Abdías 1:21 - Q'eqchi Bible

²¹ Te'numtaaq sa' xb'eeneb' ut te'taqsinq aran Sión re raqok aatin sa' xb'eeneb' li xtzuululeb' laj Esaú, ut a' chik li Qaawa' taa'awab'ejinq.

Li Santil hu

²¹ Ut eb laj Israel li queꞌnumta saꞌ xbe̱neb laj Edom teꞌxic saꞌ li tzu̱l Sión chi takla̱nc saꞌ xbe̱neb li cuanqueb saꞌ xya̱nkeb li tzu̱l saꞌ lix chꞌochꞌ laj Esaú. Ut li Ka̱cuaꞌ, aꞌan ta̱cua̱nk xcuanquil saꞌ xbe̱neb.

Abdías 1:21 ပူးပေါင်းရင်းမြစ်များ

Apocalipsis 11:15

Li xwuq ánjel kixyaab'asi li xtronpeet, ut ke'ab'iik sa' choxa xyaab' kuxej q'axal kaw, yookeb' chi xyeeb'al: “Ak xk'ulunk li x'awab'ejihom li Qaawa': li qaYos ut li xKriist te'taqlanq sa' xb'een li ruuchich'och', ut te'awab'ejinq chi junelik q'e kutan”.

Santiago 5:20

chenawaq a'in: li xsutq'isink chaq re junaq aj maak li yo chi sachk, tixkol a'an chiru li kamk, ut k'ajo' xk'ihal li maak tixtz'ap ru!

Zacarías 14:9

Ut li Qaawa' taa'awab'ejinq re chixjunil li ruuchich'och'. Sa' li kutan a'an junaq ajwi' li Qaawa' ut junaq ajwi' li xk'ab'a'.

Daniel 7:27

Toja' naq li awab'ejihom, li wankilal ut li xnimal loq'al junsut junrub'el choxa taaq'axtesimanq reheb' li sik'b'ileb' ru xb'aan li Nimajwal Yos. Li x'awab'ejihomeb' taawanq chi junelik, ut chixjunileb' li wankeb' xwankil te'k'anjelaq ut te'paab'anq chiruheb'».

1 Timoteo 4:16

Chawilaq aawib' ut chak'e reetal chi us li k'aru yookat chi xk'utb'al; jiiq'aq aach'ool chi xb'aanunkil a'an: wi jo'kan taab'aanu, taakol aawib' laa'at jo'eb' ajwi' li te'ab'inq aawe.

Salmos 22:28

Jo'k'ihal li wankeb' junsut junrub'el choxa te'jultiko'q reheb' ut te'sutq'iiq rik'in li Yos. Chiru A'an te'xwiq'ib' rib' chixjunileb' li tenamit sa' ruuchich'och'.

San Lucas 22:30

re naq texwa'aq tex'uk'aq chire linmeex sa' linnimajwal wankilal ut texk'ojlaaq sa'eb' li k'ojarib'aal chi raqok aatin sa' xb'eeneb' li kab'laju xteepal aj Israel”.

Daniel 2:44

“Chiru li xyu'amileb' li awab'ej a'an, li xYos li choxa tixwaklesi chaq jun awab'ejihom li maajun wa taajuk'manq, chi moko taakanaaq rub'el xwankil jalan chik tenamit. Tixjuk'i ut tixputz'iheb' li awab'ejihom junch'ol, ut a'an wanq xwankil chi junelik.

Isaías 19:20

A'anaq jun reetalil ut xpatz'b'al li Nimajwal Yos sa' xyanqeb' laj Ejiipt. Naq te'xpatz' xkolb'aleb' sa' ruq'eb' li neke'rahob'tesink reheb', li Qaawa' tixtaqla chaq jun aj kolonel li taatenq'anq reheb' ut tixkoleb'.

Jueces 2:16

Toja' naq li Qaawa' kixwaklesiheb' aj k'amol b'e li ke'xkol li tenamit sa' ruq'eb' laj elq'.

Apocalipsis 20:4

Moqon kiwileb' li k'ojarib'aal, b'arwi' ke'k'ojlaak eb' li ke'k'ehe'k xwankil chi raqok aatin. Kiwil li raanmeb' li ke'ch'ote'k xjolom sa' xk'ab'a' Raatin li Yos jo'wi' xb'aan naq ke'xch'olob' resil li Jesus, ut kiwil chixjunileb' li ink'a' ke'xloq'oni li josq' aj xul chi moko li xjalam u: eb' li ink'a' xk'ulumeb' li reetalil chi xpeekemeb' malaj chi ruq'eb'. Eb' a'in ke'wakliik wi' chik chi yo'yo ut ke'awab'ejink rochb'een li Kriist chiru jun mil chihab'.

Apocalipsis 19:6

Ut kiwab'i jo' xyaab' xkux xiikileb' li poyanam, chanchan xyaab' k'iila ha' ut xyaab' kawil kaaq, yookeb' chi xyeeb'al: “Aleluya! Li Qaawa', li qaNimajwal Yos x'ok chi awab'ejink.

San Mateo 6:13

Ut moohaakanab' chi t'ane'k sa' li aaleek, choohaakol b'an chiru li maa'us».

San Mateo 6:10

chichalq ta laanimajwal awab'ejihom, chi'uxq ta laawajom arin sa' ruuchich'och' jo' sa' choxa.

Joel 2:32

Ab'anan chixjunileb' li te'yaab'anq re xk'ab'a' li Qaawa', te'kole'q, xb'aan naq sa' li tzuul Sión ut Jerusalén taawanq li kolb'a ib', jo' kixye li Qaawa'. Jo'k'ihaleb' li sik'b'ileb' ru xb'aan li Qaawa' te'kole'q.

Daniel 12:3

Eb' li wankeb' xna'leb', li ke'k'utuk re li tiikil ch'oolej chiruheb' li k'iila tenamit, te'lemtz'uno'q jo' li saqenk sa' choxa ut jo'kaqeb' li chahim chi junelik.

Daniel 7:14

Ut kik'ehe'k xwankil, xloq'al ut x'awab'ejihom, ut chixjunileb' li tenamit, eb' li poyanam li jalan jalanq li raatinob'aaleb' ke'ok chi k'anjelak chiru. Li xwankilal wanq chi junelik ut ink'a' taa'oso'q; ut li x'awab'ejihom maajoq'e taasachmanq.

Daniel 2:35

Kijuk'e'k chixjunil li jalam u ut kixk'aji rib': li ch'iich' ut li seb', li q'anch'iich', li plaat ut li oor chanchan junes chaqik'im sa' saq'ehil naq xkanaak, ut xk'ame'k chixjunil xb'aan li iq' chi ink'a' xkanaak reetalil. Ab'an li pek li xjuk'uk re li jalam u, xkanaak cho'q nimla tzuul ut xram ru chixjunil li ruuchich'och'.

Salmos 102:15

Eb' laj k'anjel chawu k'ajo' naq neke'xra eb' li pek kab'lanb'il wi', ut neke'raho'k sa' xch'ool chi rilb'al li xpo'lemil laatenamit.

2 Reyes 13:5

Toja' naq li Qaawa' kixxaqab' jun aj kolol reheb' sa' ruq'eb' laj Aram, ut eb' laj Israel ke'wank wi' chik sa' rochocheb' jo' chaq junxil.

Jueces 3:9

Toja' naq eb' laj Israel ke'xyaab'a xk'ab'a' li Qaawa' ut A'an kixwaklesi jun aj k'amol b'e re taakoloq reheb' chiruheb' li xik' neke'ilok reheb': a' laj Otoniel, ralal laj Kenás ut riitz'in laj Kaleb.

Nehemías 9:27

Jo'kan naq kaq'axtesiheb' sa' ruq'eb' li xik' neke'ilok reheb' ut naab'al li rahilal ke'xk'ul. Moqon chik, naq yo xrahob'tesinkileb', ke'xjap reheb' re xtz'aamankil xtenq'ankileb' aawe, ut laa'at toj sa' choxa kawab'iheb' chaq: sa' xk'ab'a' xnimal laawusilal kataqlaheb' winq li ke'kolok reheb' sa' ruq'eb' laj rahob'tesinel.

Salmos 47:7

B'ichanqex cho'q re li qaYos, b'ichanqex, b'ichanqex cho'q re laj Eechal qe, b'ichanqex!

Salmos 67:4

At Qaawa', che'b'anyoxinq taxaq chawu li tenamit, che'b'anyoxinq taxaq chawu chixjunileb'!

Génesis 25:23

Ut li Qaawa' kixye re: “Wiib' tenamit wankeb' chaq aawik'in, wiib' amaq' li te'xjek'i rib' naq te'yo'laaq. Li jun taanumtaaq xwankil sa' xb'een li jun chik, ut li asb'ej taak'anjelaq chiru li iitz'inb'ej”.

Salmos 22:29

Xb'aan naq li Qaawa' a'an awab'ej, a'an na'awab'ejink reheb' li tenamit.

Isaías 24:23

Naq li Qaawa', li Nimajwal Yos, taa'awab'ejinq sa' li tzuul Sión ut Jerusalén, li po ut li saq'e te'q'oqyino'q ru ut eb' laj k'amol b'e te'ril li xloq'al li Qaawa'.

Miqueas 4:7

Sa' xyanqeb' li yeq ra'eb' tinkol jun ch'uut li taakanaaq; ut eb' li najt wankeb' chaq tink'uub' junaq kawil tenamit rik'ineb'. Toja' naq tin'awab'ejinq sa' xb'eeneb' aran Sión, chalen anaqwan ut chi junelik.