Deuteronomio 7:9 - Q'eqchi Bible

⁹ K'e b'i' sa' xnaq' aawu naq li Qaawa' laaYos a'an tz'aqal Yos, a' li Yos tiik xch'ool li naxpaab' li xSumwank ut junelik wank li xrahom rik'ineb' li neke'rahok re ut neke'xpaab' li xchaq'rab'.

Li Santil hu

⁹ Joꞌcan nak chenauhak nak li Ka̱cuaꞌ le̱ Dios, aꞌan li tzꞌakal Dios. Aꞌan cha̱bil ut ti̱c xchꞌo̱l chixba̱nunquil li cꞌaꞌru naxyechiꞌi ut naruxta̱na ruheb li nequeꞌrahoc re li Dios ut nequeꞌxba̱nu li cꞌaꞌru naxye toj saꞌ xnabalil xtasalil li ralal xcꞌajol.

Deuteronomio 7:9 ပူးပေါင်းရင်းမြစ်များ

Hebreos 10:23

Qachapaq qib' chi kaw rik'in li qoyb'enihom li naqach'olob', xb'aan naq li Yos naxk'e li b'arwan naxyeechi'i.

2 Timoteo 2:13

Wi ink'a' tiik qach'ool chirix, a'ut A'an junelik tiik xch'ool xb'aan naq ink'a' naru tixq'et rib'.

2 Ts 3:3

Tiik xch'ool li Qaawa'; ut a'an tixk'e xkawub' eech'ool ut texxkol chiru li maa'us.

Daniel 9:4

Kinxooto li qamaak chiru li Qaawa' linYos ut kinye re: «At Qaawa', at Nimajwal Yos nim aawankil, laa'at junelik nakapaab' laaSumwank ut nakak'ut naq xaqxo laarahom rik'ineb' li neke'rahok aawe ut neke'xpaab' laachaq'rab'.

1 Corintios 1:9

Li Yos junelik naxk'e li naxyeechi'i, ut a'an ajwi' li xb'oqok chaq eere chi wank sa' junajil rik'in li Ralal, a' li Jesukriist li Qaawa'.

Nehemías 1:5

Ut kinye re: “At Qaawa', at Eechal re li choxa, laa'at li Nimajwal Yos ut xiwajel aawu! Junelik wank sa' laach'ool li loq'laj sumwank ut laarahom cho'q reheb' li neke'rahok aawe ut neke'xpaab' laachaq'rab'.

1 Ts 5:24

Chaab'il A'an li nab'oqok eere, ut tixb'aanu chixjunil a'in.

Romanos 8:28

Naqanaw ajwi' naq li Yos na'okenk re naq chixjunil taakanaaq cho'q usilal cho'q reheb' li neke'rahok re, a' li b'oqb'ileb' jo' chanru rajom li xch'ool.

Deuteronomio 5:10

ab'anan nawuxtaana ru chi junelik eb' li neke'rahok we ut neke'xpaab' linchaq'rab'.

1 Juan 1:9

Ab'an wi naqaxooto li qamaak, li Yos chaab'il ut tiik xch'ool chi xkuyb'al xsachb'al qamaak ut chi qach'ajob'resinkil chiru chixjunil qamaa'usilal.

Isaías 49:7

A'in xyehom li Qaawa', laj Kolonel ut li xSant laj Israel; jo'ka'in kixye re li jun li jwal tz'eqtaananb'il. A'in xyehom li Yos re li jun majewanb'il sa' xyanqeb' chixjunileb' li tenamit, re li wank chi munil rub'el xwankileb' li josq' aj rahob'tesinel: “Naq eb' li awab'ej ut eb' li xninqal ru winq te'ril aawu, te'xaqliiq ut te'xk'utzub' rib' chawu, xb'aan naq laa'in li Qaawa', li xSant laj Israel: laa'in xinsik'ok aawu ut ninb'aanu li k'aru ninyeechi'i”.

Santiago 1:12

Us xaq reheb' li neke'xkuy li yale'k! Xb'aan naq, chirix xq'axb'al ru a'an, te'xk'ul xq'ajkamunkileb', a' li yu'am yeechi'inb'il chaq xb'aan li Qaawa' reheb' li neke'rahok re.

2 Corintios 1:18

Naxnaw chi us li Yos naq li aatin naqaye eere maawa' xb'enwa “yaal” ut chirix a'an “ink'a'”.

Éxodo 20:6

ab'anan nawuxtaana ru chi junelik eb' li neke'rahok we ut neke'xpaab' linchaq'rab'.

Génesis 17:7

Tink'ojob' chi junajwa linSumwank aawik'in, jo' ajwi' rik'ineb' laawalal aak'ajol li te'wanq moqon. Laa'inaq laaYos ut xYoseb' ajwi' laawalal aak'ajol chi junelik.

Hebreos 6:18

re naq, sa' xk'ab'a' li raatin jo'wi' li xjurament li ink'a' naru xjalb'al ru chi moko naru natik'ti'ik wi' li Yos, chiwanq xnimal xkawub' qach'ool chi reechaninkil li qamaatan naqoyb'eni laa'o, a'an li qayo'oon rik'in li Yos.

Salmos 119:75

At Qaawa', ch'olch'o chiwu naq nakatraqok aatin sa' tiikilal ut wank xyaalal naq nikinaarahob'tesi.

Hebreos 11:11

Sa' xk'ab'a' ajwi' li xpaab'aal lix Sara, us ta ak xnume'k xq'ehil, kixk'ul xwankil re wank chi na'b'ejil, xb'aan naq naxnaw naq paab'ajel li kiyeechi'ink re.

Deuteronomio 4:35

“Aawe laa'at xk'e rilb'al chixjunil a'an re naq taanaw naq li Qaawa' a'an tz'aqal Yos, ut maak'a' chik junaq chiru A'an.

Tito 1:2

li nawank sa' xk'ab'a' li loq'laj royb'eninkil li junelik yu'am. Li Yos ink'a' natik'ti'ik, kixyeechi'i chaq li yu'am a'an najter q'e kutan,

1 Corintios 10:3

ut chixjunileb' ke'tzekank rik'in jun chi musiq'ejil tzekemq.

1 Corintios 8:3

Ab'anan li narahok re li Yos, a'an nawno ru xb'aan li Yos.

1 Crónicas 16:15

Junelik wank sa' xch'ool li xloq'laj Sumwank ut li xyeechi'om kixb'aanu reheb' li k'iila teep chi riyajil li tenamit,

Lamentaciones 3:23

Rajlal eq'la na'ak'o'k li xrahom: k'ajo' xnimal li xtiikilal xch'ool!

Salmos 146:6

a'an laj winqob'resihom re choxach'och', a'an kiyiib'ank re li palaw ut chixjunil li wank chisa'. Li Qaawa' wank sa' tiikilal chi junelik.

Génesis 9:15

ut taajultiko'q we li Sumwank xink'ojob' eerik'in ut rik'in chixjunileb' li xul, rik'in chixjunil li wank xyu'am sa' ruuchich'och': ink'a' chik taawanq b'ut'iha' re xsachb'al chixjunileb' li wankeb' xyu'am.

Génesis 28:15

K'e reetal, laa'in wankin aawik'in. Tatinkol yalaq b'ar tatxik, ut tatinsutq'isi chaq sa' li na'ajej a'in. Ink'a' tatinkanab' toj reetal tinb'aanu li xinyeechi'i aawe”.

Números 14:18

Li Qaawa' jwal timil najosq'o'k ut q'axal nim xchaab'ilal li xch'ool. Naxkuy li maa'usilal ut li q'etq'etil, us ta ink'a' naxkanab'eb' yal chi jo'kan li wankeb' xmaak, naxk'e b'an chi xtojb'al rix xmaak li yuwa'b'ej sa' xb'eeneb' li alal k'ajolb'ej toj sa' li rox ut xka xteepal riyajil li tenamit.

Deuteronomio 4:39

“Jo'kan utan, wanq sa' aach'ool sa' li kutan a'in ut chak'oxla chi junelik naq li Qaawa' a'an Yos jo' sa' choxa jo' sa' ruuchich'och', ut maak'a' chik junaq chiru.

Deuteronomio 32:4

A'an li qaSaqoonak; tz'aqal re ru jo'nimal naxb'aanu; chixjunil li xk'uub'ahom a'an tiikilal. A'an jun Yos tiik xch'ool, li ink'a' nab'alaq'ik; a'an paab'ajel ut jwal chaab'il.

Jueces 2:1

Naq li x'ánjel li Qaawa' ki'elk chaq Kilkal ut koho Betel, kixye reheb' laj Israel: “Laa'in kin'isink chaq eere Ejiipt ut kexwoksi sa' li ch'och' inyeechi'om reheb' leena' leeyuwa' naq kinye reheb': «Maajaruj tinq'et linSumwank eerik'in.

1 Reyes 8:23

ut kixye: “At Qaawa', xYos laj Israel, maak'a' chik junaq Yos jo' laa'at taqe'q sa' choxa, chi moko taq'a sa' ruuchich'och'. Laa'at tiik aach'ool chirix laaSumwank ut chaab'ilat rik'ineb' laj k'anjel chawu li nakate'xpaab' chi anchaleb' xch'ool.

2 Crónicas 6:14

“At Qaawa', xYos laj Israel, maak'a' chik junaq Yos jo' laa'at sa' choxa, chi moko sa' ruuchich'och'. Laa'at tiik aach'ool chirix laaSumwank ut chaab'ilat rik'ineb' laj k'anjel chawu li nakate'xpaab' chi anchaleb' xch'ool.

Salmos 103:18

cho'q reheb' li neke'paab'ank re li xsumwank, eb' li wank sa' xch'ooleb' xpaab'ankil li xchaq'rab'.

Salmos 105:8

Junelik wank sa' xch'ool li xloq'laj Sumwank ut li xyeechi'om kixb'aanu reheb' li k'iila teep chi riyajil li tenamit,

Jeremías 32:18

Laa'at nakawuxtaana ruheb' li k'iila o'q'ob' chi poyanam, ab'anan nakarahob'tesiheb' ajwi' eb' li winq xb'aan li xmaakeb' li xna' xyuwa'eb'. At Nimajwal Yos li rajawal kaw aawib'; laak'ab'a' laa'at a'an Nimajwal Yos!

Deuteronomio 32:39

Chek'e reetal naq laa'in injunes wib' ut maak'a' chik junaq yos chiwu laa'in. Nink'ehok chi kamk ut nink'e ajwi' li yu'am, nintiq'ok ut nink'irtasink. Maajun tixkol rib' chiru linwankil.

Jueces 5:31

“Jo'ka'in taxaq naq che'oso'q chixjunileb' li xik' neke'ilok aawe, at Qaawa'. Ut eb' li neke'rahok aawe, chanchanaqeb' taxaq li saq'e naq nalemtz'unk chaq wa'leb'!”. Ut li tenamit ke'wank sa' tuqtuukilal chiru ka'k'aal chihab'.

Nehemías 9:32

“Jo'kan utan, at Qaawa', at qaYos nim aawankil ut xiwajel aawu, li junelik nakapaab' li sumwank ut laarahom, k'e reetal chixjunileb' li rahilal ke'chalk sa' qab'een, sa' xb'eeneb' li qa'awab'ej ut eb' laj k'amol qab'e, eb' laj tij ut eb' li propeet, sa' xb'eeneb' li qana' qayuwa' ut chixjunil li qatenamit, chalen sa'eb' li kutan naq ke'wank li awab'ej re Asiria toj anaqwan.

Salmos 36:6

At Qaawa', toj sa' choxa nawulak laarahom, toj sa'eb' li choql nawulak xnimal laachaab'ilal;