MALAQUÍAS 4:1 - Dios Rimashcata Quillcashcami

¹ Mandac Diosca: «Rupacuc horno shina punzhami ña chayamucun. Chai punzhapica jatun tucushpa puriccunapish, mana allita ruhuaccunapish chaquishca ucsha shinami rupanga. Chai rupacuc punzha chayamushpami rupachishpa, sapillatapish, shuc ramallatapish mana saquishpa rupachinga.

MALAQUÍAS 4:1 ပူးပေါင်းရင်းမြစ်များ

JOB 18:16

Allpa ucupi sapicuna chaquic shinami, jahuamanca ramacuna pitic shinami canga.

SALMOS 119:119

Tucui cai pachapi causac canta mana cazuccunataca mapata shinami chingachircangui. Chaimantami ima shina causanata can yachachishcataca cuyani.

SALMOS 37:9

Chaica millaicunaca chingachishcami canga. Mandac Diosta shuyaccunaca quiquin allpatami japingacuna.

ÉXODO 15:7

Cambac poderhuanmi canta piñaccunata tucuchircangui. Can piñarishpaca chaquishca pangata shinami tucuchircangui.

ISAÍAS 40:24

Cunanlla plantashca yurata shina, cunanlla tarpushca yurata shina, cunanlla huiñashpa, sapita mana charic yurata huaira huactashpa chaquichic shinami, utca chaquichin. Chaquicpica, acapana huaira shamushpami ucshata shina apan.

ISAÍAS 41:2

¿Pitac jatun mandactaca ricchachishpa, inti llucshina ladomanta pushamurca? Paimanmi tucui llactacunata mandachun cunga. Chashna cucpimi, tucui jatun mandaccunata mandanga. Espadahuanmi ñuto allpata shina ruhuanga. Arcohuanca chaquishca pangata shinami maita shitanga.

ISAÍAS 47:14

Riqui, paicunaca ucsha shinami canga. Paicunataca ninami rupachinga. Chaimantaca mana quishpiri pudingachu. Chai ninaca mana masharingapacchu. Mana cunuringapacchu.

ISAÍAS 5:24

Chaimantami paicunataca nina japirishpa, ucsha, rastrojo shina rupashpa tucuringa. Chashnami sapi ismushca yura shina canga. Sumac sisacuna shina cashpapish, ñuto allpata huaira apashca shinami canga. Chaica paicunallatac tucuita Mandac Dios mandashcata piñashpa, israelcunapac jucha illac Diospac shimita millanayachishcamantami chashnaca tucunga.

ISAÍAS 9:18

Paicuna yallita mana allita ruhuashcaca cardos yuracuna, cashacuna ninapi rupacuc shinami. Sachacunapi nina tiyarishpa, cushni yanayashpa, huaira huichaiman apacuc shinami.

ISAÍAS 9:19

Tucuita Mandac Dios yallita piñaricpimi, cai pachapica nina japirirca. Cai gentecunaca ninata japichina cupa shinami tucurca. Huauquindipurapish mana llaquinacunchu.

EZEQUIEL 20:38

Chashnami cancunapuramantaca ñucata mana cazushpa cariyaccunata anchuchisha. Paicunaca mana Israel llactamanca yaicungacunachu. Shina ruhuacpimi, ñucataca Mandac Dios cashcata yachanguichic.

EZEQUIEL 21:32

Cancunaca nina japichina chaquishca cupa shinami tucunguichic. Cancunapac yahuarca allpa chaupipimi saquiringa. Cancunamantaca ima yuyarinapish mana tiyangachu. Chaitaca Mandac Dios ñucami nini” ninmi ningui» nirca.

EZEQUIEL 24:11

Chushaclla mangataca nina jahuapi churashpami, chai mangapi tiyac mapatapish, yanayashcatapish rupachisha.

EZEQUIEL 34:17

Mandac Dios ñuca cancunamanta rimashpaca: Ñucallatacmi ovejacunataca ovejacunapura, chivocunataca chivocunapura chicanyachishpa taripasha.

EZEQUIEL 7:10

¡Chai punzhaca chayamushcatacmi! Millaita ruhuanapish, jatun tucunapish yallitami mirashca.

JOEL 2:1

Mandac Diosca: «¡Sión urcupi cornetapi tocashpa, caparishpa huillaichicyari!» ninmi. Mandac Dios llaquichina punzhami pactamun. ¡Tucui cai pachapi causaccunapish chucchuichicyari!

JOEL 2:31

Mandac Dios ñuca cachashca jatun mancharina punzha manarac chayamucpimi, intica amsayanga, quillaca yahuar shina tucunga.

AMÓS 2:9

Ñucami amorreocunataca paicunapac ñaupapi tucuchircani. Paicunaca cedro yura shina jatun, encina yura shina sinchimi carca. Shuc yurata pucushcandi, sapindi tucuchic shinami, paicunataca tucuchircani.

ABDÍAS 1:18

Jacobopac huahua huahuacunaca nina shinami canga. Josepac huahua huahuacunaca rupacuc nina shinami canga. Esaupac huahua huahuacunaca ucsha shinami canga. Shina rupachicpica, shucllapish mana saquiringachu. Chaitaca Mandac Dios ñucami nini» ninmi.

NAHÚM 1:10

Quichqui casha yuracuna shina cashpapish, machashca shina cashpapish chaquishca ucsha shinami tucuringuichic.

SOFONÍAS 1:14

Mandac Dios llaquichina punzhami ña shamucun. Chai punzhaca utcami chayamucun. Mandac Dios llaquichicui punzhaca jatun llaqui huacaimi canga. Chai punzhaca yalli sinchi runapish llaquinayaitami caparinga.

SOFONÍAS 1:18

Mandac Dios piñarishpa llaquichi punzhapica paicunapac cullquipish, curipish mana quishpichingachu. Tucui cai pachataca nina japiric shinami tucuchinga. Cai pachapi causaccunataca cungaillami tucuchinga.

ZACARÍAS 14:1

Mandac Dios shamuna punzhami ña pactamun. Cancunamanta imata quichushcataca cancunapac chaupillapitacmi chaupinga.

MALAQUÍAS 3:15

Cunanca, jatun tucushpa puriccunaracmi cushilla causacun. Mana allita ruhuashpa causaccunaracmi sumacta causan. Shinallatac Mandac Diosta mana cazuccunapish sumactami causan” nircanguichicmi» ninmi.

MALAQUÍAS 3:18

Chashna ruhuacpimi, cashcata ruhuac-huan, juchayuc-huan chican cashcata, shinallatac Mandac Dios ñucata servic-huan, mana servic-huan chican cashcata yachanguichic» ninmi.

MALAQUÍAS 3:2

Pai shamucpica, ¿pitac ricuri pudingayari? Pai ricuricpica, ¿pitac paipac ñaupapi shayari pudingayari? Paica chuyayachic nina shina, tacshana lejía shinami.

MALAQUÍAS 3:3

Paimi Levipac huahuacunataca chuyayachinga. Chaimantami curita, cullquita chuyayachic shina, juchacunata anchuchishpa chuyayachingapac tiyaringa. Cullquita ninapi rupachishpa, chuyayachic shinami mapata anchuchinga. Shina ruhuacpimi, cashcata ruhuashpa, Mandac Diosman ofrendata cunga.

MALAQUÍAS 4:5

Mandac Dios ñuca shamuna punzha, jatun mancharina punzha manarac shamucpimi, ñuca ima nishcata huillac Eliastaca cachani.

SAN MATEO 3:12

Paica huairachinahuanmi trigota tamomanta chicanyachic shina ñalla chicanyachinga. Granotaca huacaichinapimi huacaichinga. Cutin tamotaca jaicapi mana huañuc ninapimi rupachinga» nirca.

SAN LUCAS 19:43

Cancunata piñaccuna shamushpa, muyundita jarcashpa shayarina punzhacunami shamun.

SAN LUCAS 21:20

Jerusalén pueblota soldadocuna muyunacushpa shayacucta ricushpaca, tucui chingachishca cashca shinata yachanguichic.

SAN LUCAS 6:23

Cancunata chashna llaquichicpipish, ¡cushicuichiclla! Diosca jahua pachapica, cancuna japina cashcataca achcatami cunga. Dios ima nishcata huillaccunatapish chai shinallatacmi ñaupa taitacunaca llaquichic carca.

2 TESALONICENSES 1:8

Shina shamushpami, ñucanchic Apunchic Jesucristopac alli huillaita mana cazuccunatapish, Diosta mana ricsinata munaccunatapish llaquichinga.

2 PEDRO 3:7

Shina cashpapish jahua pachapi, cai pachapi cunan ima tiyashcacunataca, chai rimashcallahuantacmi ninahuan tucuchingapac Diosca huacaichishpa charicun. Chai ninaca Dios taripashpa millaicunata llaquichina punzhapimi, rupachishpa tucuchinga.