ZACARÍAS 11:17 - Dios Rimashcata Quillcashcami

¹⁷ ¡Aij, manada ovejacunata shitac, mana vali michiclla! Paipac rigratapish, alli lado ñahuitapish, espadahuan chugrichichun. Paipac rigrapish tucui chaquichun. Alli lado ñahuipish amsayachun» nirca.

ZACARÍAS 11:17 ပူးပေါင်းရင်းမြစ်များ

1 REYES 13:4

Bet-el pueblopi cac altarta Dios urmachinata Diospaclla runa huillashcata uyashpami, jatun mandac Jeroboamca chai altarmanta maquita chutashpaca: «¡Chai runata japichic!» nirca. Ashtahuanpish Diospaclla cac runata chutashpa ricuchishca maquica chaquircami. Shina chaquicpimi, maquitaca ña mana tandai pudirca.

ISAÍAS 29:10

Mandac Diosmi cancunamanca sueñuchic espirituta cacharca. Paimanta huillaccunapac ñahuitaca huichcarcami. Ima tucunata huillaccunapac umataca pañohuanmi taparca.

ISAÍAS 44:10

Maijanpish imatapish yacuyachishpa imamanpish riccha shuc diosta ruhuashcaca, ¿imapactac valin?

ISAÍAS 9:15

Umaca pushac yuyaccuna, alli nishca runacunami. Chupaca llullashpa yachachiccunami.

JEREMÍAS 22:1

Mandac Diosca: «Judá llactata jatun mandacpac huasiman rishpa, caita huillai.

JEREMÍAS 23:1

Mandac Diosca: «¡Aij, ñuca ovejacunata caita chaita cachashpa chingachic michiccunalla!» ninmi.

JEREMÍAS 23:32

Muscushcata llullashpa huillaccunahuanca piñarishcami cani. Paicunaca uyanalla shimicunata parlashpami, ñuca acllashcacunataca pandachin. Ñucaca paicunataca mana huillachun cacharcanichu. Cai gentecunamanca ima allitapish mana ruhuancunachu. Chaitaca Mandac Dios ñucami nini.

EZEQUIEL 13:3

Mandac Diosca: ¡Aij, imatapish mana ricushpa, quiquin yuyaimanta llullashpa huillac, juizhu illac huillaccunalla!

EZEQUIEL 34:2

«Huañunalla runa, Israel michiccuna llaqui tucunata huillashpa, Mandac Diosca: “¡Israel michiccunalla, cancunallami cuidaricunguichic! ¿Manachu michiccunaca ovejacunata cuidana can?

ZACARÍAS 10:2

Yanga dioscunaca llullaccunami. Adivinocunaca llullallatami muscun. Muscushcata huillashpapish, yangallami cushichin. Chaimantami gentecunaca ovejacuna shina, purin. Paicunaca michic illac cashpami, llaquilla causan.

ZACARÍAS 11:15

Chashna ruhuacpimi, Mandac Diosca: «Cunanca, yuyai illac michic ima shina cashcata ricuchi.

SAN MATEO 23:13

¡Mishqui shimi, jayac shungu fariseocunalla, mandashcacunata yachachiccunalla, imachari tucunguichic! Cancunami jahua pacha Dios mandacucman yaicusha niccunata jarcanguichic. Chashnami cancunapish mana yaicunguichic, yaicuchunpish mana saquinguichic.

SAN MATEO 23:16

¡Ñahui mana ricuc pushaccunalla, imachari tucunguichic! Cancunaca: “Diosta mañana huasimanta ari nishpapish mana imachu, ashtahuanpish Diosta mañana huasipi tiyac curimanta ari nishpaca, pactachinatacmi” nishpami yachachinguichic.

SAN JUAN 12:40

«Paicunapac ñahuita huichcarcami. Paicunapac shungutapish sinchiyachircami. Ñahuicunahuan ama ricuchun, paicunapac shungu ama yuyaita japichunmi cashna ruhuarca. Chaimantami ñucapacman mana cutimunga. Paicunataca mana alliyachishachu» nishcami.

SAN JUAN 9:39

Chashna nicpimi Jesusca: —Ñucaca taripangapacmi cai pachaman shamurcani. Ñahui mana ricuccunata alliyachingapac, cutin ricuccunataca ñahui mana ricucta ruhuangapacmi shamurcani— nirca.

ROMANOS 11:7

Shinashpaca, ¿imatatac nishun? Israelcunaca paicuna mashcacushcataca mana japircachu. Ashtahuanpish Dios acllashcacunallami japirca. Shuccunaca rumi shungumi tucurca.

1 CORINTIOS 8:4

Ruhuashcalla dioscunaman animalcunata huañuchishpa, cushca aichata micunamanta nishpaca, ruhuashcalla dioscunaca cai pachapica ima mana canchu, ashtahuanpish shuclla Dios tiyashcatami yachanchic.

1 SAMUEL 2:31

Riqui, cantapish, cambac huasi ucupuracunatapish tucuchina punzhacuna chayamucunmi. Cambac huasi ucupuramantaca pipish yuyaccamanca mana causangachu.