JEREMÍAS 33:11 - Dios Rimashcata Quillcashcami

¹¹ yallita cushicushpa asishcapish, novia, novio cantashcapish, shinallatac Mandac Dios ñucapac huasiman ofrendata apamushpa: “¡Tucuita mandac Diosta alabaichic, paica allimari! Paica huiñaita cuyacunllami” nishpa, cantashcapish uyaringami. Ñucaca prezumanta cutichimushpaca, utcapi shinallatac causachunmi allichisha. Chaitaca Mandac Dios ñucami nini.

JEREMÍAS 33:11 ပူးပေါင်းရင်းမြစ်များ

1 CRÓNICAS 16:34

Mandac Diosta alli nichic, Paica allimi can. Paipac cuyaica huiñaipacmi can

1 CRÓNICAS 16:8

«¡Mandac Diosta alli nichic! ¡Paipac shutita huillaichic! ¡Pai ima ruhuashcata, gentecunaman huillaichic!

2 CRÓNICAS 20:21

Chai gentecunata tapushca quipami Josafatca shuccunataca macanacuc soldadocunapac ñaupata sumaimana Mandac Diosta alli nishpa: «Mandac Diostaca jatunyachichic, paica huiñaita cuyacmari» nishpa cantashpa richun churarca.

2 CRÓNICAS 29:31

Chai quipami Ezequiasca: «Cunanca, cancunaca ñami Diospaclla canguichic. Chaimanta animalcunata Diosman cushpa huañuchingapac, Mandac Diospac huasipi paita pagui ningapac cuchuyaichiclla» nirca. Shina nicpimi, achca gentecuna Mandac Diosta pagui nishpa animalcunata cushpa huañuchingapac apamurca. Alli shunguta chariccunaca paicunapac munaimantami animalcunata tucui rupachingapac apamurcacuna.

2 CRÓNICAS 5:13

Trompetacunapi tocashca uyaricpica, tucuimi Mandac Diosta alli nishpa, pagui nishpa shuclla shina cantarcacuna. Trompetacunahuan, platillocunahuan shuctac tocanacunahuan tocacpi, sinchita cantashpami, Mandac Diostaca: «Paica allimari, pai llaquishcaca huiñai huiñaipacmi» nishpa cantarca. Shina cantacpimi, Mandac Diospac huasipica puyu jundarca.

2 CRÓNICAS 7:3

Nina japiricucpish, Mandac Diospac sumaimana achicpish chai huasi jahuaman shamucta tucui israelcuna ricushpami, rumi pambapi cungurishpa, pambacaman cumurishpa, Mandac Diostaca: «Diosca allimari, paica huiñai huiñaitami llaquin» nircacuna.

ESDRAS 6:22

Levadura illac tandata micuna jatun fiestataca canchis punzhatami yallita cushicushpa ruhuarcacuna. Mandac Dios paicunata cushichishcamanta, Asiria llactata jatun mandacta, Diosllatac yuyaita cushpa israelcunapac Diospac huasita ruhuanata mana jarcashcamantami chashna cushicurca.

NEHEMÍAS 12:43

Chai punzhaca Diosllata cushichicpimi, achca animalcunata Diosman cushpa huañuchishpa, yallita cushicurcacuna. Chaipica huarmicunapish, huahuacunapish yallitami cushicurca. Jerusalenpi chashna yallita cushicushcaca carucamanmi uyaricurca.

NEHEMÍAS 8:12

Paicunaman yachachishca shimicunata entendishpami, tucui gentecuna micushpa, ubiashpa, shuccunamanpish carashpa, yallita cushicungapac rircacuna.

SALMOS 106:1

¡Mandac Diosta alabaichicyari! ¡Mandac Diosca allimari, paita alabaichicyari! Paica huiñaitami llaquicun.

SALMOS 107:1

¡Mandac Diosca ñucanchic-huanca allimi! ¡Ñucanchicta huiñaita cuyanmari! ¡Chaimanta paitaca alabaichicyari!

SALMOS 107:22

Paita pagui nishpa animalta cushpa, pai allicunata ruhuashcacunata cushicushpa cantaichicyari.

SALMOS 116:17

Canta pagui nishpami, animalta huañuchishpa canman cusha. Mandac Dioslla, cambac shutitami mañasha.

SALMOS 147:13

Cambac pungucunapi sinchi alabaccunata churashcamanta alli niyari. Cambac chaupipi causac huahuacunataca bendiciarcami.

SALMOS 85:7

Mandac Dioslla, can llaquic cashcamanta ñucanchicta quishpichiyari.

ISAÍAS 35:10

Mandac Dios quishpichishcacunaca cushicushpami, Sión llactaman cantashpa yaicunga. Paicunaca huiñai huiñaitami cushicunga. Paicuna yallita cushicuihuan cacpica, ima llaquipish mana japingachu.

ISAÍAS 51:11

Mandac Dios quishpichishcacunaca cutinllatacmi Sión llactaman cantashpa yaicunga. Paicunaca huiñaitami cushicunga. Paicunaca yallita cushicuihuanmi canga. Nanaipish, llaquipish, huacaipish illangami.

ISAÍAS 51:3

Mandac Dios ñucaca Sión llactapi causaccunata cushichishatacmi. Tucui llaquilla caccunatami cushichisha. Shitashca pambataca sumac sisa huerta shinata, chaquishca pambataca Mandac Dios ñucapac huertata shinatami ruhuasha. Chaipica yallita cushicushpami, ñucata alli nishpa cantangacuna.

ISAÍAS 52:8

¡Uyaichicyari! Torre jahuapi chapac runacunaca yallita cushicushpami, tandanacushpa caparinga. Sionman Mandac Dios cutin pushamucuctaca quiquin ñahuihuanmi ricunga.

ISAÍAS 52:9

Jerusalén llactalla, Mandac Diosmi llaquimata quishpichishpa cushichishca. Chaimanta tandanacushpa cushicuihuan cantaichicyari.

JEREMÍAS 16:9

Israelcunapac tucuita Mandac Dios ñucaca: Cai llactapica cushicushpa yallita asinapish mana tiyangachu. Shinallatac noviocuna, noviacuna cushicushpa cantanapish mana tiyangachu. Chashnami cancuna causacui punzhapi, cancunapac ñaupapi tucunga nini.

JEREMÍAS 17:26

Shinallatac tucui Judá llacta llactacunamantapish, Jerusalén muyundimantapish, Benjamín aillupac llactamantapish, Sefela pambamantapish, Neguev urcucunamantapishmi shamunga. Paicunaca ñucaman animalta cushpa rupachingapacmi shamunga. Shinallatac ofrendatapish, inciensotapish, ñucata alli nishpa huañuchishpa cuna animaltapish apamushpami, Mandac Dios ñucapac huasiman shamunga.

JEREMÍAS 25:10

Paicunapurapica cushicushpa asinapish, cantanapish, cushicuihuan caparinapish, noviocuna, noviacuna cushicushpa cantanapish mana tiyangachu. Cutana rumi huacashcapish mana uyaringachu. Luzpish mana tiyangachu.

JEREMÍAS 29:14

Cancunaca taringuichicmi. Prezumanta cutichimushpami, ñuca llucchishpa cachashcacunataca tucui llactacunamanta tandachisha. Maimanta ñuca llucchishpa cachashca pushtullamantacmi cutichimusha. Chaitaca Mandac Dios ñucami nini.

JEREMÍAS 30:19

Ñucata pagui nishpa cantashcapish, cushicushpa asishcapish uyaringami. Paimantaca achcatami mirachisha. Mana tucuchishachu. Paitaca alli nishami. Paica mana yanga nishcachu canga.

JEREMÍAS 30:3

Ñuca acllashca israelpuramanta, Judá llactapi causacpuramanta prezu apashcacunata cutichimuna punzhami chayamucun. Paicunapac ñaupa taitacunaman ñuca cushca llactamanmi pushamusha. Chaipimi causanga. Chaitaca Mandac Dios ñucami nini» nirca.

JEREMÍAS 32:44

Ashtahuanpish caimanta prezu aparishcacunataca ñucami cutichimusha. Paicunaca allpata randingacunami. Escriturata ruhuashpami sellanga. Chashnami Benjaminpac llactapi, Jerusalén muyundi llactacunapi, Judá llactallapitac tiyac caishuc llactacunapi, urcucunapi tiyac llactacunapi, Sifela pambapi tiyac llactacunapi, Neguev pamba llactacunapimi allpata randinga» ninmi.

JEREMÍAS 33:26

ñucapish Jacobopac huahuacunataca shitaimanmi. Ñucata servic Davidpac huahuacunatapish cungarimanmi. Shuc punzha Abrahampac, Isaacpac, Jacobopac huahuacunata mandachunca, Davidpac huahuacunataca ña mana mandachun churaimanchu. Ashtahuanpish ñucallatacmi caimanta prezu apashcacunataca llaquishpa cutichimusha» nirca.

JEREMÍAS 33:7

Judá llactamanta, Israel llactamanta prezu apashca gentecunaca cutin cutichimushpami, utcapi cashca shinallatac sinchiyachisha.

JEREMÍAS 7:34

Judá llactapi tiyac llactacunapipish, Jerusalén ñancunapipish cushicushpa yallita asinapish mana tiyangachu. Shinallatac noviocuna, noviacuna cushicushpa asinapish mana tiyangachu. Tucui llactacunami llaquinayaita tucuchishca canga» ninmi.

AMÓS 9:14

Ñuca acllashca israelcuna prezumanta cutichimushami. Paicuna cutichimucpimi, urmashca llactacunata allichishpa causanga. Paicunaca uvasta tarpushpaca vinota ubiangacunami. Huerta ruhuashpaca, chaipi pucushca micungami.

JONÁS 2:9

Ñuca shimihuanmi canta alabani. Rupachina animaltapish, canman cusha nishca ofrendatapish cushami. ¡Can Mandac Diosllami quishpichicca cangui!» nirca.

NAHÚM 1:7

¡Mandac Diosca allimi! Llaqui punzhacunapica sinchi torre shinami jarcan. Paita shuyaccunataca cuidanmi.

SOFONÍAS 3:14

¡Sionpi causaccunalla, cantaichicyari! ¡Israelcunalla, cushicushpa caparichicyari! ¡Jerusalenpi causaccunalla, tucui shunguhuan yallita cushicuichicyari!

ZACARÍAS 10:7

Efraín ailluca yallita sinchi runacuna shinami canga. Vinota ubiashpa cushicuc shinami shungupi yallita cushicunga. Paicunapac churicunaca chaita ricushpami, Mandac Diosmanta tucui shunguhuan cushicunga.

ZACARÍAS 8:19

«Judá llactapi causaccuna chuscu quillapi, pichca quillapi, canchis quillapi, chunga quillapi ayunanaca yallita cushicuna fiesta punzhacunami tucunga. Chaimanta cashcata ninata, cushi causaita munaichic» nirca.

ZACARÍAS 9:17

¡Chai llactaca mai sumacmi! Trigoca quipa huiñaicunatami sumacta huiñachinga. Vinoca carihuan manarac chayarishca solteracunatami cushichinga.

SAN JUAN 3:29

Shuc bodapica, noviaca noviopacmi. Noviopac ricsishcaca, novio rimashcata uyashpaca cushicunmi. Shinallatacmi ñucapish Novio rimashcata uyashpaca, yallita cushicuni.

HEBREOS 13:15

¡Chaimantami Diostaca, Jesucristomanta huiñaita alabacunalla canchic! Chaimi Diosman cushca ofrenda shina can. ¡Chaimanta ñucanchic shimihuan Diospac shutita alli nicushunchic!

APOCALIPSIS 18:23

Achicyachic luzpish jaicapi mana tiyangachu. Cazarashpa cushicuipish mana tiyangachu. Catushpa randishpa causaccunapish maimi chayucyashcacuna. Canca brujiashpami tucui llactacunapi causaccunatapish llullashpa umashcangui.