Jeremías 20:16 - Q'eqchi Bible

¹⁶ Li winq a'an chisache'q taxaq ru jo'eb' li tenamit li ke'sache'k xb'aan li Qaawa' chi ink'a' kiril xtoq'ob'aaleb' ru. Chirab'i ta li japok e xb'aan li rahilal eq'la ut li b'oqok chi yalok sa' li wa'leb',

Li Santil hu

¹⁶ Li cui̱nk aꞌan chanchanak ta li tenamit li queꞌsacheꞌ ru xban li Ka̱cuaꞌ chi incꞌaꞌ quiril xtokꞌoba̱l ruheb. Junelic taxak li ple̱t ut li ya̱bac ta̱rabi chi kꞌek chi cutan.

Jeremías 20:16 ပူးပေါင်းရင်းမြစ်များ

Jeremías 18:22

Chi'ab'imanq li japok e sa' rochocheb' naq te'chalq sa' junpaat jun teep chi aj elq' sa' xb'eeneb'. Xb'aan naq xe'xpik li jul re inmuqb'al ut xe'xk'e jun k'aam rub'el woq re inra'lenkil.

Deuteronomio 29:23

«Junes asuupr ut atz'am wank chik aran, ut li ch'och' k'atalkaq aj chik ru: a'an a'in chixjunil leena'aj. Ink'a' chik taaruuq awk arin, maak'a' taamoq chiru, chi moko li pim taak'iiq sa' li na'ajej a'in, kama' li rahilal kixk'ul Sodoom ut Gomoor, Admá ut Seboín naq ke'sache'k ru xb'aan xnimal xjosq'il li Qaawa'», cha'qeb'.

San Judas 1:7

Jo'kan ajwi' Sodoom, Gomoor ut eb' li tenamit li ke'wank chi xk'atq, ke'kanaak cho'q xnimal eetalil cho'q qe laa'o: anaqwan neke'xkuy li xtojb'al rix li xmaakeb' sa' li xam chi junelik xb'aan naq, kama'eb' li ánjel, ke'xmux rib' ut ke'xq'axtesi rib' chi xb'aanunkil li jo'maajo'il na'leb'.

2 Pedro 2:6

Ut kixteneb' li kamk sa' xb'eeneb' li tenamit Sodoom ut Gomoor, naq kixkanab'eb' chi chahil, jo' jun eetalil chiruheb' li ink'a' te'xpaab' li Yos sa'eb' li kutan chalkeb' re.

San Lucas 17:29

ab'anan sa' li kutan naq ki'elk chaq laj Lot Sodoom, li Yos kixtaqla chaq xam ut asuupr toj sa' choxa ut kixsach chixjunileb'.

Sofonías 2:9

Jo'kan naq Laa'in, li Nimajwal Yos ut xYos laj Israel, ninye li waatin naq Mohab taakanaaq jo' Sodoom, ut Amón taa'oso'q jo' Gomoor. Junes k'ix ut atz'am taa'elq chiru; nakirirnak chi junajwa taakanaaq. Jo'k'ihaleb' chik lintenamit xe'kole'k, te'xxok chixjunil ut eb' a'an te'eechaninq re li na'ajej a'an”.

Sofonías 1:16

xkutankil li tz'uyink ut xyaab'asinkil li tronpeet chirixeb' li kawub'resinb'il tenamit ut chirixeb' li xnajt xteramil ochoch.

Jonás 4:2

Jo'kan naq kitijok chiru li Yos: “At Qaawa', a'in tz'aqal li xink'oxla, naq toj wankin chaq sa' lintenamit. Jo'kan naq xwaj elelik chi junpaat toj Tarsis, xb'aan naq ninnaw naq laa'at jun Yos q'axal tuulanat, aj uxtaanat, nim aakuyum ut jwal chaab'ilat. Junelik kawal wankat chi xjalb'al laak'a'uxl ut ink'a' nakataqla li rahilal li xak'oxla xb'aanunkil.

Jonás 3:4

Laj Jonás ki'ok chi xtoqb'al ru li tenamit, ut chiru jun kutan japjo re chi xyeeb'al chi kaw xyaab' xkux: “Sa' ka'k'aal kutan taajuk'manq Nínive”.

Amós 4:11

“Xexinsach rik'in nimla rahilal jo' kinb'aanu reheb' laj Sodoom ut eb' laj Gomoor, ut chanchanex aj chik li ru'uj si' na'elk sa' li xam naq xexkanaak. Ab'anan laa'ex ink'a' xexsutq'iik chaq wik'in”, chan li Qaawa'.

Amós 2:2

Jo'kan naq tink'e xxamlel chixjunil li xteepal Mohab ut te'k'ate'q eb' li xchaq'alil ru ochoch re Keryot. Sa' li nimla mululij ib' te'kamq eb' laj Mohab, naq yooq chi yaab'asiik li pur sa' xhonalil li yalok.

Amós 1:14

Jo'kan naq tink'e xxamlel li xsuttz'akil li tenamit Rabá ut te'k'ate'q eb' li xchaq'alil ru ochoch. Tinb'aanu chi jo'kan sa' xkutankil li yalok, sa' li nimla mululij ib', jo' xyaab' li kawil kaqsut-iq'.

Oseas 11:8

“Chanru naq tatinkanab', a Efraín? Chanru naq tatintz'eqtaana, a Israel? Ma tatinsach tab'i' jo' xinb'aanu re li tenamit Admá malaj tinb'aanu ta aawe jo' xinb'aanu reheb' laj Seboín xb'aan li xmaa'usilaleb'? Q'axal nayot'e'k li waanm ut namayok linch'ool chawix.

Oseas 10:14

Jo'kan naq taawanq li mululij ib' sa' leetenamit ut te'juk'e'q chixjunileb' leekawub'resinb'il ochoch. Teek'ul li kik'ulmank aran Bet-Arbel naq laj Salmán kixsach li tenamit a'an sa' xkutankil li yalok, naq eb' li na'b'ej ke'pik'aje'k chiru ch'och' rochb'eeneb' li xkok'aleb'.

Ezequiel 21:22

Sa' xnim uq' x'elk li simaj li naxjayali Jerusalén, a'an reetalil naq taaxik chi xsachb'al: tixsut rix li tenamit, tixtuub' li xtaqleb'aal chi xsutam, tixk'eheb' xk'anjelob'aal chireheb' li okeb'aal ut tixjap re chi xyeeb'al resil li kamsink tiklaak re.

Jeremías 26:13

Chaab'ilob'resiiq leeyu'am ut leeyehom eeb'aanuhom, paab'omaq li Qaawa' leeYos, ut A'an ink'a' tixtaqla chaq li rahilal sa' eeb'een jo' xineerab'i chi xyeeb'al.

Jeremías 18:8

Ab'anan wi li tenamit a'an naxkanab' xb'aanunkil li maa'usilal, laa'in ink'a' chik tinrahob'tesi jo' k'uub'k'u inb'aan.

Jeremías 4:19

Jwal nayot'e'k linch'ool ut q'axal namayok li waanm, ka'aj chik maa na'elk linch'ool sa' li xna'aj. Ink'a' ninkanab' xjapb'al we chi aatinak xb'aan naq yookin chi rab'inkil xyaab'eb' li pur li yo chi b'oqok re xik chi yalok.

Jeremías 23:14

Xwil ajwi' li k'aru neke'xb'aanu eb' li propeet aj Jerusalén: q'axal yib' wi' chik ru li xb'aanuhomeb'. Neke'muxuk sumlaak ut neke'b'alaq'ik; neke'xk'e xkawil xch'ooleb' li ink'a' useb' xna'leb' re naq maajun tixkanab' xb'aanunkil li maa'usilal. Eb' a'an jo'wi' eb' li wankeb' Jerusalén chanchaneb' laj Sodoom ut eb' laj Gomoor!

Lamentaciones 4:6

Li xmaak lintenamit naxq'ax ru li xmaa'usilal li tenamit Sodoom, li kisache'k ru chi junpaat chi maajun junaq kitenq'ank re.

Oseas 13:14

Ma tinkol tab'i' chiru li muqleb'aal kamenaq? Ma twisi tab'i' sa' ruq' li kamk? At kamk, b'ar wank laawankil? B'ar wank laatiq'leb', at muqleb'aal kamenaq? Ink'a' twil xtoq'ob'aal ru laj Efraín.

Deuteronomio 29:22

Eb' li toj te'yo'laaq, a'eb' leeralal eek'ajol li te'chalq cherix laa'ex, jo' ajwi' eb' li jalan xtenamiteb' chalenaqeb' chaq chi najt, naq te'ril li xninqal rahilal ut yajel taarahob'tesiiq wi' li na'ajej a'in xb'aan li Qaawa', te'xjap re chi xyeeb'al: