JEREMÍAS 50:20 - Dios Rimashcata Quillcashcami

²⁰ Ñucallatac causachun saquishca israelcunapac juchacunataca perdonashami. Chaimantami chai punzhacunapi, chai huatacunapica israelcunapish, Judá runacunapish jucha illac cangacuna. Paicunapica juchaca mana tiyangachu. Chaitaca Mandac Dios ñucami nini.

JEREMÍAS 50:20 ပူးပေါင်းရင်းမြစ်များ

SALMOS 103:12

Inti llucshinamanta inti tigranaca carupimi. Juchacunata ñucanchicmanta anchuchishpaca chashnami caruyachirca.

SALMOS 17:3

Canca ñuca shungutaca tucuitami ricushcangui. Tutapish ricungapac shamushcanguimi. Ñuca alli cacta, mana alli cacta taripashpapish, ima mana allitaca mana tarishcanguichu. Ñuca shimihuan cambac contra mana rimangapacmi yuyarircani.

SALMOS 85:3

Piñarishca cashpapish tucuimi cungarircangui. Nina japiric shina piñarishca cashpapish, alli tucurcanguimi.

ISAÍAS 1:9

Mandac Dios ñucanchicta ashallatapish mana saquishca cacpica, Sodoma, Gomorra shinami, chingarinchicman carca.

ISAÍAS 10:21

Jacobopac huahua huahuapuramanta saquirishcacunaca jatun poderyuc Diospacmanmi cutiringa.

ISAÍAS 33:24

Chaipi causaccunamanta maijan: «Ungushcami cani» mana ningachu. Sión llactapi causac gentecuna mana allita ruhuashcataca perdonangami.

ISAÍAS 43:25

Chaica, ñucami, ñucallatac munashcamanta cancuna mana cazushpa, juchacunata ruhuashcata pichashpa, mana cutin yuyarisha.

ISAÍAS 44:22

Ñucata mana cazushpa, mana allita ruhuashcatapish, cancunapac juchacunatapish puyuta shinami anchuchircani. Ñucami cancunataca quishpichircani. Chaimanta ñucapacman cutimuichicyari» ninmi.

JEREMÍAS 31:34

Paicunapurapish, huauquicunapurapish: “Mandac Diosta ricsichic” nishpaca, ña mana yachachingachu. Ñucataca uchillamanta callarishpa, yuyaccunacamanmi ricsinga. Paicunapac mana allita ruhuashcataca perdonashami. Paicunapac juchataca mana ashtahuan yuyarishachu» ninmi.

JEREMÍAS 33:15

Chai punzhacunapimi, Davidpac huahuapuramanta cashcata ruhuacta llucchisha. Paimi cai llactapica imatapish allita ruhuashpa, cashcata ruhuanga.

JEREMÍAS 33:8

Ñucata llaquichishpa, millaita ruhuashpa juchallishcatapish tucuimi pichasha. Ñucata mana cazushpa, juchacunata ruhuashcatapish, jatun tucushcatapish perdonashami.

JEREMÍAS 44:14

Puchushca Judá llacta gentecunaca Egipto llactapimi causangapac rirca. Chaicunamantaca shucllapish mana causac saquiringachu. Judá llactapi causangapac cutingapacca shucllapish mana saquiringachu. Paicunaca Judá llactaman cutishpa, causanatami yallita munan. Shina cashpapish, mana cuti pudingachu. Maijan miticushpa llucshiccunallami Judá llactamanca cutinga» nirca.

JEREMÍAS 50:4

Mandac Diosca: «Chai punzhacunaca israelcunapish, Judá runacunapish tandanacushpami cutinga. Ñucata mashcashpami, quiquin chaquihuan purishpa, huacashpa ñucapacman shamunga.

LAMENTACIONES 4:22

Sionpi causaccunalla, cancunata llaquichinaca tucurishcami. Cancunataca jaicapi mana prezu apangachu. Edom llactapi causaccunalla, cancunallatac millaita ruhuashcamanta llaquichicpimi, cancunapac juchacunaca ricuringa.

EZEQUIEL 18:22

Pai millaita ruhuashcacunataca mana yuyarishachu. Ashtahuanpish paica cashcata ruhuac cashcamantami causanga.

MIQUEAS 7:19

Canca cutinllatacmi ñucanchictaca llaquingui. Ñucanchic ima mana allita ruhuashcacunataca sarushpami, ñucanchic juchacunataca ucu mama cuchapi shitangui.

SOFONÍAS 3:12

Cancunapac chaupipica huaccha yangalla gentecunatami saquisha. Paicunami Mandac Dios ñucata yuyarishpa causanga.

ZACARÍAS 3:9

Riquichic, Josuepac ñaupapimi canchis ñahuiyuc shuclla rumita churasha. Chai rumipica ñucami sellota churasha. Shuc punzhallami cai llactapi causaccunapac juchataca anchuchisha.

NÚMEROS 23:21

Jacobopac churi israelcunapica ima juchata mana ricushcanichu. Ima millaitapish mana ricushcanichu. Mandac Diosca paicunahuanmi. Paitaca: “Jatun mandacmi cangui” nishpami caparincuna nirca.

HECHOS 3:19

Cancunapac juchacunata perdonachunca, llaquirishpa, Diosman cutirichic. Chashna ruhuacpimi, Diosca cushi causaita cushpa samachinga.

HECHOS 3:26

Dios, paipac Churita causachishpaca, cancunaman allicunata cuchunmi, cancunapacman punta cacharca. Cancuna millai causaita saquishpa, alli causachunmi, cacharca» nirca.

ROMANOS 11:6

Diosca paicunataca mana ima allita ruhuashcamantachu acllashca. Ashtahuanpish cuyaillamantami acllarca. Paicuna allita ruhuashcamanta acllashca cacpica, Diospac cuyaica yangallami canman.

ROMANOS 5:16

Dios cuyashpa cushcaca, mana shuc runa juchallishca shinachu carca. Chaica, Adán juchallishcamantami, Diosca taripashpa llaquichinaca yaicurca. Shina cacpipish, Dios cuyashpa, cushca Jesucristoca tauca juchayuccunatami Diospacman cutichishca.

ROMANOS 6:13

Ama cancunapac cuerpo ima mana allicunata ruhuachun saquinguichicchu. Chaipac randica huañushcacunapuramanta causarishca shina, Diospacllata ruhuachun paillaman cuichic. Cancunapac cuerpotaca Diospacta ruhuachun saquichic.

2 PEDRO 3:15

Apunchic Jesús pai llaquishcamanta maijanpish quishpirichun nishpa, mana utca shamushpa shuyacushcataca yuyarichicyari. Caicunallamantatacmi ñucanchic cuyashca huauqui Pablopish, Dios yuyaita cucpi cancunamanca ña quillcarca.