ISAÍAS 9:7 - Dios Rimashcata Quillcashcami

⁷ Jatun mandac Davidpac tiyarinapi tiyarishpami, huiñaita cushi causaita cushpa, cashcata ruhuashpa, cunanmanta huiñaicaman mandanga. Pai mandanaca mana tucuringachu. Tucuita Mandac Diosca pai yallita cuyashcamantami chaitaca pactachinga.

ISAÍAS 9:7 ပူးပေါင်းရင်းမြစ်များ

2 SAMUEL 7:16

Cambac huasi ucupurapish, can mandanapish jaicapi mana tucuringachu. Shinallatac can mandashpa tiyanaca huiñaitami caticungalla’ ninmi” ningui» nirca.

2 REYES 19:31

Jerusalenmantaca, maijanpish puchushcami llucshinga. Sión urcumantaca mana huañushpa quishpirishcacunami llucshinga. ¡Tucuita Mandac Diosmi, yallita juchallishcamanta chashna ruhuanga!

SALMOS 2:8

Llactacunatapish cambac cachun mañailla, ñucaca cushallami. Cai pacha tucuricamanmi cambaclla canga.

ISAÍAS 11:1

Isaimantaca shuc yura retoñac shinami, shuc jatun mandac llucshinga.

ISAÍAS 16:5

Chai quipami Davidpac huahua huahuapuramanta shuc mandac llucshinga. Paimi David shayachishca carpa huasipica cuyaihuan mandanga. Paimi piñaccunataca llaquichishpa, cashcata ruhuashpa mandanga.

ISAÍAS 2:4

Mandac Diosmi llactacunapi causaccunataca taripanga. Achca gentecunatami jarcashpa rimanga. Chashna ruhuacpimi, paicunapac espadacunataca yapuna rejacunata, lanzacunataca hocescunata ruhuanga. Llactacunapish mana ashtahuan macanacungapac llucshingachu. Macanacunatapish ña mana ashtahuan yachachingachu.

ISAÍAS 26:11

Mandac Dioslla, llaquichingapac cambac maqui alzashca cacpipish, paicunaca mana ricunchu. Can acllashcacunata ricushpa, paicuna shina canata munashpa pingachun. Canta piñaccunata nina tucuchichun.

ISAÍAS 37:32

Maijan saquirishcacunaca Jerusalenmanta, Sión urcumantami llucshinga. ¡Tucuita Mandac Dios yallita cuyashcamantami chaitaca pactachinga!

ISAÍAS 40:10

Riquichic, Mandac Diosca jatun poderhuanmi shamun. Paipac rigrahuanmi allicunamanca allita cunga. Mana allicunataca llaquichinga.

ISAÍAS 42:13

Mandac Diosca sinchita macanacuc jatun soldado shinami, tucuchina yuyaihuan shayaringa. Paita piñaccunahuanca caparishpa, sinchita rimashpami manchachishpa mishanga.

JEREMÍAS 23:5

Shamuc punzhacunapica Davidpac huahua huahuapuramantami cashcata ruhuac mandacta churasha. Paica Jatun Mandacmi. Allita mandashpami, cai pachapica imatapish alli ricushpa, cashcata ruhuashpa mandanga.

DANIEL 2:35

Chashna polvocpimi, fierropish, allpamanta ruhuashcapish, broncepish, curipish, cullquipish usyai punzhacunapi trillana erapi tiyac tamo shina tucurca. Chaita huaira apacpimi, chai shayacushca pushtupica jaicapi mana ricurirca. Cutin chai runaman ricchata huactac rumica jatun urcu tucushpami, tucui cai pachata taparca.

DANIEL 2:44

Chai jatun mandaccuna mandacui punzhacunami jahua pacha Diosca jaicapi mana tucuchipac llactata mandachun churanga. Chai llactata mandactaca mana shuctac runacunaman cungachu. Chai jatun mandacmi shuctac jatun mandaccunata ñutuchishpa tucuchinga. Shinami paica huiñaita mandacungalla.

DANIEL 7:14

Paimanmi llactata mandanatapish, podertapish curca. Tucui llactapi causaccunapish, llactapi causaccunapish chican chican rimaita rimaccunami paita servicurca. Paipac mandanaca jaicapi mana tucuric, huiñaita mandana cashcata, mana taripac mandana cashcatami ricurcani.

DANIEL 7:27

Chaipimi cai pacha mandanatapish, jahua pacha ucupi tiyac sinchi mandanacunatapish jahua pacha Diospaclla caccunaman cunga. Paicunaca huiñaitami mandanga. Tucui jatun mandaccunami paicunata cazushpa servinga” nirca.

HAGEO 2:9

Cai quipa ruhuashca ñuca huasimi punta ruhuashca huasitapish yalli sumaimana canga. Caipica cushi causaitami cusha. Chaitaca tucuita Mandac Dios ñucami nini» ninmi.

SAN MATEO 1:23

Chai huillaccunaca: «Manarac carihuan chayarinacushca shuc solterami, huicsayuc tucushpa, shuc cari huahuata charinga. Chai huahuaca Emanuel shutimi canga» nishcami. (Emanuel nishpaca: «Dios ñucanchic-huan» nisha ninmi).

SAN JUAN 12:34

Chaipi caccunaca: —Dios quillcachishcapica “Cristo huiñaitami causanga” ninmi. ¿Ima nishpatac canca: “Runa Tucungapac shamushcaca caspipi huarcushcami canga” nicungui? ¿Pitac chai Runa Tucungapac shamushcaca?— nirca.

HEBREOS 1:8

Ashtahuanpish paipac Churimantaca: “Canca huiñai huiñaita Mandac Diosmi cangui. Shinallatac cashcata ruhuashpami mandangui.

HEBREOS 7:24

Ashtahuanpish Apunchic Jesucristoca huiñaitami causacun. Chaimanta pai cura shina ruhuacca mana shuctacyanchu.

APOCALIPSIS 19:11

Chai quipaca jahua pacha pascaricpi, shuc yurac caballopi montashpa tiyacuctami ricurcani. Chai tiyacucpac shutica Mana Llullac, shinallatac Imatapish Pactachicmi carca. Paica cashcata ruhuashpa, taripac shinallatac macanacucmi carca.