JEREMÍAS 44:27 - Dios Rimashcata Quillcashcami

²⁷ Ñuca paicunaman ima allita ruhuanapac randica, llaquichingapacmi chaparacuni. Egipto llactapi causac Judá gentecunami jatun macanacuipi yarcaihuan huañushpa tucuringa.

JEREMÍAS 44:27 ပူးပေါင်းရင်းမြစ်များ

2 REYES 21:14

Maijan saquirishca ñuca acllashcacunataca paicuna ima charishcata quichuchun, llucchishpa cachachunmi piñaccunapac maquipi saquisha.

JEREMÍAS 1:10

Cunan punzhamanta pachami cantaca llactapi causaccunatapish, jatun mandaccunatapish, sapimanta llucchic shina tucui chingachichun, urmachishpa ñutuchichun, shinallatac cutin shayachishpa, tarpuc shina allichichun churani» nirca.

JEREMÍAS 21:10

Ñucaca cai llactataca allita ruhuanapac randica, llaquichinatami yuyarircani. Babilonia llactata jatun mandacpac maquipimi churagrini. Paimi rupachishpa tucuchinga” ninmi.

JEREMÍAS 31:28

Ima shinami paicunata sapimanta pilac shina anchuchinata, urmachinata, llaquichinata, tucui chingachinata munarcani. Chashnallatacmi allichishpa shayachinata, tarpuc shina cutin callarichinata munani.

JEREMÍAS 39:16

«Ebedmelecpacman rishpa, israelcunapac tucuita Mandac Diosca: “Ñuca rimashcata pactachishpami, cai llactapi causaccunaman allita ruhuanapac randica llaquichigrini. Chai llaqui punzhacunataca quiquin ñahuihuantacmi ricugringui.

JEREMÍAS 42:16

chai llactapipish cancuna manchana macanacuipimi huañunguichic. Yarcaita manchacushpapish, Egipto llactapica yarcaihuanmi huañunguichic.

JEREMÍAS 44:12

Egipto llactaman rishpa, chaipi causac puchushca Judá gentecunaca tucuimi tucuchishca canga. Tucui paicunami jatun macanacuipi yarcaihuan huañushpa tucuringa. Cashnami uchillamanta callarishpa yuyaccunacaman tucuringa. Tucuipac mana alli nishca, tucuipac mancharina, burlanami tucunga.

JEREMÍAS 44:13

Jerusalenpi causaccunata ima shinami jatun macanacuipi yarcaihuan, jatun ungüihuan llaquichircani, chashnallatacmi Egipto llactapi causaccunatapish llaquichisha.

JEREMÍAS 44:14

Puchushca Judá llacta gentecunaca Egipto llactapimi causangapac rirca. Chaicunamantaca shucllapish mana causac saquiringachu. Judá llactapi causangapac cutingapacca shucllapish mana saquiringachu. Paicunaca Judá llactaman cutishpa, causanatami yallita munan. Shina cashpapish, mana cuti pudingachu. Maijan miticushpa llucshiccunallami Judá llactamanca cutinga» nirca.

JEREMÍAS 44:18

Ashtahuanpish jahua pachata mandac huarmi diosman inciensota rupachinata, vinota cushpa tallinata saquishca punzhamanta pachami imapish illac canchic, shinallatac jatun macanacuipi yarcaihuan huañucunchic» nirca.

JEREMÍAS 9:15

Chaimantami israelcunapac tucuita Mandac Dios ñucaca: Cai gentecunamanca ajenjotami caragrini. Shinallatac yacuhuan, venenohuan chapushpami ubiachigrini.

JEREMÍAS 9:16

Paicunatapish, paicunapac taitacunatapish mana ricsishca llactacunatami caita chaita cachasha. Paicunata catishpa, espadahuan huañuchishpa tucuchichunmi saquisha nini» ninmi.

EZEQUIEL 5:12

Cancunamanta quimsapi chaupishca gentecunaca ungüihuan, yarcaihuanmi chaillapitac huañunga. Cutin shuc quimsapi chaupishca gentecunaca cancunapac muyundillapitacmi jatun macanacuipi huañunga. Cutin shuctac quimsapi chaupishca gentecunataca espadata llucchishpami caita chaita catishpa cachasha.

EZEQUIEL 7:6

¡Chaica cancunata tucuchigrinimi, tucuchigrinimi! ¡Llaquica ñami llaquichingapac chayamun! ¡Riquichic, ñamari shamucun!

DANIEL 9:14

Chaimanta Mandac Dioslla, llaquichinata yuyarishpa ñucanchicta llaquichishcangui. Ñucanchicta Mandac Dios canca imata ruhuashpapish cashcata ruhuacmi cangui. Shina cacpipish, ñucanchicca mana cazushcanchicchu.

AMÓS 9:8

Mandac Diosca: «Juchayuc llactataca piñacunimi. Chaimantami cai llactapi causaccunataca llaquinayaita llaquichishpa tucuchisha. Shina llaquichishpapish, Jacobopac huahua huahuacunataca mana tucui tucuchishachu.