Isaías 5:2 - Q'eqchi Bible

² Kixpiki li ch'och', kirisiheb' li pek chisa' ut kiraw li iyaj jwal chaab'il. Sa' xyi li rawimq kixkab'la jun najt xteramil ochoch ut kixyiib' jun xna'aj re xyatz'b'al li uub'. Li wamiiw kiroyb'eni li uub' q'axal ki', ab'anan junes ra re li uub' kiruuchin.

Li Santil hu

² Quixyi̱b lix corral. Quixbec ru li chꞌochꞌ ut quilajrisi li pec chi saꞌ. Quixsicꞌ li cha̱bil uvas ut quirau saꞌ li chꞌochꞌ. Ut saꞌ xyi li acui̱mk quixyi̱b jun li chꞌina cab najt xteram re xcꞌacꞌalenquil. Ut quixyi̱b jun li yatzꞌleb ut quiroybeni ta̱u̱chi̱nk li acui̱mk. Aban nak quiu̱chin, ma̱cuaꞌ chic li cha̱bil uva quiru̱chin. Aꞌ ban chic li rare qui-el.

Isaías 5:2 ပူးပေါင်းရင်းမြစ်များ

Jeremías 2:21

Laa'in katwaw jo' jun toon chi chaab'il che', li sik'b'il ru riyajil. Ab'anan chan put ru naq xajaltesi aawib' cho'q ruq' xtoonal li che' ink'a' na'uuchink?

1 Corintios 9:7

Ani nawank chi soldaadil ut yal tixk'achi'i rib' xjunes? Ani na'awok jun siiraq chi uub' chi ink'a' ta tixyal xsahil ru li rawimq? Ani nab'eresink ketomq chi ink'a' ta tixyal xsahil li xketomq?

San Marcos 11:13

Kiril chi najt jun toon chi iig wank xxaq, ut koho chi rilb'al ma tixtaw tana junaq li ru. Kiwulak chi xk'atq, ab'anan maak'a' kixtaw, ka'ajwi' li xxaq, xb'aan naq moko xq'ehil ta chi uuchink.

Romanos 9:4

A'aneb' laj Israel. Li Yos kixsik'eb' ru cho'q ralal xk'ajol ut kixk'ut li xnimal xloq'al, kixk'ojob' li Sumwank rik'ineb', kixk'e reheb' li Chaq'rab' jo'wi' li xloq'laj yeechi'om, ut kixtzoleb' chirix li loq'onink.

San Marcos 12:2

Naq kixtaw xq'ehil, kixtaqla jun li xmoos rik'ineb' laj k'alom, re naq tixk'ul ru li rawimq li tento taatz'aq.

San Mateo 21:34

Naq kiwulak xq'ehil xchoqb'al li uub', kixtaqlaheb' li xmoos rik'ineb' laj k'alom re naq tixk'ul ru li rawimq.

San Mateo 21:19

Kiril jun toon chi iig wank chire b'e: kinach'ok rik'in, ab'anan junes xaq kixtaw. Toja' naq kixye re: —Mat-uuchink chik chi junajwa. Ut chi junpaat kichaqik li xche'el li iig.

Miqueas 4:8

Ut laa'at Sión, rochochilat li xtenamit li Yos ut xkawilat li tenamit Jerusalén, nimaq wi' chik laawankil jo' junxil: laa'at tat-ok wi' chik chi awab'ejink sa' xb'een Israel”.

Oseas 10:1

Li tenamit Israel chanchan jun toon chi uub' li naab'al naruuchin. Ab'an naq naab'al naruuchin, naxtamresi ajwi' li x'artal; ut naq q'axal chaab'il li xch'och', naab'al ajwi' li chaab'il pek naxyiib' cho'q jalam u.

Isaías 5:7

Li xyaalal li b'ich, a'an a'in: li rawimq li Nimajwal Yos, a'an li tenamit Israel, ut eb' laj Judá, a'an li iyaj jwal raaro xb'aan. Li Qaawa' kiroyb'eni naq te'xb'aanu li us, ut maa'usilal chik kixtaw; kixyo'oni naq te'wanq sa' tiikilal, ut junes a' chik li rahob'tesink ib' kixtaw.

Isaías 1:8

Sión xkanaak xjunes jo' li kuukil ochoch sa' li awimq, jo' junaq tenamit sutsu xb'aaneb' li xik' neke'ilok re.

Nehemías 13:15

Sa'eb' li kutan a'an kink'e ajwi' reetal naq wankeb' aj Judá neke'k'anjelak sa' li hilob'aal kutan: neke'yatz'ok uub', neke'b'eelank triiw chi joob', neke'xk'eheb' li b'uur chi riiqankil li b'iin, uub', iig ut yalaq k'a' chi iiqul, re xk'amb'al chaq Jerusalén sa' li kutan sábado. Toja' naq keb'inq'us ut kinye reheb' naq ink'a' te'k'ayinq sa' li kutan a'an.

Jueces 16:4

Moqon chik laj Sansón xkoho xch'ool chirix jun li ixq xDalila xk'ab'a', li wank sa' xtaq'ahil Sorek.

Deuteronomio 32:6

Ma jo'kan naq nakaq'ajkamu li Qaawa' laaYos, at jip aj tenamit ut maak'a' aana'leb'? Ma ink'a' tab'i' A'an laaYuwa', laj Winqob'resihom aawe?

Números 23:9

Toj sa' xb'een li saqoonak neke'wil, toj sa' xb'eeneb' li b'ool nink'e reetal: a'an jun tenamit li wankeb' xjunes; ink'a' k'eeb'ileb' sa' ajl sa' xyanqeb' li poyanam.

Éxodo 33:16

Xb'aan naq k'aru taanawmanq wi' naq usilal xintaw chawu wochb'een lintenamit? Ma ink'a' tab'i' rik'in naq laa'at nakoohaawochb'eeni? A'an reetalil naq sik'b'il qu aab'aan, chiruheb' chixjunil li tenamit junsut junrub'el choxa”.

San Mateo 21:33

“Ab'ihomaq jun chik li jaljookil ru aatin. Jun li winq aj eechal junkab'al kiraw jun siir x'uub', kixsut chi koral, kixb'ek aran jun xyatz'leb'aal uub' ut kixyiib' jun li kab'l cho'q re laj k'aak'alenel; kixk'e chi to' reheb' aj k'alom ut koho chi najt.

San Marcos 12:1

Li Jesus ki'ok chi raatinankileb' sa' jaljookil ru aatin. Kixye reheb' chi jo'ka'in: “Jun li winq kiraw jun siir x'uub', kixsut chi koral, kixb'ek jun xyatz'leb'aal uub' ut kixyiib' jun li kab'l cho'q re laj k'aak'alenel; kixk'e chi to' reheb' aj k'alom ut koho chi najt.

2 Samuel 7:10

Tink'e xch'och'eb' laj Israel lintenamit ut tink'eheb' chi hilank aran, re naq sa te'wanq chi maak'a'aqeb' xxiw ut ink'a' chik te'rahob'tesiiq xb'aaneb' li ink'a' useb' xna'leb' kama' junxil

Salmos 80:8

At qaNimajwal Yos, choohaawaklesi wi' chik, choohaawil rik'in xnimal laawusilal, ut tookole'q!

Salmos 80:9

Xamich' chaq jun toon chi uub' sa' li tenamit Ejiipt ut xawisiheb' li poyanam sa' li qana'aj re naq wanq junelik arin;

Jeremías 11:17

Li Nimajwal Yos, li ki'awok aawe, kixteneb' jun nimla rahilal sa' aab'een, xb'aan li xmaa'usilaleb' laj Israel ut eb' laj Judá: ke'xchiq' xjosq'il xb'aan naq ke'mayejak k'ajpom chiruheb' laj Bahal.