MIQUEAS 1:16 - Dios Rimashcata Quillcashcami

¹⁶ Judá llactalla, cancunapac cuyashca huahuacunamantaca llaquirishpa, acchata ruturichicyari. Cancunahuan causaccunata shuctac llactaman prezu apashcamantaca jatun anga shina, lluchu uma tucuichicyari.

MIQUEAS 1:16 ပူးပေါင်းရင်းမြစ်များ

2 REYES 17:6

Iscun huatata Oseas mandacucpimi, Asiria llactata jatun mandacca Samaria pueblota quichushpa, israelcunatapish Asiria llactaman prezu aparca. Chashna apashpami, Gozán yacu ladopi tiyac Halah, Habor pueblocunapi medocunapac pueblocunapi causachun churarca.

JOB 1:20

Chaicunata uyashpami, Jobca jatarishpa paipac jahualla churanata lliquirishpa, uma acchatapish pitishpa pambacaman cumurishpa Diosta alli nirca.

ISAÍAS 15:2

Dibón llactapi causaccunaca lomacunapi tiyac altarcunapi huacangapacmi llucshirca. Moab llactapi causaccunaca Nebo, Medeba llactacunata tucuchishcamantami caparishpa huacanga. Tucuimi acchata pitishpa barbastapish anchuchinga.

ISAÍAS 22:12

Tucuita Mandac Diosca chai punzhapica yallita llaquirichun, yuyarishpa huacachun, acchata pitirichun, sharpa churanata churarichun cayarca.

JEREMÍAS 16:6

Cai llactapica uchillacunapish, jatuncunapish huañungami. Paicunamantaca pipish mana huacangachu, mana enterrangachu. Shinallatac pipish churanata lliquirishpa, acchata pitirishpa mana llaquiringachu.

JEREMÍAS 4:8

Chaimanta sharpa churanata churarishpa, yallita llaquirishpa, caparishpa huacaichicyari. Mandac Dios ñucaca cancunahuan piñarishcami cani» ninmi.

JEREMÍAS 47:5

Gaza runacunaca llaquirishpami, uma acchata pitinga. Ascalonpi causaccunaca tucuringami. Pugru pambacunapi causaccuna, ¿ima horascamantac quiquin aichata chugriringuichic?

JEREMÍAS 6:26

Chaimantami ñucaca: «Ñuca llactapi causaccunalla, sharpa churanata churarishpa, uchupapi singüichicyari. Shuclla huahua huañushcamanta llaquiric shina, yana churanata churarishpa, caparishpa huacaichicyari. Ñucanchicta tucuchicca ñallami shamunga» nircani.

JEREMÍAS 7:29

Chaimanta cambac acchata pitishpa shitai. Lomacunaman rishpa caparishpa huacai. Mandac Diosta yallita piñachishcamantami huahua huahuacunataca mana ricunayachishpa shitashca.

LAMENTACIONES 2:19

Jatarishpa tuta cuidangapac yaicuna horaspish caparichicyari. Mandac Diospac ñaupapi yacunayaihuan shina, tucui shunguhuan mañaichicyari. Huahuacunaca yarcaihuanmi ñancunapi huañuna shina siricun. Chaimanta paicunaman causaita cuchun, maquita huichaiman chutashpa, Mandac Diosta mañaichicyari.

AMÓS 7:11

Chai Amosca: “Jeroboamtaca espadahuanmi huañuchinga. Israelcunatapish paicunapac llactamanta prezumi apanga” ninmi ningui» nirca.

AMÓS 7:17

Chaimantami Mandac Diosca: “Cambac huarmica caipimi cullquimanta huainayanga. Cambac churicunatapish, ushicunatapish espadahuanmi huañuchinga. Cambac allpatapish chaupingami. Canca juchahuan mapayashca llactapimi huañungui. Israelcunataca paicunapac llactamantami caru llactaman prezu apanga” ninmi— nirca.

AMÓS 8:10

Cancunapac cushicuna fiesta punzhacunataca, llaqui punzhacunatami ruhuasha. Tucui cancunapac cantocunataca huañuipi cantanatami ruhuasha. Sharpa churanatami churachisha. Chashnami llaquirishpa, acchata pitinga. Chaipica, shuclla churi huañushcamanta shinami huacanga. Tucurina punzhaca yalli llaqui punzhacunami canga.

DEUTERONOMIO 28:41

Churicunata, ushicunata charishpapish mana paicunahuan causanguichicchu. Paicunataca shuctac llactacunamanmi prezu apanga.