nequeꞌxjap reheb li nequeꞌyatzꞌoc re li uvas. Chixjunileb li cuanqueb saꞌ ruchichꞌochꞌ teꞌrabi nak ta̱a̱tinak li Ka̱cuaꞌ.

Jeremías 25:30 ပူးပေါင်းရင်းမြစ်များ

Amós 1:2

Kixye chi jo'ka'in: “Toj Sión naxjap chaq re li Qaawa'; toj Jerusalén na'ab'iik li xyaab' xkux. Eb' li xna'ajeb' li ketomq xe'chaqikje'k, ut xjoxk'o'k ru li tzuul Karmeel”.

Joel 3:16

Naq li Qaawa' naxjap chaq re chi aatinak aran Sión ut li xyaab' xkux na'ab'imank Jerusalén, na'eek'ank sa' xna'aj li choxach'och'. A'ut li Qaawa' a'an li xmuheelahom li xtenamit, li neke'xkol wi' rib'eb' laj Israel.

Isaías 42:13

Li Qaawa' taa'elq chaq jo' li q'axal kaw rib', tixjap chaq re jo' junaq aj puub'; chi k'ajo' xjosq'il taa'ok chi yalok ut tixq'ax ruheb' li xik' neke'ilok re.

Isaías 16:9

Jo'kan naq ok we chi yaab'ak chirix li awimq re Sibmá ut Jaser; k'ajo'aq ajwi' li xya'al wu chirix Jesbón ut Elalé, xb'aan naq maak'a'aq chik li q'olok aran xb'aan li yalok.

Apocalipsis 19:15

Sa' re na'elk chaq jun li q'esnal ch'iich' re xyok'b'aleb' li tenamit. Tixb'eresiheb' rik'in b'aar ch'iich', ut a'an ajwi' taayatz'oq uub' re risinkil li b'iin, reetalil li xnimal xjosq'il li Nimajwal Yos.

Zacarías 2:13

Ch'anch'ooq chixjunileb' chiru li Qaawa', xb'aan naq A'an xwakliik ut yo chi elk chaq sa' li xloq'laj muheb'aal!

Amós 3:8

Ani ink'a' naxiwak naq naxjap chaq re li kaqkoj? Ani ink'a' taa'aatinaq jo' propeet wi li Qaawa' nayehok re?

Oseas 5:14

Xb'aan naq laa'in jo'kaqin jun kaqkoj naq tinrahob'tesiheb' laj Efraín ut eb' laj Judá. Laa'in tinputz'inq reheb', ut chirix a'an teb'inkanab' xjuneseb'; tink'eheb' sa' rahilal, ut maajun taaruuq chi kolok reheb' sa' wuq'.

Jeremías 48:33

Maak'a' chik li b'ichank ut li sahil ch'oolejil sa'eb' li k'aleb'aal re Mohab. Xlajk li b'iin sa'eb' li k'uuleb'aal, maajun chik nayatz'ok re li uub', ut maak'a' chik li b'ichank xb'aan li sahil ch'oolej.

Jeremías 17:12

Li tzuul k'ojk'o wi' li rochoch li Qaawa' li qaYos, a'an xk'ojarib'aal li loq'al chalen chaq sa' xtiklajik.

Salmos 132:14

“Arin wank linhilob'aal, chan; arin twaj tinhilanq chi junelik: jo'kan x'alaak sa' inch'ool.

Salmos 78:65

Toja' naq ki'ajk ru li Qaawa' kama' wi' sa' xwara, kama' naq ajaamil ru li kaw rib' chirix li xkalajik.

Salmos 58:5

Wankeb' xmay re, jo'keb' li k'anti', tz'apxikeb' kama' li ikb'olay li ink'a' naraj ab'ink

Salmos 11:4

Li Qaawa' wank sa' li xloq'laj ochoch, li Qaawa' wank xk'ojarib'aal sa' li choxa; naril chaq chixjunil li ruuchich'och' ut naxk'e reetal chixjunil li qab'aanuhom.

2 Crónicas 30:27

Chirix chik a'an ke'xaqliik eb' laj tij ut eb' laj Leví, ut ke'rosob'tesi li tenamit. Ut li Qaawa' kirab'i xyaab' xkuxeb', ut li xtijeb' kiwulak toj sa' choxa, sa' li xloq'laj muheb'aal.

1 Reyes 9:3

ut kixye re: “Xwab'i laatij ut li k'aru xatz'aama chiwu. Xinsantob'resi li kab'l a'in li xayiib', re naq arin taawanq link'ab'a' chi junajwa. Laa'in tinra ut tin'iloq re chi junelik.

Deuteronomio 26:15

Chalen chaq sa' laaloq'laj muheb'aal, toj sa' xb'een li choxa, chawil ut chawosob'tesi chaq laatenamit Israel, jo' ajwi' li ch'och' k'ajo' xq'emal xak'e qe, jo' chanru xayeechi'i chaq reheb' li qana' qayuwa'».

2 Samuel 15:25

Ab'an li awab'ej kixye re laj Sadok: “K'am wi' chik li xLoq'laj Kaax li Yos sa' li tenamit. Wi usilal xintaw chiru li Qaawa', A'an tinxk'e chi sutq'iik re naq twil wi' chik li Loq'laj Kaax ut li xmuheb'aal.

Salmos 46:6

Li Qaawa' wank sa' xyi li xtenamit, maak'a' taa'eek'asinq re; li Yos natenq'ank re chalen naq nasaqewk.

Isaías 33:3

Naq nakat-aatinak chaq chi kaw xyaab' laakux, neke'elelik eb' li poyanam, neke'xcha'cha'i rib' li tenamit chi rilb'al laawankil;

Jeremías 25:38

Jo' junaq kaqkoj li x'elk sa' li xna'aj, jo'kan ajwi' naq li Qaawa' x'elk chi xsachb'al ru li xtenamit, ut li na'ajej xkanaak chi po'lemil, xb'aan naq xlochk xxamlel xjosq'il li Qaawa', ut jun nimla raaxiik' xtaqlaak chaq sa' xb'eeneb'.

Oseas 11:10

A' chik li Qaawa' te'xtaaqe, ut A'an tixjap re jo' naxb'aanu li kaqkoj. Tixjap re, ut chixjunileb' li alalb'ej te'chalq sa' xjayal rokeb'l saq'e chi siksootqeb' xb'aan xxiweb'.