JEREMÍAS 7:25 - Dios Rimashcata Quillcashcami

²⁵ Ñuca ima nishcata huillac, ñucata serviccunataca cancunapac ñaupa taitacunata Egiptomanta llucchimushca punzhamanta pacha cunancamanmi punzhanta cancunapacman cachacurcanilla.

JEREMÍAS 7:25 ပူးပေါင်းရင်းမြစ်များ

2 CRÓNICAS 24:19

Shina piñarishpapish Mandac Diosca paipacman tigrarichun nishpami pai ima nishcata huillaccunata huillachun cacharca. Chai huillaccuna huillashcataca mana uyarcacunachu.

2 CRÓNICAS 36:15

Paicunapac ñaupa taitacunata Mandac Diosca pai acllashca gentecunatapish, paipac huasitapish llaquishpami, pai ima nishcata huillaccunata cutin cutin huillachirca.

ESDRAS 9:7

Ñucanchic ñaupa taitacuna causai punzhamanta cunan punzhacamanmi yallita juchata ruhuashpa causashcanchic. Chashna mana allita ruhuashcamantami ñucanchicpish, jatun mandaccunapish, curacunapish shuctac llacta mandaccunapac maquipi causashcanchic. Prezu apashca, espadahuan llaquichishca, ima charishcacunatapish quichushca, pingaichishcami cunan punzhacaman causanchic.

NEHEMÍAS 9:26

Ashtahuanpish paicunaca, cantaca mana cazurcacunachu, can mandashcatapish, yangata ruhuashpami, yallita piñachircacuna. Canman cuti richun nishpa, can ima nishcata huillaccunatapish huañuchircacunami, yallitami llaquichircacuna.

NEHEMÍAS 9:30

Tauca huatatami paicunataca, mana llaquichircangui. Cambac Espirituhuanmi, can ima nishcata huillaccunata huillachishpa yuyaita curcangui. Chashna huillacpipish mana uyacpimi, shuc llacta gentecunapac maquipi churarcangui.

ISAÍAS 5:4

Ñuca uvas chagrapica, ¿imatatac ashtahuan ruhuana carcani? ¿Imatatac mana ruhuashpa saquircani? Ñucaca alli uvasmi pucunga yuyashpami shuyacurcani. ¿Ima nishpatac sacha uvasrac pucurcayari?

JEREMÍAS 11:7

Ñaupa taitacunata Egiptomanta llucchimushca punzhamanta cunancamanmi: Ñuca mandashcacunata uyaichic nishpa punzhanta mandacurcanilla.

JEREMÍAS 25:3

«Amonpac churi Josías Judá llactata chunga quimsa huatata mandacui punzhacunamanta cunan punzhacamanmi Mandac Diosca caita huillarca. Chashnami utcamanta pacha ishcai chunga quimsa huatata huillacurcalla. Chashna mana shaicushpa huillacucpipish, cancunaca mana uyasha nircanguichicchu.

JEREMÍAS 25:4

Mandac Dios pai ima nishcata huillaccunata tauca cutin cancunapacman cachacpipish, mana uyasha nishpami causarcanguichic.

JEREMÍAS 29:19

Cancunallatac ñucata servic huillaccunata cutin cutin cachashpa, huillachishcata mana cazushcamantami chashna tucunguichic. Chaitaca Mandac Dios ñucami nini.

JEREMÍAS 35:14

Recabpac churi Jonadab vinota ama ubiachun nicpica, allimi pactachincuna. Paicunapac ñaupa taita mandashcata cazushpami, vinota cunan punzhacaman mana ubiancuna. Shina cashpapish, ñuca cancunata punzhanta rimacucpipish manatac cazunguichicchu.

JEREMÍAS 35:15

Ñucata servic huillaccunata punzhanta cancunapacman cachashpa: “Tucui cancuna mana alli causaita saquishpa, ñucapacman cutirichic. Shuctac dioscunatapish ama servinguichicchu. Chashna causashpami cancunamanpish, cancunapac taitacunamanpish ñuca cushca cai llactapica causanguichic nishpa huillachicucpipish, cancunaca manatac uyarcanguichicchu, manatac cazurcanguichicchu.

JEREMÍAS 44:4

Ñuca, ñuca ima nishcata huillac serviccunata cutin cutin huillachun cachashpaca: “¡Cai millana juchacunataca ama ruhuaichicchu, chaitaca mana ricunayanchu!” nishpami huillachircani.

JEREMÍAS 7:13

Cunanca, cancunapish mana allita ruhuashpami causacunguichic. Ñaupa huatacunamanta pacha punzhanta cancunata ñuca rimacucpipish, mana cazurcanguichicchu. Ñuca cayacpipish, mana uyarcanguichicchu.

EZEQUIEL 2:3

Chaipi rimarishpaca: «Huañunalla runa, ñucami cantaca israelcunapacman cachani. Paicunaca ñucata mana cazushpami cariyarcacuna. Paicunapish, paicunapac taitacunapish cunan punzhacamanmi mana cazushpa causancuna.

OSEAS 11:7

Ñuca acllashcacunaca jatun tucushpami, ñucata mana cazun. Jahua pachapi causac Dios ninacushpapish ñucataca pi mana jatunyachinata munanchu.

OSEAS 12:10

Mandac Diosca: «Ñuca ima nishcata huillaccunaman huillachishpami, ñuca huillashcataca yallita huillarcani. Paicunahuanmi chimbapurashca parlanacunahuan huillachircani.

AMÓS 2:11

Ñucami cancunapac churicunapuramanta ñuca ima nishcata huillacta, cutin cancunapac quipa huiñaimantaca nazareo runacuna cachun acllarcani. Israelcunalla, ¿manachu caica chashna?

MALAQUÍAS 3:7

Cancunapac ñaupa taitacuna causacui punzhamanta pachami ñuca mandashcacunata saquishpa, mana cazurcanguichic. ¡Ñucapacman cutirichic! Chashna cutiricpica, ñucapish cancunapacman cutirishami nicpipish, cancunaca: “¿Imapactac cambacman cutirishun?” nircanguichic.

SAN LUCAS 11:49

Chaimantami Diosca tucuita yachac cashpa: “Ñuca ima nishcata huillaccunatapish, ñuca acllashca huillaccunatapish cachashami. Paicunataca maijantaca huañuchingami, maijantaca llaquichishpa, catingami” nirca.

DEUTERONOMIO 9:7

Shitashca pambapi cashpa, Mandac Diosta piñachishcataca yuyarichicyari. Ama cungaringuichicchu. Egipto llactamanta llucshishcamanta caiman chayamungacamanmi Mandac Diostaca llaquichircanguichic.