JEREMÍAS 38:18 - Dios Rimashcata Quillcashcami

¹⁸ Ashtahuanpish Babilonia llactata jatun mandac cachashca mandaccunapac maquipi yaicungapac canllatac mana llucshicpica, cai llactaca caldeocunapac maquipimi churashca canga. Paicunami ninata tucuchinga. Canpish paicunapac maquimanta mana quishpiringuichu” ninmi— nirca.

JEREMÍAS 38:18 ပူးပေါင်းရင်းမြစ်များ

2 REYES 24:12

Chaimantami Judá llactata jatun mandac Joaquinca paipac mamandi, paita serviccunandi, pai churashca mandaccunandi, caishuc mandaccunandi jatun mandac Nabucodonosorpac maquipi prezu yaicurca. Jatun mandac Nabucodonosor Babilonia llactata pusac huatata mandacucpimi, chashnaca tucurca.

JEREMÍAS 21:10

Ñucaca cai llactataca allita ruhuanapac randica, llaquichinatami yuyarircani. Babilonia llactata jatun mandacpac maquipimi churagrini. Paimi rupachishpa tucuchinga” ninmi.

JEREMÍAS 27:8

Maijan llacta, mana cashpaca maijan jatun mandac Babilonia llactata jatun mandac Nabucodonosorta yugota cungapi churashca shina, mana servisha nictaca jatun macanacuipi yarcaihuan, yalli ungüihuanmi llaquichisha. Chashnami Nabucodonosorpac maquipi yaicungacaman llaquichisha.

JEREMÍAS 37:8

Chashna ricpimi, caldeocunaca cutinllatac cai llactaman cutishpa, macanacushpa rupachinga.

JEREMÍAS 38:23

Cambac huarmicunata, huahuacunatami caldeocunaca caimanta apanga. Canca paicunapac maquimantaca manatac quishpiringuichu. Ashtahuanpish Babilonia llactata jatun mandacpac maquipimi, prezu japi tucungui. Cai llactapish tucui rupachishcami canga— nirca.

JEREMÍAS 38:3

Mandac Diosca: “Cai llactaca Babilonia llactata jatun mandac soldadocunapac maquipi yaicungami. Paimi cai llactataca japinga” ninmi» nirca.

JEREMÍAS 39:3

Babilonia llactata jatun mandac churashca mandaccunaca Jerusalenman yaicurca. Chashna yaicushpami, chaupi pungu ladocunapi carpacunata shayachishpa tiyarirca. Chai mandaccunaca: Nergal-sarezer, Samgar-nebo, Rabsaris nishca Sarsequim, Rabmag nishca Nergal-sarezer, shinallatac Babilonia llactata jatun mandac churashca tucui mandaccunami carca.

JEREMÍAS 39:8

Caldeo soldadocunaca mandana huasitapish, Jerusalén huasicunatapish rupachircami. Muyundi jatun pircacunatapish urmachircami.

EZEQUIEL 12:13

Ashtahuanpish paipac jahuapi linchita shitashpami, ñuca tucllapi urmachisha. Chaimantaca caldeocuna causana Babilonia llactaman apachunmi saquisha. Llactataca mana ricungachu. Chaipimi huañunga.

EZEQUIEL 17:15

Chashna ari nishca cashpapish mana cazushpami, maijan huillaccunata Egipto llactapi caballocunatapish, achca runacunatapish mañachun cacharca. Chashna ruhuashpaca, ¿allichu causanga? Ari nishcata paquic runaca, ¿quishpiringachu?