Apocalipsis 15:4 - Q'eqchi Bible

⁴ Ani ink'a' tixxiwa ut ink'a' tixnima ru laak'ab'a', at Qaawa'? Xb'aan naq ka'jat wi' laa'at santat, ut chixjunileb' li tenamit talaje'chalq ut te'xhupub' rib' chawe chawu, xb'aan naq xe'kanaak chi kutankil laaninqal k'a'uxl”.

Li Santil hu

⁴ ¿Ma cuan ta biꞌ junak incꞌaꞌ tixxucua a̱cuu? Chixjunileb teꞌxnima a̱cuu, at Ka̱cuaꞌ, xban nak caꞌaj cuiꞌ la̱at ti̱c a̱chꞌo̱l. Chixjunileb li cuanqueb saꞌ li xni̱nkal ru tenamit teꞌcha̱lk ut teꞌxcuikꞌib ribeb cha̱cuu ut tateꞌxlokꞌoni xban nak teꞌxqꞌue retal nak la̱at tatrakok a̱tin saꞌ ti̱quilal.

Apocalipsis 15:4 ပူးပေါင်းရင်းမြစ်များ

Salmos 86:9

At Qaawa', laa'at xayiib' chixjunileb' li tenamit, ut eb' a'an tule'xwiq'ib' rib' chawu: te'chalq chi xk'eeb'al xloq'al laak'ab'a'.

Malaquías 1:11

“Sa' chixjunileb' li tenamit chalen sa' releb'l saq'e toj sa' rokeb'l jwal nim link'ab'a' ut yalaq b'ar nayeechi'imank k'ajpom ut mayej li ink'a' muxb'il ru, sa' ink'ab'a'. Xb'aan naq eb' li jalan tenamit neke'xk'e inloq'al -chan li Nimajwal Yos-.

Jeremías 10:7

Ani ink'a' taaxiwanq aawu, at xReyeb' li xninqal ru tenamit? Relik chi yaal naq aak'ulub' naq xiwanb'ilaq aawu. Sa' xyanqeb' chixjunileb' li wankeb' xna'leb' ut sa' xyanqeb' li awab'ej sa' ruuchich'och' maajun chik wank jo' laa'at, at Qaawa'.

Salmos 22:27

Te'tzekanq li neb'a' ut taak'ojlaaq xch'ooleb'; eb' li neke'sik'ok re li Qaawa', te'xnima ru ut najtaq roq li xyu'ameb'.

Apocalipsis 11:15

Li xwuq ánjel kixyaab'asi li xtronpeet, ut ke'ab'iik sa' choxa xyaab' kuxej q'axal kaw, yookeb' chi xyeeb'al: “Ak xk'ulunk li x'awab'ejihom li Qaawa': li qaYos ut li xKriist te'taqlanq sa' xb'een li ruuchich'och', ut te'awab'ejinq chi junelik q'e kutan”.

Apocalipsis 14:7

Ut a'an kixye chi kaw xyaab' xkux: “Chexiwa ru li Yos ut chek'e xloq'al xb'aan naq xtaw xq'ehil naq taaraqoq aatin; cheloq'oni li kib'aanunk re li choxach'och', li palaw ut eb' li yo'leb'aal ha'”.

Zacarías 14:16

Chirix chik a'an chixjunileb' li te'kole'q sa'eb' li tenamit li ke'yalok rik'in Jerusalén, rajlal chihab' te'chalq chi xloq'oninkil ru li Awab'ej, a' li Nimajwal Yos, jo'wi' re xninq'ehinkil li xNinq'eheb' li Muheb'aal.

Isaías 25:3

Jo'kan naq jun tenamit jwal kaw rib' neke'xk'e aaloq'al, ut eb' li poyanam li jwal josq'eb' neke'xxiwa aawu.

Isaías 45:23

Sa' xk'ab'a' linloq'al xinye injurament, sa' we x'elk li tz'aqal yaal, jun li aatin xaqxooq xwankil chi junelik: «Chixjunileb' te'xwiq'ib' rib' chiwu, chixjunileb' te'yehoq jurament

Apocalipsis 4:8

Li kaahib' chi yo'yookeb' wankeb' waqitq xik' ut nujenaqeb' chi xsa' uhej chi junqre ut chisa'; chi q'eq ut chi kutan ink'a' neke'hilank chi xyeeb'al: “Sant, Sant, Sant li Qaawa', li Nimajwal Yos, li ak wan chaq, li wank anaqwan ut li chaalel”.

1 Pedro 1:16

xb'aan naq tz'iib'anb'il sa' li Santil Hu: “Santaqex xb'aan naq santin laa'in”.

Zacarías 2:11

Sa' li kutan a'an naab'aleb' li tenamit te'chalq wik'in, ut a'anaqeb' ajwi' lintenamit. Ut laa'in tinhilanq sa' eeyanq. Chi jo'kan taanaw naq a' li Nimajwal Yos xtaqlank chaq we aawik'in.

Apocalipsis 16:7

Ut kiwab'i jun xyaab' kuxej sa' li artal yo chi xyeeb'al: “Relik chi yaal, at Qaawa', at Nimajwal Yos, xatraqok aatin sa' tiikilal ut rik'in yaal”.

Apocalipsis 19:2

xb'aan naq naraqok aatin sa' tiikilal ut rik'in yaal: xteneb' tojb'amaak sa' xb'een li xnimal ru aj yumb'eet, a' li xpo'ok ru li ruuchich'och' rik'in li xmuxb'al rib'; ut xk'e reeqaj li xkik'eleb' laj k'anjel li ke'kamsiik xb'aan li ixq”.

Isaías 26:9

Chiru li q'oqyink nawataw wank aawik'in ut toj eq'la nakatinsik' chi anchal inch'ool. Naq nakatraqok aatin sa' ruuchich'och', eb' li poyanam neke'xtzol wank sa' tiikilal.

Salmos 89:7

Aran taqe'q, ani taajuntaq'eetaaq wi' li Qaawa'? Ma wank tab'i' junaq jo' li Qaawa' sa' xyanqeb' li yos?

Romanos 15:9

Kik'ulunk ajwi' re naq eb' li maawa'eb' aj Judiiy te'xnima ru li Yos xb'aan xnimal ruxtaan, jo' naxye li Santil Hu: “A'an aj e naq tinnima aaloq'al sa' xyanqeb' li tenamit, ut tinb'icha laak'ab'a'”.

Oseas 3:5

Ab'anan taawulaq xq'ehil naq eb' laj Israel te'sutq'iiq chaq. Tole'xsik' li Qaawa', li xYoseb', jo' ajwi' laj David, li x'awab'ejeb'. Sa' roso'jikeb' li kutan te'chalq chi siksootqeb' chiru li Qaawa' ut te'xyal wi' chik li rusilal.

Isaías 6:3

Ut neke'xjap re chirib'ileb' rib' chi xyeeb'al: “Sant, Sant, Sant li Qaawa', li Nimajwal Yos. Nujenaq chixjunil li ruuchich'och' rik'in li xloq'al!”, chankeb'.

Salmos 111:9

Kixk'am chaq li kolb'a ib' cho'q re li xtenamit ut kixk'ojob' li xSumwank chi junajwa: q'axal sant ut xiwajel li Qaawa'!

Apocalipsis 6:10

Ut ke'ok chi xjapb'aleb' re chi kaw xyaab'eb' xkux, ut ke'xye: “At santil Eechalinel, laa'at paab'ajelat, toj jo'q'e tatkanaaq chi ink'a' tatraqoq aatin sa' xb'eeneb' li wankeb' sa' ruuchich'och' ut ink'a' taweeqajuniheb' li ke'kamsink qe?”.

Habacuc 1:12

At Qaawa', ma ink'a' tab'i' ak wankat chalen chaq q'e kutan, at inSantil Yos li ink'a' kaamel? At Qaawa' ut aj k'aak'alehomat we, laa'at xatk'ehok xkawilaleb' laj Kaldeha chi raqok aatin sa' qab'een re naq tqatoj rix li qamaak.

Apocalipsis 3:7

“Tz'iib'an rik'in li x'ánjel li Iklees li wank Filadelfia: «A'in naxye li Sant, li Paab'ajel, li wank xlaaw laj David rik'in: naq a'an natehok, maa'ani taaruhanq chi xtz'apb'al; naq a'an natz'apok, maa'ani taaruhanq chi xteeb'al.

Salmos 105:7

Li Qaawa' a'an li qaYos ut na'awab'ejink sa' xb'een chixjunil li ruuchich'och'.

Salmos 99:9

Chenimaaq ru li Qaawa' li qaYos, chehupub'aq eerib' chiru li xloq'laj na'aj: xb'aan naq sant li Qaawa' li qaYos!

Salmos 22:3

At inNa' at inYuwa', chi kutan ninyaab'a laak'ab'a', ut ink'a' nikinaachaq'b'e chaq; jo'kan ajwi' chi q'eq, ut ink'a' nikinaasume.

1 Samuel 2:2

Maak'a' junaq sant jo' li Qaawa', chi moko junaq saqoonak jo' li qaYos. Maa'ani chik junaq jo' A'an.

Isaías 60:5

Naq taawileb' ru, k'ajo' naq taasaho'q laach'ool, kaw tentotq ut k'ojk'ooq laawaanm, xb'aan naq te'xk'am chaq li xb'ihomaleb' li tenamit wankeb' chaq chire li palaw, ut te'xq'axtesi aawe li xsahil eechej eb' li poyanam.

Jeremías 16:19

At Qaawa', laa'at linkawilal ut li xkawub' linch'ool; laa'at nakatkolok we naq wankin sa' rahilal. Toj sa' xkaaxukuutil li ruuchich'och' te'chalq aawik'in chixjunileb' li tenamit ut te'xye aawe: “Relik chi yaal naq junes jalanil yos, maak'a' aj e ut maak'a'eb' xwankil li ke'xloq'oni eb' li qana' qayuwa'.

Isaías 57:15

Xb'aan naq jo'ka'in xyehom li Nimajwal Yos, li nim xwankil, li junelik wank chalen chaq q'e kutan ut li q'axal Sant li xk'ab'a': “Laa'in wankin sa' li na'ajej najt xteram ut jwal loq', ab'anan wankin ajwi' rik'in li ra sa' xch'ool ut li tz'eqtaananb'il, re xk'eeb'al xkawub' xch'ool li kub'enaq xwankil ut li namayok raanm.

Isaías 24:15

Jo'kan ajwi' sa' xjayal releb'l saq'e ut sa'eb' li tenamit wankeb' sa' sutha', taaterq'usiiq xk'ab'a' li Qaawa', li xYos laj Israel.

Salmos 99:5

Chenimaaq ru li Qaawa' li qaYos, chehupub'aq eerib' chiru li xxaqleb'aal. Sant li Qaawa'!

Salmos 97:8

At Qaawa', naq eb' laj Sión ut eb' li tenamit re Judá te'rab'i naq laa'at tiik aach'ool, k'ajo' naq te'saho'q sa' xch'ool ut te'ninq'ehiq.

Salmos 22:23

Tinye resil laak'ab'a' reheb' li was wiitz'in, ut tinnima aawu sa' li loq'laj ch'utam.

Jeremías 5:22

Ma ink'a' nekexiwa wu laa'in? -chan li Qaawa'-. Ma ink'a' teesiksiki eerib' xb'aan eexiw chiwu? Laa'in kink'e li samahib' cho'q xramleb' li palaw, a'an jun nub'ajl li ink'a' naru xq'axb'al. Us ta te'wakliiq li xkawil oq li ha' ut kaw te'eek'anq, ab'an ink'a' te'nume'q sa' xb'een.

Apocalipsis 16:5

Toja' naq kiwab'i li ánjel li wank xwankil sa' xb'eeneb' li ha', kixye: “At qasantil Qaawa', li wankat anaqwan ut li ak wankat chaq, xatraqok aatin sa' tiikilal,

Apocalipsis 19:8

ut xk'ehe'k re li xtiqib'ankil rib' rik'in chaab'il liino saqpotz'in”. Li liino a'an li xchaab'il b'aanuhomeb' li sant.