JEREMÍAS 29:11 - Dios Rimashcata Quillcashcami

¹¹ Ñucaca cancunaman ima ruhuanata yuyaricushcataca yachanimi. Cancuna cushilla shuyashpa causachunca, cancunata llaquichinapac randica, cushi causaitami cusha. Chaitaca Mandac Dios ñucami nini.

JEREMÍAS 29:11 ပူးပေါင်းရင်းမြစ်များ

JOB 23:13

Ashtahuanpish pai imata ruhuasha nishcataca, ¿pitac shuctacyachingayari? Paillami imatapish ruhuan.

SALMOS 33:11

Ashtahuanpish Mandac Dios imata ruhuasha nishcaca huiñaipacmi can. Paipac shungupi imata yuyarishcataca huahua huahuacunami pactachicungalla.

SALMOS 40:5

Mandac Dioslla, ñuca Dioslla, jatun mancharinacunataca achcatami ruhuashcangui. Ñucanchicman allita ruhuana yuyaillami cangui. Can ruhuashca allicunaca mana yupaipacmi. Can tucui allicunata ruhuashcata cambac ñaupapi yupashpa huillasha nishpapish maita mana yupaipacmi can.

SALMOS 85:9

Ñallami paita manchaccunata quishpichinga. Chashna ruhuacpica, ñucanchic llactapimi sumaimana Diosca ñucanchic-huan causanga.

ISAÍAS 27:4

Chai chagrataca mana piñashachu. Casha yuracuna, cardos yuracuna tiyacpica, tucuita anchuchishpa, sarushpa, tucui rupachisha.

JEREMÍAS 23:5

Shamuc punzhacunapica Davidpac huahua huahuapuramantami cashcata ruhuac mandacta churasha. Paica Jatun Mandacmi. Allita mandashpami, cai pachapica imatapish alli ricushpa, cashcata ruhuashpa mandanga.

JEREMÍAS 23:6

Pai mandacui punzhacunapica Judá llactapi causaccunaca quishpiringami. Israelcunapish imata mana manchashpami Mandac Diospi shunguta churashpa causanga. Chaimantami: “Mandac Diosca ñucanchicman cashcata ruhuacmi” nishpa cayangacuna.

JEREMÍAS 24:5

«Israelcunata Mandac Dios ñucaca: Sumac higocuna shinaca, Judá llactamanta caldeocunapac llactaman ñuca llucchishpa cachashca gentecunami.

JEREMÍAS 30:10

Mandac Dios ñucaca: «Ñucata servic Jacobolla, ama manchaichu. Israelcunalla, ama chucchuichicchu. Ñucami canpish, cambac huahuacunatapish caru llactapi prezu causacucpi, chaimanta llucchishpa quishpichisha. Jacobopac huahua huahuacunaca mana manchashpami cushilla causanga. Pipish mana ashtahuan manchachingachu.

JEREMÍAS 30:9

Ashtahuanpish Mandac Dios ñucata, jatun mandac Davidtami servinga. Paitami mandac cachun churasha» nini.

JEREMÍAS 33:6

Shina cashpapish ñucami cai llactapi causaccunaman jambita apamushpa alliyachisha. Chashna jambishpa sinchiyashpami, tucui llaquimanta cuidashpa, cushi causaita cusha.

LAMENTACIONES 3:26

Mandac Dios quishpichinata upalla shuyanaca allimi.

EZEQUIEL 11:16

Chaimanta canca: “Mandac Diosca: Paicunata caru llactacunapi causagrichun cachashpapish, ñucallatacmi ñucata yuyarina huasi shinaca casha” ninmi.

OSEAS 3:5

Chai quipami, israelcunaca cutishpa, paicunata Mandac Diostapish, jatun mandac Davidtapish yuyaringa. Tucuri punzhacunami allita japingapac Mandac Diospacman chucchushpa cuchuyanga.

MIQUEAS 4:12

Ashtahuanpish paicunaca Mandac Dios imata yuyaricushcatapish, pai cunacushcatapish mana yachanchu. Chashnami Mandac Dios gavillata trillana pambapi tandachishca shina cashpapish mana yachancuna.

ZACARÍAS 1:6

Ashtahuanpish ñuca rimashcacunata, ñuca mandashcacunata, ñuca ima nishcata huillac ñucata serviccuna huillachishcaca, ¿manachu cancunapac ñaupa taita causacui punzhacunapi pactarca? Chaimantami paicuna ñucapacman cutimushpaca: “Mandac Diosca mana alli ñancunapi ñucanchic purishca shinallatac, mana allita ruhuashca shinallatacmi llaquichinata yuyarirca. Paica ñucanchictaca chashnallatacmi ruhuarca” nircacuna nishpa huillai» nirca.

ZACARÍAS 13:9

Chai quimsa partepi chicanyachishcataca ninapi churashpami ricusha. Cullquita yacuyachic shinami yacuyachisha. Ninapi churashpa alli curita ricuc shinami ricusha. Shina ruhuacpimi, paicunaca ñuca shutita mañanga. Paicuna mañashcata ñuca uyashpaca: “Ñuca acllashcacunami canguichic” nishami. Cutin paicunaca: “Ñucanchicta Mandac Diosmi cangui” ningami» ninmi.