Daniel 12:3 - Q'eqchi Bible

³ Eb' li wankeb' xna'leb', li ke'k'utuk re li tiikil ch'oolej chiruheb' li k'iila tenamit, te'lemtz'uno'q jo' li saqenk sa' choxa ut jo'kaqeb' li chahim chi junelik.

Li Santil hu

³ Ut eb li cuanqueb xnaꞌleb, li queꞌcꞌutuc re li ti̱quilal chiruheb li tenamit, teꞌqꞌuehekꞌ xlokꞌal chi junelic. Chanchanakeb li sakꞌe ut li chahim li nalemtzꞌun chiru li choxa.

Daniel 12:3 ပူးပေါင်းရင်းမြစ်များ

San Mateo 13:43

Toja' naq eb' li tiikeb' xch'ool te'lemtz'unq ruheb' kama' li saq'e, sa' li xnimajwal awab'ejihom li xYuwa'eb'. Ani wank xxik, chi'ab'inq.

Proverbios 4:18

Li xyu'ameb' li tiikeb' xch'ool a'an chanchan xsaqenkil li hik'e'k: na'ok chi lemtz'unk toj reetal nakutano'k ru sa' wa'leb'.

Daniel 11:33

Eb' laj k'amol b'e li wankeb' xna'leb' te'xtzol naab'aleb' li poyanam, ab'anan ink'a' najtaq chik wankeb' te'kamsiiq, wankeb' te'k'atje'q, wankeb' te'isiiq sa' li xna'ajeb' ut wankeb' chik te'elq'aaq li xjunqkab'al.

Daniel 11:35

Wankeb' aj k'ehol xna'leb' li tenamit te'kamsiiq, ab'an yal re xyalb'aleb' rix li junch'ol chik, re xch'ajob'resinkil xna'leb'eb' ut xsaab'esinkileb' li xkomon, toj sa' roso'jikeb' li kutan li ak xaqxo xb'aan li Qaawa'.

Proverbios 11:30

Li tiikilal nak'ehok yu'am; wi wank aana'leb', jalaneb' chik te'taaqenq aawe.

Hebreos 5:12

Laa'ex aj tzolonelex raj chik anaqwan xb'aan naq ak k'iila kutan chik eerokik; ab'an aajel ru naq toj taak'ute'q wi' chik cheru li na'leb' xetzol sa' xtiklajik chirix li Raatin li Yos; toj tento taak'eemanq eere li q'unil tzekemq ut ink'a' li kawil tzekemq.

San Juan 5:35

Laj Jwan a'an chaq li saqenk lochlo li nakutanob'resink, ut laa'ex xeraj saho'k jun k'amokaq rik'in li xsaqenk.

San Juan 4:36

Laj q'olonel naxk'ul li xtojb'al ut naxxok ru li awimq re li junelik yu'am; jo'kan naq laj awinel ut laj q'olonel neke'saho'k sa' xch'ool chi xkab'ichaleb'.

1 Corintios 3:10

Jo' chanru linmaatan k'eeb'il we xb'aan li Yos, laa'in xink'e li rub'elankil li kab'l, jo' chaab'il aj jolominel re li kab'lak, ut jalan chik nakab'lak sa' xb'een. Ab'an chirilaq li junjunq chanru yo chi kab'lak,

Jeremías 23:22

Wi ta neke'xnaw k'aru ink'uub'ahom, a' raj lintenamit koheb' wi' chi xyeeb'al li waatin; a'aneb' raj li ke'sutq'isink reheb' wik'in re naq te'xkanab' xb'aanunkil li maa'usilal.

Apocalipsis 1:20

A'an a'in xyaalalil li tz'aptz'ookil na'leb' chirix li wuqub' chi xna'aj kanteel oor: li wuqub' chi chahim a'aneb' li x'ánjel li wuqub' chi Iklees, ut li wuqub' chi xna'aj kanteel a'aneb' li wuqub' chi Iklees.

2 Pedro 3:15

Chek'oxla naq li xnimal xkuyum li Qaawa' a'an leekolb'al. A'an ajwi' kixtz'iib'a eerik'in laj Pablo, li qech aj paab'anelil raaro qab'aan, jo' chanru li na'leb' k'eeb'il chaq re xb'aan li Yos.

Efesios 4:11

Ut A'an wan ajwi' kixxaqab'eb' cho'q apóstol; wankeb' cho'q propeet; wankeb' cho'q aj puktesinel li Chaab'il Esilal; wankeb' chik cho'q aj k'aak'alenel ut aj tzolonel.

San Mateo 24:45

“Ani li moosej tiik xch'ool ut wank xna'leb' li kik'ehe'k xwankil xb'aan laj eechal re sa' xb'eeneb' li rech moosil re xk'eeb'al xwaheb' sa' xq'ehil?

San Mateo 19:28

Kixye li Jesus reheb': —Relik chi yaal ninye eere naq sa' li ak' ruuchich'och', naq taak'ojlaaq li K'ajolb'ej sa' li xloq'laj k'ojarib'aal, laa'ex ajwi' li xextaaqenk we texk'ojlaaq sa' kab'laju chi k'ojarib'aal ut texraqoq aatin sa' xb'eeneb' li kab'laju xteepal aj Israel.

Hechos 13:1

Sa' li Iklees li wank Antiokía wankeb' propeet ut aj tzoloneleb': laj Bernabé, laj Simehón, aj Niger nayeemank re, laj Lucio aj Sirene, laj Manahén li kik'iiresiik rik'in laj Herodes li awab'ej, ut laj Sawlo.

Proverbios 3:35

Eb' li wankeb' xna'leb' te'reechani li loq'al; ab'an tz'eqtaananb'ilaqeb' li maak'a'eb' xna'leb'.

Isaías 53:11

Sa' xk'ab'a' li k'iila rahilal kixk'ul taaril li saqenk ut taak'ojlaaq li xch'ool. Rik'in li xnawom, laj K'anjel chiwu naab'aleb' tixtiikob'resiheb' xch'ool, xb'aan naq xriiqani li xmaakeb' a'an.

Daniel 12:10

Naab'aleb' li te'yale'q rix ut te'ch'ajob'resiiq xb'aan li Yos. Eb' li yib'ru xna'leb'eb' toj yooqeb' chi xb'aanunkil li maa'usilal, chi maajun taatawoq xyaalal; ab'anan li wankeb' xchoxahil na'leb' te'xtaw ru.

Éxodo 34:35

ut eb' laj Israel neke'ril naq nalemtz'unk li xnaq' ru. Chirix chik a'an laj Moisés naxmuq wi' chik li xnaq' ru, tojo' re naq na'ok wi' chik chi raatinankil li Qaawa'.

Jueces 5:31

“Jo'ka'in taxaq naq che'oso'q chixjunileb' li xik' neke'ilok aawe, at Qaawa'. Ut eb' li neke'rahok aawe, chanchanaqeb' taxaq li saq'e naq nalemtz'unk chaq wa'leb'!”. Ut li tenamit ke'wank sa' tuqtuukilal chiru ka'k'aal chihab'.

Eclesiastés 12:9

Laj Ch'olob'anel a'an jun li winq kiwank xna'leb' ut kixtzoleb' chi us li tenamit. Kixk'e xch'ool chi xtz'ilinkil rix ut xtawb'al xyaalal chixjunil. Kixtz'iib'a ajwi' naab'al li tustuukil na'leb'.