JEREMÍAS 50:15 - Dios Rimashcata Quillcashcami

¹⁵ Paicunapac muyundipi caparichic. ¡Ñamari Babilonia llactaca cumurishca! Muyundi jatun pircapish tuñirinmi. Callari rumicunapish urmanmi. Mandac Dios ñuca llaquichina punzhami chayamushca. Paicuna shuccunata llaquichishca shinallatac paicunatapish llaquichichiclla.

JEREMÍAS 50:15 ပူးပေါင်းရင်းမြစ်များ

1 CRÓNICAS 29:24

Tucui mandaccunapish, sinchi runacunapish, jatun mandac Davidpac caishuc churicunapish jatun mandac Salomontaca cazurcacunami.

2 CRÓNICAS 30:8

Cunanca, ama cancunapac ñaupa taitacuna shina sinchi shungu tucuichicchu. Ashtahuanpish Mandac Diosta cazushpa, paipac huasiman shamuichic. Chai huasitaca Diosmi huiñaita paipaclla cachun chicanyachishca. Cancunata Mandac Diosta servichic. Shina servicpimi, nina japiric shina piñarishcamantaca cancunahuan alli tucunga.

SALMOS 149:7

Chaica, shuctac llactapi causaccuna llaquichishcamanta paicunatapish chashnallatac llaquichingapac chashna charicuichic.

SALMOS 94:1

Mandac Dioslla, ima shina llaquichishca shinallatac llaquichic Diosmi cangui. Ima shina llaquichishca shinallatac llaquichishpa ricuchiyari.

ISAÍAS 59:17

Cashcata ruhuanataca fierro churanata shina, quishpirinataca cascota shinami, umapi churarirca. Paita mana cazushca shinallatac llaquichinataca churanata churaric shinami churarirca. Yallita cuyaihuanmi jahualla churaric shina taparirca.

ISAÍAS 59:18

Paita piñaccunataca llaquichina cashca shinallatacmi llaquichinga. Paita mana ricunayachiccunatapish, paita piñaccunatapish yallita piñarishpami llaquichinga. Mama cucha patapi causaccunatapish paicuna piñashca shinallatacmi llaquichinga.

ISAÍAS 61:2

Mandac Dios quishpichina huata chayamucushcatapish, ñucanchic Dios llaquichina punzha chayamucushcata huillachunpish, shinallatac llaquilla causaccunata cushichichunpishmi cacharca.

ISAÍAS 63:4

Paicunata llaquichina punzha chayamucuctami ñuca shungupi yuyaricurcani. Ñuca quishpichina huatami shamushca.

JEREMÍAS 46:10

Chai punzhaca tucuita Mandac Diospac punzhami canga. Paita piñaccunataca llaquichina punzhami canga. Espadaca tucuita huañuchishpami, yahuarsapa tucushpa, machashca shina canga. Tucuita Mandac Diosca jahua lado llacta Eufrates yacu patapimi yallita huañuchinga.

JEREMÍAS 50:14

Babilonia llactapi causaccunahuan macanacungapac muyundita allichirishpa shayarichic. Flechacunahuan shitaccuna ama pandarishpa shitaichiclla. Paicunaca Mandac Diostami piñachirca.

JEREMÍAS 50:25

Mandac Dios ñucami macanacunata huacaichishca ucuta pascashpa, nina japiric shina piñarishpa macanacunata llucchircani. Tucuita Mandac Dios ñucami caldeocunapac llactapi ñuca ruhuana cashcata ruhuasha.

JEREMÍAS 50:44

León animalta japingapac Jordán yacu pata sachamanta llucshic shinami, paicunata llaquichishpa callpachisha. Ñuca acllashca runamanmi mingasha. ¿Pitac ñuca shinaca cangayari? ¿Pitac ñucahuan chimbapurai pudingayari? Ñuca llaquichicucpica, ¿pi michictac misai pudingayari?

JEREMÍAS 51:11

Flechacunata pichaichic. Escudotapish rigrapi apaichic. Mandac Diosca Babilonia llactata tucuchinatami yuyarishca. Media llactata jatun mandaccunapac shungupimi tucuchina yuyaita churashca. Mandac Diosca paipac huasita urmachishcamantami paicunatapish llaquichinga.

JEREMÍAS 51:14

Tucuita Mandac Diosca paipac shutillapitac ari nishpami: «Ñucaca canta piñaccunataca langostacunata shinami jundachisha. Paicunami caparishpa canhuan macanacungapac shamunga» nirca.

JEREMÍAS 51:24

Babilonia llactapi causaccunatapish, Caldea runacunatapish, Sionta llaquichishcamantaca cancunapac ñaupapimi llaquichigrini» ninmi

JEREMÍAS 51:25

Mandac Diosca: «Tucui llactacunata tucuchic urculla, cantaca yallitami piñani. Canmi tucui llactacunata tucuchircangui. Ñuca llaquichishpami rumi quingraita singuchisha. Shinami rupashca urcuta saquisha.

JEREMÍAS 51:30

Babilonia sinchi soldadocunaca macanacunata saquishpami, jatun torre ucucunapi miticushca. Fuerza illac saquirishpami, huarmicuna shina tucushca. Paicunapac huasicunaca rupashcami. Llacta pungu aldabacunapish paquirishcami.

JEREMÍAS 51:36

Chaimantami Mandac Diosca: «Ñucami canta llaquichishcamantaca llaquichisha. Ima shinami llaquichishca shinallatacmi paicunataca llaquichisha. Paicunapac jatun yacucunatapish, tucyacuc yacucunatapish chaquichishami.

JEREMÍAS 51:44

Shinallatac: «Babilonia llactapi cac Bel diosta llaquichishpami, imata micushcatapish huicsamanta llucchisha. Shuctac llactacunaca paipacmanca mana ashtahuan shamungachu. ¡Babilonia llacta muyundi jatun pircaca urmashcami!

JEREMÍAS 51:58

Babilonia llacta muyundi ancho pircapish tucuimi tuñiringa. Jatun pungucunapish uchupami saquiringa. Gentecunaca yangami trabajashca. Ninapi rupachunllami shuctac llacta gentecunapish yallita shaicushca» ninmi.

JEREMÍAS 51:6

¡Babilonia llactapi causaccunapac juchamanta mana huañungapac chaimanta llucshichicyari! Paicuna llaquichishca shinallatac paicunatapish Mandac Dios llaquichina punzhami chayamushca. Paicunaman cuna cashcatami cugrin.

JEREMÍAS 51:64

Chaipi shitashpaca: “Chashnami cai Babilonia llactaca ucuyanga. Ñuca cachashca llaquimantaca jaicapi mana quishpiringachu. Tucuimi chingaringa” ninmi ningui» nirca. Jeremías huillashcaca caicamanllami.

LAMENTACIONES 5:6

Micunata charingapacca Egipto llactapi, Asiria llactacunamanmi maquita chutashpa mañanchic.

EZEQUIEL 17:18

Ari nishcata yangapi churashcamanta, mana allicunata ruhuashcamantaca mana quishpiringuichu.

EZEQUIEL 21:22

Chashna tapucpica, jatun mandacca paipac alli lado maquihuanmi Jerusalén ladota ricuchirca. Chaica macanacuchun, huañui tiyachun, caparinacuchun, pungu ladocunapi ariete nishcata shayachichun, macanacuna pushtucunata ruhuachun, muyundi torrecunata shayachichunmi ricuchirca.

NAHÚM 1:2

¡Mandac Diosca, paipaclla cachun munacmi! Ima shina paita llaquichishca shinallatac llaquichicmi. Paita mana ricunayachiccunata llaquichicmi, paita piñaccunata piñacmi.

SAN MATEO 7:2

Cancuna ima shinami shuccunata juchanchinguichic, chashnallatacmi cancunatapish Diosca juchanchinga. Ima shinami shuccunata ruhuanguichic, chashnallatacmi cancunatapish ruhuanga.

SAN LUCAS 21:22

Chai punzhacunaca, Dios quillcachishca shina llaquichina punzhacunami canga.

ROMANOS 12:19

Cuyashca criccuna, cancunata maijan llaquichicpica, ama cancunallatac llaquichinata yuyaichicchu, ashtahuanpish Dios llaquichichun saquinguichic. Chaica, Dios quillcachishcapica: «Llaquichina cacpica, ñucami llaquichisha. Paicuna japina cashcatami cusha» ninmi.

ROMANOS 3:5

Ñucanchic mana allita ruhuashcacunallatac Dios cashcata ruhuac cashcata ricuchicpica, ¿imatatac nishun? Ñucanchicta llaquichicpica, ¿Diosca millaimantami llaquichin nishunchu? Caitaca gentecuna yuyashca shinami rimagrini.

DEUTERONOMIO 32:35

Ima shina llaquichina cashca shina, llaquichinapish ñucapacmi. Ima punzha pactacpimi, chaqui lluchcaric shina urmanga. Paicuna chingarinaca ñami pactamucun. Paicunaman allichishcapish ñami chayamucun.

DEUTERONOMIO 32:41

Ñucapac jagan nicuc espadata mulashpa ñuca maquihuan alzashpa cashcata ruhuacushpami ñucata piñaccunataca paicuna llaquichishca shina llaquichisha.

DEUTERONOMIO 32:43

¡Llactacunalla, Dios acllashca llactata alli nichicyari! Paipac servicta huañuchiccunataca huañuchingami. Paimi, paita piñaccunata huañuchinga. Pai acllashca llactacunapac juchata pichangapacmi chashnaca ruhuanga» nirca.

2 TESALONICENSES 1:8

Shina shamushpami, ñucanchic Apunchic Jesucristopac alli huillaita mana cazuccunatapish, Diosta mana ricsinata munaccunatapish llaquichinga.

SANTIAGO 2:13

Shuccunata mana llaquiccunataca, paicunatapish mana llaquishpami, Diosca taripashpa llaquichinga. Ashtahuanpish shuccunata llaquiccunataca, taripana punzhapica alli ningami.

JOSUÉ 6:20

Israelcuna caparicpimi, curacunapish oveja gachupi tocarcacuna. Chai tocashcata uyashpaca, sinchitami caparircacuna. ¡Shina caparicpica, jatun pircapish urmarcami! Chaipica, tucui israelcunami paicunapac ñaupata rishpa puebloman yaicurcacuna.

JOSUÉ 6:5

Oveja gachucunapi unaita tocashpa uyaricpica, tucui gentecunami sinchita caparinga. Chaipica, pueblota jarcashca pircaca urmangami. Shina tucucpica, chai puebloman rishpami llaquichigrina canguichic» nirca.

APOCALIPSIS 16:6

Paicunami cambaclla caccunatapish, canmanta huillaccunatapish yahuarta jichashpa huañuchircacuna. Paicunaca chashna chasquina cashcamantami, canpish chashnallatac paicunamanca yahuarta ubiachishcangui» nishcatami uyarcani.

APOCALIPSIS 18:6

¡Chai pueblotaca pai llaquichishca shinallatac llaquichichic! ¡Pai shuc cutinhuan llaquichishca cacpica, ishcai cutinhuan llaquichichic! ¡Shinallatac pai imata ruhuashcamantaca, chaupihuan yallita ruhuaichic! ¡Ubianatapish pai ubiachishcamanta, ishcai cutinhuan yallita chapushpa ubiachichic!

APOCALIPSIS 19:2

Paica pimanpish mana tucushpa, cashcata ruhuac cashpami, chai huarmi huacllirishpa tucui cai pachapi causaccunata juchapi urmachishcamantaca llaquichishca. Shinallatac Diospacta ruhuaccunata huañuchishcamantapish llaquichishcami» nircacuna.

1 SAMUEL 15:33

Ashtahuanpish Samuelca: «¡Canca, cambac espadahuan huahuacunata huañuchishpami achca huarmicunata huahua illacta saquircangui! Chashnallatacmi cambac mamapish chai huarmicunapac chaupipica huahua illac saquiringa» nirca. Shina nishpami Agagtaca pitinacushpa Gilgal pueblopi Mandac Diospac ñaupapi huañuchirca.