SAN JUDAS 1:12 - Dios Rimashcata Quillcashcami

¹² Paicunaca cancuna tandanacushpa micuicunapica, jatun pinganayaita ruhuashpami mapayachincuna. Paicunapac huicsallata yuyarishpami, pitapish mana manchashpa micuncunalla, ubiancunalla. Paicunaca chaquishca puyuta huaira caiman, chaiman apacuc shinami. Pucuna punzha mana pucuc yura shina, shinallatac ishca cutin huañushca sapimanta pitishca yura shinami cancuna.

Nuevo Testamento en Quichua Cañar 1996

¹² Chashna cashcamantami cancuna tandanacushpa micuicunapica, paicunaca jatun pinganayaita ruhuashpa mapayachincuna. Chashna cashpami paicunapac huicsallata yuyarishpami, pitapish mana manchashpa micuncunalla, ubiancunalla. Paicunaca chaquishca p'uyuta huaira caiman, chaiman apacuc shinami. Paicunaca p'ucuna punzha mana p'ucuc yura shina, shinallatac sapimanta p'itishca yura shina cashpami, ishcai cutin huañushcacuna.

SAN JUDAS 1:12 ပူးပေါင်းရင်းမြစ်များ

2 CRÓNICAS 7:20

ñucami cancunaman cushca llactamanta llucchishpa cachasha. Shinallatac ñuca shutipi mañana ñucapaclla cachun chicanyachishca cai huasitapish ñuca ñaupamanta anchuchishami. Shina ruhuacpimi, tucui llactapi causaccuna parlanacushpa burlashpa asingacuna.

JOB 8:17

Sapicunapish rumi jahuatami caita chaita ahuarishpa ricun. Rumi allpaman chayashpami sapiyashpa saquirin.

SALMOS 1:3

Yacu patapi huiñashca yura pangacunapish mana urmashpa pucuna punzhapi pucuc shinami canga. Tucui imata ruhuashcapish allimi canga.

SALMOS 37:2

Paicunaca quihua shinami pitishca canga. Llullu quihua shinami chaquinga.

PROVERBIOS 25:14

Jatun tucushpa imatapish cushami nishpa mana pactachic runaca tamya illac puyu huaira shinami.

EZEQUIEL 17:9

Canca: “Mandac Diosca: ¿Chai yuraca allichu huiñanga? ¿Manachu jatun angucunata piticpica, yurapish chaquinga? Pangasapa sumac yura cashpapish anguyashpami, tucui chaquinga. Chai yurata sapindi anchuchingapacca, mana achca fuerza, mana achca gentecunachu minishtiringa.

EZEQUIEL 34:10

Mandac Dios ñucaca: ¡Riquichic, michiccunahuanca yallitami piñarishca cani! ¡Ñuca ovejacuna ima tucushcataca ñucami tapusha! Ña mana paicunata michichun saquishachu. Shina ruhuacpimi, paicunalla cuidarinataca saquinga. Ashtahuanpish ñuca ovejacunataca paicunapac shimimanta quichushpami, paicuna micuchunca, mana ashtahuan saquisha.

EZEQUIEL 34:18

Cancunaca, ¿manachu alli quihuata micucushpapish, saquirishcataca sarushpa mapayachinguichic? Shinallatac, ¿manachu chuyanlla yacuta ubiashpapish, chaquihuan cuyuchishpa mapayachinguichic?

EZEQUIEL 34:2

«Huañunalla runa, Israel michiccuna llaqui tucunata huillashpa, Mandac Diosca: “¡Israel michiccunalla, cancunallami cuidaricunguichic! ¿Manachu michiccunaca ovejacunata cuidana can?

EZEQUIEL 34:8

Ñuca shutipimi nini: Michic illac cashcamantami Ovejacunataca shuhuarca. Sacha millai animalcunami japishpa micurca. Ñuca ovejacunata michiccunaca mana yuyarircacunachu, ashtahuanpish paicunapuralla cuidarishpami, ñuca ovejacunataca mana cuidarca.

OSEAS 6:4

Mandac Diosca: «Efraín aillulla, Judá llactapi causaccunalla, ¿cancunataca imatatac ruhuashayari? Cancunapac cuyaica tutamanta llucshimuc puyu shina, tutamanta páramo shamushpa, utca chingaric shinami.

LEVÍTICO 14:43

Chai rumita llucchishca huasha, aspishpa mushuc turuhuan llutashca quipapish cutinllatac ungüi ricuricpica,

SAN MATEO 13:6

Chashna cacpipish, chai yuraca mana ucuman sapita charishcamantami, inti rupachicpica chaquirca.

SAN MATEO 15:13

Chashna nicpimi Jesusca: —Jahua pacha ñuca Taita mana tarpushca yuraca, ima yura cashpapish sapindi pitishcami canga.

MARCOS 4:6

Chai yuraca mana ucuman sapiyuc cashpami, inti llucshishpa rupachicpica chaquircalla.

SAN LUCAS 12:45

Ashtahuanpish chai mayordomo paipac shungupi: “Ñuca amoca mana utca shamungachu” yuyashpa, cari serviccunatapish, huarmi serviccunatapish macashpa, pailla micushpa, ubiashpa, machashpami puricunman.

SAN LUCAS 16:19

Shuc chayuc runami tiyarca. Paica punzhantami achca valic churanata churarishpa, alli micunallata micushpa cushicuc carca.

SAN LUCAS 21:34

Cancunallatac alli yuyarichic. Pacta machanallapi, micunallapi, cai pachapi imatapish charinallapi yuyashpa causacunguichicman. Pacta cancuna mana yuyashca horas chai punzhaca chayamunman.

SAN LUCAS 8:6

Cutin maijan muyuca rumi allpapimi urmarca. Chai muyu huiñashpapish, mana achca allpa tiyashcamantami chaquirca.

EFESIOS 4:14

Shina cashpami ñucanchicca huahuacuna imatapish jahualla cric shina, chai pandachishpa puric, yachac tucushca gentecuna yachachishcata catishpa, huaira apashca shinaca ña mana cashun.

FILIPENSES 3:19

Chashna causaccunaca llaquipimi chingaringacuna. Diosta cuyanapac randica huicsatami yallita cuyancuna. Paicunapac sumac cashcaca pingaimi can. Shinallatac cai pacha causaipacllami ashtahuan munancuna.

1 TIMOTEO 5:6

Ashtahuanpish quiquin munaita ruhuashpa causac viudaca, causacushpapish huañushca shinami can.

HEBREOS 13:9

Cancuna mana ricsishca shuctac doctrinacunata ama chasquinguichicchu. Imacunallata micuna, imacunallata mana micuna nishpa mandashcaca ima allita mana ruhuashcachu. Chaipac randica, Diospac cuyaita shungupi charishpa, sinchiyaichic.

SANTIAGO 5:5

Cancunaca cai pachapica munanayaita ruhuashpami yallita alli causashcanguichic. Yalli micushpami huañuchina punzha chayacpi, huañuchina huagracuna shina huirayashcanguichic.