Jeremías 23:24 - Q'eqchi Bible

²⁴ Ma naru tixmuq rib' junaq poyanam chiwu b'arwi' ink'a' twil ru laa'in? Laa'in wankin yalaq b'ar jo' sa' choxa jo' sa' ruuchich'och' -chan li Qaawa'-.

Li Santil hu

²⁴ ¿Ma naru ta biꞌ nequeꞌxmuk rib li cristian chicuu? ¿Ma cuan ta biꞌ junak naꞌajej li incꞌaꞌ nacuil la̱in? La̱in cuanquin yalak bar, joꞌ saꞌ choxa joꞌ saꞌ ruchichꞌochꞌ.

Jeremías 23:24 ပူးပေါင်းရင်းမြစ်များ

Proverbios 15:3

Li Qaawa' wank yalaq b'ar ut narileb' li chaab'il ut li ink'a' useb' xch'ool.

Salmos 139:7

Ma truuq tab'i' tinxik chi najt chiru laaloq'laj musiq'? Ma truuq tab'i' tin'eleliq chawu laa'at?

Salmos 90:8

Laa'at nakanaw chixjunil li qamaak. Li k'aru xqab'aanu chi muqmu, kutan saqenk chik chawu laa'at.

Isaías 29:15

Ra chaalel sa' xb'eeneb' li neke'xmuq rib' chiru li Qaawa' yal re xmuqb'al li xk'a'uxeb'! Neke'b'aanunk maa'usilal sa' li aak'ab' ut neke'xye: “Maajun na'ilok qe, maajun nanawok qu”, chankeb'.

1 Reyes 8:27

“Ab'anan ma naru tab'i' nawank li Qaawa' sa' ruuchich'och'? Wi li choxa a'an q'axal nim ut ink'a' tz'aqal cho'q aana'aj, ma toja' ta chik li ochoch a'in li xinyiib' cho'q aawe!

Isaías 57:15

Xb'aan naq jo'ka'in xyehom li Nimajwal Yos, li nim xwankil, li junelik wank chalen chaq q'e kutan ut li q'axal Sant li xk'ab'a': “Laa'in wankin sa' li na'ajej najt xteram ut jwal loq', ab'anan wankin ajwi' rik'in li ra sa' xch'ool ut li tz'eqtaananb'il, re xk'eeb'al xkawub' xch'ool li kub'enaq xwankil ut li namayok raanm.

Isaías 66:1

Jo'ka'in kixye li Qaawa': “Li choxa a'an link'ojarib'aal, ut li ruuchich'och' a'an li xxaqleb'aal li woq. K'aru chi ochochil teeyiib' laa'ex cho'q we, malaj k'a' chi na'ajejil teek'e cho'q inhilob'aal?

Salmos 10:11

Naxye sa' xch'ool: “Li Yos ink'a' chik nak'oxlak, ink'a' na'ilok, maajaruj tixnaw a'in”, chan.

2 Crónicas 6:18

“Ab'anan ma naru tab'i' nawank li Qaawa' sa' ruuchich'och'? Wi li choxa a'an q'axal nim ut ink'a' tz'aqal cho'q aana'aj, ma toja' ta chik li ochoch a'in li xinyiib' cho'q aawe!

Efesios 1:23

a'an li xtz'ejwal, xtz'aqob' li Kriist li naxnujob'resi ru chixjunil chi tz'aqal re ru.

2 Crónicas 2:6

Ab'an ani taaruhanq chi xkab'lankil jun rochoch li Qaawa' wi li xnimal li choxa ink'a' tz'aqal cho'q xna'aj? Ut anihin laa'in chi xkab'lankil jun rochoch li Yos, us ta yal re xk'atb'al li pom sa' xk'ab'a'?

Daniel 4:35

Chiru A'an maak'a' neke'ok wi' eb' li poyanam sa' ruuchich'och'. Naxb'aanu li k'aru naraj rik'ineb' li wankeb' sa' choxa jo' ajwi' rik'ineb' li wankeb' sa' ruuchich'och'; maajun naxkuy wank chiru ut maa'ani taapatz'oq re k'a'ut naq naxb'aanu chi jo'kan.

Ezequiel 9:9

Li Qaawa' kichaq'ok ut kixye we: “Q'axal numtajenaq li xmaakeb' laj Israel ut eb' laj Judá. Nujenaq chi kamenaq chixjunil li tenamit; maak'a' chik tiikilal aran Jerusalén. Sa' xch'ooleb' a'an naq xinkanab' xjunes li tenamit ut ink'a' nawil li k'aru yookeb' chi xb'aanunkil.

Ezequiel 8:12

Toja' naq li Qaawa' kixye we: “At kaamel winq, ma xawil k'aru neke'xb'aanu sa' muqmu eb' li xcheekelal laj Israel? Ma xak'e reetal chanru naq li junjunq naxloq'oni ru li xjalanil yos sa' li xtijob'aal? Sa' xch'ooleb' a'an naq ink'a' nawil ruheb' ut xin'elk sa' li tenamit a'in”.

Jeremías 49:10

Ab'an laa'in rek' xinkanab'eb' laj Esaú, xinkanab' chi kutankil li na'ajej neke'xmuq wi' rib' ut ink'a' chik te'ruuq wank chi muqmu. Chi junwaakaj xe'sachmank ruheb' li ralal xk'ajol, eb' li rech'alal jo'wi' eb' li rechkab'al; maajun chik naxye:

Salmos 148:13

Cheterq'usi xk'ab'a' li Qaawa' xb'aan naq ka'ajwi' li xk'ab'a' jwal nim xloq'al; xaqxo li xwankil sa' xb'een li choxach'och'!

Génesis 16:13

Toja' naq lix Agar kixk'e “laa'at li Yos li na'ilok we” cho'q xk'ab'a' li Yos ki'aatinank re, xb'aan naq kixye sa' xch'ool: “Arin xwil ru li na'ilok we”.

Hebreos 4:13

Maa'ani muqmu chiru a'an, chixjunil b'an k'utk'u ut saqenk chiru li Yos li toxqaye wi' qayehom qab'aanuhom.

Li xHu LAJ JOB 34:21

Li Yos naril ut naxnaw jo'ch'inal jo'nimal naqab'aanu.

Li xHu LAJ JOB 34:22

Maak'a' junaq q'oqyinkil ru na'ajej te'xmuq wi' rib' li neke'b'aanunk maa'usilal.

Jeremías 16:17

Xb'aan naq kutan saqenk chiwu chixjunil li xb'aanuhomeb', nawil li xmaakeb' ut nink'e reetal chi us li xmaa'usilaleb'.

Jeremías 32:19

Sachb'ach'oolej rilb'al laak'anjel ut q'axal nim laawankil chi xb'aanunkil. Kutan saqenk chawu chixjunil li xb'aanuhomeb' li poyanam, re xq'ajkamunkil li junjunq jo' chanru xk'ulub' li xyehom ut xb'aanuhom.

Daniel 2:22

A'an nak'ehok chi kutankil li muqmuukil k'a'uxl ut li ch'a'aj xtawb'al ru; naxnaw li k'aru muqmu sa' li aak'ab', xb'aan naq na'ochb'eeniik xb'aan li kutan saqenk.

Salmos 139:8

Wi ta tintaqe'q sa' choxa, aran wankat laa'at; wi ta tinsotob' wib' sa' xna'ajeb' li kamenaq, aran ajwi' wankat chaq.