ISAÍAS 66:3 - Dios Rimashcata Quillcashcami

³ Huagrata huañuchishpa ñucaman cushcaca shuc runata huañuchishpa cushca shinami. Ovejata huañuchishpa cushcaca allcuta huañuchishpa, cushca shinami. Ima ofrendata ñucaman cushcaca cuchi yahuarta cushca shinami. Inciensota cushnichishcaca yanga diosta mañashca shinami. Chashna paicuna quiquin munashcata ruhuashpa, millanayaita ruhuashpa shungupi cushicushcamantaca,

ISAÍAS 66:3 ပူးပေါင်းရင်းမြစ်များ

PROVERBIOS 15:8

Mandac Diosca paita mana manchaccuna animalta cushpa rupachishcataca millanayachinmi. Ashtahuanpish allita ruhuaccuna mañacpica cushicunmi.

PROVERBIOS 21:27

Diosta mana manchaccunaca animalta Diosman cushpa rupachishcapish millanami. Mana alli shunguhuan cushcatacarin ashtahuanmi mana ricunayachin.

ISAÍAS 44:19

Imata ruhuacushcataca shungupi mana yuyarinchu. Shinallatac: «Cai caspimanta maijanca rupachishpa, chai nina carbonpica tandata, aichata cusashpami micurcani. ¿Chai puchushca caspihuanchu millana shuc diosta ruhuasha? ¿Chai puchushca caspi ñaupapichu cungurisha?» nina yuyaitaca pipish mana charinchu.

ISAÍAS 53:6

Tucui ñucanchicmi chingarishca ovejacuna shina, quiquin ñanta japishpa, caita chaita rishpa, chingarishca carcanchic. Shina cacpipish, Mandac Diosca paimanmi tucui ñucanchic juchacunata apachirca.

ISAÍAS 57:17

Imatapish yallita munashpa, millaita ruhuashcamantami yallita piñarishpa llaquichircani. Chaimantami tigrarishpallapish mana ricurcani. Shina cacpipish, paicunaca mana cazushpami shungu munashcata ruhuashpa catirca.

ISAÍAS 65:12

Chaimantami cancunataca espadahuan huañuchichun saquisha. Huañuchiccunapac ñaupapimi cunguringuichic. Cancunaca ñuca cayacpipish, ñuca rimacpipish, mana uyarcanguichicchu. Chaipac randica ñuca ñaupapimi mana allita ruhuarcanguichic. Ñuca millanayachishcataracmi ruhuanata munarcanguichic» ninmi.

ISAÍAS 65:2

Punzhantami mana cazushpa, quiquin munashca ruhuashpa causac gentecunataca maquita chutashpa cayarcani.

ISAÍAS 66:17

Mandac Diosca: «Mapa illac cangapac allichirishpa, huerta chaupiman catinacui rishpa, cuchi aichata, ucucha aichata, ima shuctac millana animalcunapac aichata micuccunataca tandachishpami tucuchisha.

JEREMÍAS 6:20

¿Imapactac Sabá llactamanta inciensota apamunguichic? ¿Imapactac caru llactamanta mishquilla ashnacuc huiruta apamunguichic? Cancuna tucui rupachishcatapish, Cancunapac ofrendatapish mana munanichu nini» ninmi.

LEVÍTICO 2:2

Chaitaca Aaronpac churi curacunamanmi cunga. Chaitaca curami maqui junda alli harinahuan, aceitehuan, inciensohuan chapushpa, yuyarina cachun, altar jahuapi rupachinga. Chaimi Mandac Diosmanca mishquilla ashnanga.

HAGEO 2:14

Shina nicpimi Hageoca: «Mandac Diosca: Chashnallatacmi cai llacta gentecunapish ñuca ñaupapica tucun. Chashna cacpica, paicuna imata ruhuashcapish, ñucaman imata cushcapish chashnallatacmi mapa tucun.

DEUTERONOMIO 14:8

Cuchitapish ama micunguichicchu. Cuchica pallca shillu cashpapish mana librunchu. Chai aichataca ama micunguichu, huañushcapipish ama tuparinguichicchu.

DEUTERONOMIO 23:18

Mandac Diospac huasimanca ama huainayashpa japishca cullquita apamunguichicchu. Caripura chayarinacushpa japishca cullquitapish ama apamunguichicchu. Mandac Diosca ishcaitatacmi millanayachin.

JUECES 10:14

¡Cunanca cancunata cai llaquimanta quishpichichunca, cancuna acllashca dioscunata caparishpa mañagrichic!— nirca.

JUECES 21:25

Chai huatacunapica Israel llactapica mana jatun mandac tiyarcachu. Chaimantami paicunaca quiquin munashcata ruhuashpa causarcacuna.

JUECES 5:8

Israelcuna shuc mushuc dioscunata mashcacucpica, macanacuica pungupi shinami carca. Shina chayamucpica, chuscu chunga huaranga israelcunaca shuc lanzallahuanpish, escudollahuanpish mana carcacunachu.