1 Corintios 14:2 - Q'eqchi Bible

² Xb'aan naq ani na'aatinak sa' jalanil aatin ink'a' naraatinaheb' li tenamit, rik'in b'an li Yos na'aatinak. Maa'ani natawok ru: yo chi xyeeb'al li muqmuukil na'leb' rik'in xwankil li Musiq'ej.

Li Santil hu

² Li ani naa̱tinac saꞌ jalanil a̱tin incꞌaꞌ naa̱tinac riqꞌuin li rech cristianil. Riqꞌuin ban li Dios naa̱tinac. Ut ma̱ ani nataꞌoc ru li cꞌaꞌru naxye. Riqꞌuin xcuanquil li Santil Musikꞌej naxye lix ya̱lal li incꞌaꞌ natauman ru.

1 Corintios 14:2 ပူးပေါင်းရင်းမြစ်များ

San Marcos 16:17

A'aneb' a'in li eetalil li taak'utunq rik'ineb' li te'paab'anq: sa' ink'ab'a' te'isinq maa'us aj musiq'ej, te'aatinaq sa' jalan aatinob'aal,

Hechos 19:6

Ut naq laj Pablo kixk'e li ruq' sa' xb'eeneb', kichalk li Santil Musiq'ej sa' xb'eeneb' ut ke'ok chi aatinak sa' jalan jalanq aatinob'aal, jo'eb' li propeet.

Hechos 10:46

xb'aan naq neke'rab'i chi aatinak sa' jalanil aatinob'aal ut chi xnimankil ru li Yos.

1 Corintios 13:2

Wi wank ta inmaatan re aatinak jo' propeet, wi ninnaw ta chixjunileb' li xmuqmuukil na'leb' li Yos ut chixjunil li k'a'uxl, wi ta tz'aqlojenaq ru linpaab'aal re xjalb'al xna'aj eb' li tzuul, ab'anan wi ink'a' ninrahok, maak'a' nin'ok wi'.

1 Corintios 2:10

Chixjunil a'an kik'utb'esiik chiqu xb'aan li Yos sa' xk'ab'a' li Musiq'ej, ut li Musiq'ej chixjunil nalajxtz'ili rix, a' ajwi' li xchamal xk'a'uxl li Yos.

Apocalipsis 10:7

Naq taa'ab'imanq li xyaab' xkux li xwuq ánjel ut a'an tixyaab'asi li xtronpeet, toja' naq sa'eb' li kutan a'an taatz'aqloq ru li xtz'aptz'ookil na'leb' li Yos, jo' kixye chaq rik'in chaab'il esilal reheb' laj k'anjel chiru, a'eb' li propeet”.

1 Timoteo 3:16

Relik chi yaal naq q'axal nim li qaloq'laj paab'aal li k'utb'esinb'il chiqu: A'an kixk'utb'esi rib' sa' li qach'och'el qasululel, kixaqab'aak xwankil sa' li Musiq'ej, ki'ile'k xb'aaneb' li ánjel, kipuktesiik resil reheb' li tenamit, kipaab'aak sa' li ruuchich'och' ut kik'ame'k taqe'q sa' xnimal xloq'al.

1 Timoteo 3:9

k'uulanb'ilaq b'an sa' raanmeb' li qaloq'laj paab'aal li k'utb'esinb'il chiqu, ut saqaq ru xch'ooleb'.

Colosenses 2:2

re naq taak'ojlaaq xch'ooleb', junajaq xk'a'uxeb' sa' li rahok, toxe'xtaw li xnimal b'ihomal wank sa' li nawok yaal chi tz'aqal jo'wi' sa' xtawb'al ru li xmuqmuukil na'leb' li Yos, a'an li Kriist.

Efesios 6:19

jo' ajwi' chiwix laa'in, re naq li Yos tixk'e we li loq'laj Aatin li tento xpuktesinkil ut kawaq inch'ool chi xk'eeb'al chi nawe'k li xmuqmuukil yaalal li Chaab'il Esilal.

1 Corintios 15:51

K'ehomaq reetal! Ninye eere jun muqmuukil na'leb': moko chiqajunilo ta tookamq, ab'an chiqajunilo toojalano'q.

1 Corintios 2:7

Nokoo'aatinak chirix xna'leb' li Yos, muqmuukil na'leb' li ink'a' natawmank ru ut kawresinb'il chaq xb'aan li Yos rub'elaj xtiklajik li ruuchich'och' re naq twanq xnimal qaloq'al.

Romanos 16:25

Chiqanima ru li Yos! A'an wank xwankil chi xk'eeb'al xkawub' eech'ool, jo' chanru li Chaab'il Esilal ninjultika ut ninpuktesi chirix li Jesukriist, jo' ajwi' chanru yo chi k'utunk xyaalal anaqwan li choxahil na'leb' tz'aptz'o ru naq kiwank chalen chaq q'e kutan,

Hechos 22:9

Li wankeb' wochb'een ke'ril li saqenk, ab'anan ink'a' ke'rab'i li xyaab' xkux li yo chi aatinank we.

San Marcos 4:11

Ut a'an kixye reheb': “K'eeb'il eere laa'ex xnawb'al xyaalal li muqmuukil na'leb' chirix li xnimajwal awab'ejihom li Yos, ab'an reheb' li junch'ol chik chixjunil nak'eemank sa' jaljookil ru aatin

San Mateo 13:11

Kixsumeheb' ut kixye: “K'eeb'il eere laa'ex xnawb'al xyaalal eb' li muqmuukil na'leb' chirix li xnimajwal wankilal li choxa, ab'an ink'a' k'eeb'il reheb' a'an.

Salmos 78:2

Ok we chi aatinak sa' jaljo ru, ut tinch'olob' chawu li najteril tz'aptz'ookil na'leb'.

Deuteronomio 28:49

Li Qaawa' tixwaklesi chaq sa' aab'een jun li tenamit chalenaq chi najt, toj sa' xmaril chaq li ruuchich'och', kama' naq nachalk li t'iw. Taachalq jun tenamit jalan chik raatinob'aaleb',

Génesis 42:23

Eb' a'an ink'a' ke'xnaw naq laj José naxtaw ru li yookeb' chi xyeeb'al, xb'aan naq wank jun aj jalol ru aatin sa' xyanqeb'.

Génesis 11:7

Tinkub'eeq b'i' ut toxinpo' li raatinob'aaleb', re naq ink'a' chik te'xtaw ru li te'xye chirib'ileb' rib'”.

1 Corintios 14:16

Xb'aan naq wi yooqat chi xnimankil ru li Yos ka'ajwi' rik'in laamusiq', chan put ru naq li yal aj ab'inel tixye: “Jo'kan taxaq”? Ink'a' naxnaw k'aru yookat chi xyeeb'al sa' li yoxink nakab'aanu.

2 Reyes 18:26

Toja' naq laj Eliakín, laj Sebná ut laj Johaj ke'xye re li xnimal ru aj k'anjel aj Asiria: “B'aanu usilal, aatinaho sa' arameo, xb'aan naq naqataw ru. Moohaawaatina sa' hebreo, xb'aan naq chixjunileb' li wankeb' sa' xb'eeneb' li xsuttz'akil li tenamit yookeb' chi ab'ink”.

1 Corintios 12:10

wan chik xmaatani re xb'aanunkil sachb'ach'oolej; wan k'eeb'il xmaatan re aatinak jo' propeet; wan xmaatani xnawb'al ruheb' li musiq'ej; wan ajwi' xmaatani aatinak sa' jalanil aatin li ink'a' natawmank ru; wan chik k'eeb'il xmaatan chi xch'olob'ankil xyaalal eb' li aatin a'in.

1 Corintios 12:28

Jo'ka'in li Yos kixxaqab' xk'anjel li junjunq sa' li Iklees: xb'een xb'een eb' li apóstol, sa' xkab' eb' li propeet; sa' rox eb' laj tzolonel; chirix a'an k'eeb'il li maatan re xb'aanunkil sachb'ach'oolej; chirix chik a'an k'eeb'il li maatan re k'irtasink, re tenq'ank, re jolomink, re aatinak sa' jalanil aatin.

1 Corintios 13:1

Us ta ninnaw raatinob'aaleb' li winq ut eb' li ánjel, ab'anan wi ink'a' ninrahok, chanchanin jun li ch'iich' natzintzotk malaj junaq wajb' natzanb'ak xyaab'.

1 Corintios 14:26

Ex was wiitz'in, a'an a'in li nawaj xyeeb'al eere: naq teech'utub' eerib', li junjunq truuq tixb'icha junaq saalm; truuq ajwi' taak'ehoq na'leb', tixye li k'aru xk'utb'esiik chiru, taa'aatinaq sa' jalanil aatin malaj tixch'olob' xyaalal eb' li aatin a'in. Ab'anan tento naq chixjunil taa'uxmanq re xkab'lankil li komonil.