Isaías 17:10 - Q'eqchi Bible

¹⁰ Xb'aan naq xatz'eqtaana li Yos, laj kolol aawe, ut xsachk sa' laach'ool naq A'an li nak'ehok aakawilal. Jo'kan naq xawaw eb' li ch'ina'usil awimq rik'in jalanil iyaj li chalenaq sa' ab'l tenamit.

Li Santil hu

¹⁰ La̱ex aj Israel, xetzꞌekta̱na li Ka̱cuaꞌ laj colol e̱re. Incꞌaꞌ xepatzꞌ e̱tenkꞌanquil re li Dios li chanchan li sako̱nac li xecol cuiꞌ raj e̱rib. Xerau ban li acui̱mk chꞌinaꞌus re xqꞌuebal xlokꞌal li jalanil dios.

Isaías 17:10 ပူးပေါင်းရင်းမြစ်များ

Jeremías 2:32

Ma nasachk tab'i' sa' xch'ool junaq tuq'ixq li xchaab'il b'aatal, malaj li sum'anmej ink'a' chik najultiko'k re li xsahob' ru? Ab'an lintenamit ak najter ninsachk sa' li xch'ool.

Isaías 26:4

K'ojob'omaq leech'ool rik'in li Qaawa' chi junelik, xb'aan naq A'an tz'aqal li Saqoonak nakolok qe.

Deuteronomio 32:18

“At Israel, xsachk sa' aach'ool li Saqoonak, laj Yoob'tesinel aawe; xatz'eqtaana li Yos li kisiyank aawe.

Salmos 106:21

Kisachk sa' xch'ooleb' li Yos laj Kolol reheb', li kixb'aanu chaq xninqal eetalil aran Ejiipt:

Deuteronomio 32:4

A'an li qaSaqoonak; tz'aqal re ru jo'nimal naxb'aanu; chixjunil li xk'uub'ahom a'an tiikilal. A'an jun Yos tiik xch'ool, li ink'a' nab'alaq'ik; a'an paab'ajel ut jwal chaab'il.

Oseas 8:14

Eb' laj Israel xe'xyiib' naab'al li xninqal ru ochoch, ut xsachk sa' xch'ooleb' laj Yoob'tesihom reheb'. Eb' laj Judá xe'xsuttz'aki naab'aleb' li tenamit; a'ut laa'in tink'eheb' xxamlel, ut te'k'ate'q chixjunileb' li xchaq'alil ru ochoch”.

Jeremías 17:13

At Qaawa', laa'at tz'aqal li royb'enihom laj Israel. Chixjunileb' li te'tz'eqtaananq aawe, xutaanal te'kanaaq. Eb' li te'najto'q aawik'in, taasachmanq li xk'ab'a'eb' jo' tawi' tz'iib'anb'il sa' pojtz', xb'aan naq xe'xkanab' li Qaawa', a'an li yu'amha'.

Jeremías 12:13

Xe'awok triiw, ut k'ix chik xe'xxok; maak'a' rajb'al naq xe'k'anjelak chi kaw. Te'xutaanaq chi xxokb'al li kach'in ajwi' xb'aan naq k'ajo' li xxamlel linjosq'il”.

Isaías 51:13

K'a'ut naq nakatz'eq chirix laach'ool li Qaawa', laj yoob'tesihom aawe, li kihelok re li choxa ut kixk'ojob' li ruuchich'och'? K'a'ut naq nakanumsi li kutan chi xxiwankil ru laj rahob'tesinel, li junelik naxyal xq'e chasachb'al? Ab'anan, b'ar wank anaqwan li xjosq'il laj rahob'tesinel?

Isaías 12:2

A' li Yos nakolok we; k'ojk'o li waanm rik'in ut maak'a' ninxiwa. Li Qaawa' a'an linkawilal ut linmetz'ew, a'an laj kolol we”.

Salmos 106:13

Ab'an sa' junpaat kisachk sa' xch'ooleb' li xb'aanuhom, ink'a' ke'xk'uula sa' xch'ooleb' li xnimal xk'a'uxl li Yos.

Salmos 85:4

Xawisi laajosq'il sa' qab'een ut xasach sa' laawaanm li xpo'ik aach'ool.

Deuteronomio 32:31

Neke'xnaw chi us eb' li xik' neke'ilok qe naq laj ilol reheb' moko jo' ta laj Ilol qe laa'o.

Salmos 79:9

At Qaawa', at aj Kolol qe, choohaatenq'a taxaq, sa' xk'ab'a' li xnimal aaloq'al. Choohaakol taxaq, chakuy chasach ta qamaak sa' xk'ab'a' laawankilal ut laatiikilal.

1 Crónicas 16:35

Yehomaq re: «At Qaawa', at qaNimajwal Yos, choohaakol taxaq! Choohaawisi sa' xyanqeb' chixjunil li poyanam ut choohaach'utub', re naq tooyoxinq chawu ut tqanima laaloq'al!

Deuteronomio 32:15

“Ke'tzekank chi us eb' laj Israel; ke'nimank xtib'el laj Yesurún ut ke'xq'etq'eti rib'; ke'nimank li xsa'eb', ke'xb'olob' rib' ut ke'xkanab' li Yos, a' laj Yoob'tesinel reheb'. Ke'xtz'eqtaana li Saqoonak, laj Kolol reheb'.

Deuteronomio 28:30

Tatsumlaaq rik'in junaq ixq ut jalan chik li winq taa'eechaninq re; taayiib' junaq ochoch ut ink'a' tatwanq chisa'; tat-awq, ab'anan ink'a' taayal xsahil ru laawawimq.

Deuteronomio 8:19

Ab'anan wi taasachq sa' laach'ool li Qaawa' laaYos, wi tatxik chirixeb' li jalanil yos, wi taaloq'oni ruheb' ut taawiq'ib' aawib' chiruheb', laa'in ninch'olob' chawu anaqwan naq tex'oso'q chi junajwa.

Deuteronomio 8:14

“Mare anchal taasachq sa' laach'ool li Qaawa' laaYos li ki'isink chaq aawe sa' li tenamit Ejiipt, b'arwi' katwank chaq chi munil.

Deuteronomio 8:11

“K'e reetal, maatz'eq chirix aach'ool li Qaawa' laaYos. Misachk sa' aach'ool xpaab'ankil li chaq'rab', eb' li aatin ut taqlahom xinye aawe sa' li kutan a'in.

Deuteronomio 6:12

Naq akaq xatwa'ak ut xk'ojlaak laach'ool, misachk sa' laach'ool li Qaawa' li ki'isink chaq aawe sa' li tenamit Ejiipt, b'arwi' katwank chaq chi munil.

Levítico 26:20

Maak'a'aq chik aj e naq teetawasi eerib' xb'aan naq ink'a' chik taa'elq li awimq sa' li ch'och' chi moko te'uuchinq li che' sa' leena'aj.

Levítico 26:16

jo'kan ajwi' tinb'aanu eere laa'in: tintaqla chaq sa' eeb'een li xiwak, li raxkamk, li tiq, li xyajel sa' uhej ut xlub'ik leetib'el; maak'a' rajb'al naq tex'awq xb'aan naq a'eb' li xik' neke'ilok eere te'yaloq xsahil ru leerawimq.

Sofonías 1:13

Jo'kan naq taa'elq'aaq li xb'ihomaleb' ut taajuk'manq li rochocheb'. Xe'yiib'ank ochoch, ab'an ink'a' te'wanq chisa'; xe'awk uub', ab'an ink'a' te'uk'aq b'iin”.

Habacuc 3:18

ab'an laa'in taasaho'q linch'ool rik'in li Qaawa', k'ojk'ooq li waanm rik'in li Yos laj kolol we.

Amós 5:11

Laa'ex nekerahob'tesi li neb'a' ut nekepatz' re li toj chirix li triiw. Jo'kan naq ink'a' texwanq sa'eb' li ochoch xeyiib' rik'in pek tuqub'anb'il ru chi us, chi moko teeruk' xya'al li uub' xeraw chi chaab'il.

Oseas 4:6

Yo chi kamk lintenamit xb'aan naq ink'a' neke'xnaw wu. Ut laa'at, aj tij, xatz'eqtaana xnawb'al wu, jo'kan naq tatwisi sa' laak'anjel. Xb'aan naq xatz'eqtaana li xchaq'rab' laaYos, laa'in ajwi' teb'intz'eq chirix inch'ool eb' laawalal aak'ajol.

Salmos 65:5

Us xaq re li sik'b'il ru aab'aan, a' li nakak'am aawik'in re taawanq sa' laamuheb'aal. Chisaho'q sa' qach'ool rik'in li saa'us wank sa' laajunkab'al, rik'in li loq'laj eechej wank sa' laawochoch.

Salmos 31:2

At Qaawa', aawik'in ninmuhenk, maajaruj taxaq taasachb'esiiq inch'ool chawix! Chinaakol taxaq sa' xk'ab'a' laatiikilal,

Salmos 18:2

Kixye: At Qaawa', q'axal nakatinra, laa'at li xkawilal linch'ool.

Salmos 9:17

Li Qaawa' xk'ut rib' ut xraqok aatin: xb'ach'le rib' laj maak sa' li xb'aanuhom li ruq'.

Isaías 17:9

Sa' li kutan a'an te'kanab'aaq li tenamit jo' naq ke'kanab'aak li xtenamiteb' laj Amor ut laj Jib chiruheb' laj Israel: nakirirnak ut chaqich'och' te'kanaaq wi'.

Isaías 18:5

Naq naraqe'k chi atz'umak li xtoonal li uub' ut naxtikib' uuchink chi toj maji' ajwi' naq'ano'k li ru, tinsaab'esi ru rik'in ch'iich', tinyok'i ut tinkuteb' chi najt eb' li ruq'.

Isaías 25:4

Xb'aan naq chanchanat jun saqoonak cho'q re li lub'lub', laa'at xkawub' xch'ool li neb'a' naq wank sa' rahilal, laa'at nakatkolok chiru li hab' ut nakatmuheelank chiru xtiqwal li saq'e. Eb' li josq' aj poyanam chanchaneb' li b'ut'iha' sa' li hab'alq'e

Isaías 30:29

Ab'an laa'ex texb'ichanq jo' na'uxk chiru q'oqyink sa' junaq loq'laj ninq'e. K'ajo' naq taasaho'q leech'ool, jo' naq nasaho'k xch'ool junaq poyanam xb'aan xyaab' li xolb' naq naxik sa' li xtzuul li Qaawa', sa' li xmuheb'aal laj Israel!

Isaías 33:2

At Qaawa', chawuxtaana taxaq qu, aawik'in yooko chi oyb'enink. Laa'ataq xkawub' qach'ool rajlal eq'la, laa'ataq laj kolol qe sa' xq'ehil li rahilal.

Isaías 44:8

Mexxiwak ut meesiksiki eerib'. Ma ink'a' ak inyehom resil laa'in chalen chaq junxil? Laa'ex li testiiw chiwix. Ma wank tab'i' junaq chik yos chiwu laa'in? Maak'a' chik junaq aj kolonel, ka'ajin wi' ut maak'a' chik junaq”.

Isaías 61:10

K'ajo' naq nasaho'k linch'ool rik'in li Qaawa', jwal nim li xsahil li waanm rik'in linYos, xb'aan naq xinxtiqib' rik'in li xkolom ut xinxlan rik'in li xtiikilal jo' rik'in junaq b'aatal, kama' li b'eelomej naxk'e li xkoroon chi xjolom ut li ixaqilb'ej naxtiqib' rib' rik'in li xchaq'alil ru q'ol.

Isaías 62:11

K'ehomaq reetal naq li Qaawa' kixpuktesi resil a'in toj sa' xmaril li ruuchich'och': “Yehomaq re li tenamit Sión: Il, we' chaq laj Kolol aawe rochb'een chaq li xkolom, k'amolb'e chaq chiru li xq'ajkamunkileb' li ak xkoleb'”.

Jeremías 3:21

“Na'ab'imank xyaab' kuxej sa' xb'eeneb' li t'ojoch aj tzuul: a'aneb' laj Israel li yookeb' chi yaab'ak re xtz'aamankil xkuyb'al xmaakeb'. Xe'xjal xb'eheb' ut xinsachk sa' xch'ooleb'; xine'xtz'eqtaana laa'in li Qaawa', li xYoseb'.

Ezequiel 23:35

“Jo'kan naq laa'in, li Qaawa', ninye chi jo'ka'in: Sa' xk'ab'a' naq xinaatz'eq chirix laach'ool ut xinaakanab', jo'kan naq taatoj rix laamaa'usilal ut laayib' aj b'aanuhom”.

Joel 1:17

Xe'q'aaje'k li iyaj sa' li ch'och', maak'a' chik li triiw ut xe'juk'manje'k li xk'uuleb'aaleb'.

Ezequiel 22:12

Wankeb' neke'tuminaak ru chi xkamsinkileb' li poyanam, ut numtajenaq ral li to' tumin neke'xpatz'; neke'xtawasi eb' li ras riitz'ineb' ut neke'xmaq' sa' josq'il li k'a'aq ru reheb', ut xine'xtz'ek laa'in chirix xch'ooleb' -chan li Qaawa'-.