ISAÍAS 61:7 - Dios Rimashcata Quillcashcami

⁷ Yallita pingaichishca, mana alli nishca canapac randica, ishcai cutin yalli herenciatami japinguichic. Pingaichishca canapac randica, chai herenciamantami yallita cushicunguichic. Cancunapac llactapica chai herenciatapish japishpami, huiñaita cushilla canguichic.

ISAÍAS 61:7 ပူးပေါင်းရင်းမြစ်များ

2 REYES 2:9

Ña pasashpaca, Eliasca Eliseotaca: —Cambac ladomanta ñucata manarac apacpi, canman imata ruhuachun ñucata mañailla— nirca. Shina nicpimi Eliseoca: —Cambac espirituta chaupihuan cuchun ninimi— nirca.

JOB 42:10

Job paipac ricsishca quimsa runacunamanta mañashca quipami Mandac Diosca paimanca ñaupa charishcamanta ishcai cutinhuan yallita bendiciarca.

SALMOS 126:5

Huacashpa tarpuccunaca cushicushpami cosechangacuna.

SALMOS 16:11

Ñucamanca causaiman apac ñantami ricuchingui. Cambac ñaupapica yallita cushicuimi tiyan. Cambac alli ladopica huiñaitami cushicui tiyan.

ISAÍAS 35:10

Mandac Dios quishpichishcacunaca cushicushpami, Sión llactaman cantashpa yaicunga. Paicunaca huiñai huiñaitami cushicunga. Paicuna yallita cushicuihuan cacpica, ima llaquipish mana japingachu.

ISAÍAS 40:2

Jerusalenpi causaccunaman sumacta huillashpaca: “Cancunapac juchacunata perdonana huatacunaca ñami pactamushca. Cancunapac juchacunamantaca ñami chaupi yalli llaquihuan Mandac Diosca llaquichishca” nichic» ninmi.

ISAÍAS 51:11

Mandac Dios quishpichishcacunaca cutinllatacmi Sión llactaman cantashpa yaicunga. Paicunaca huiñaitami cushicunga. Paicunaca yallita cushicuihuanmi canga. Nanaipish, llaquipish, huacaipish illangami.

ISAÍAS 54:4

Ama manchaichu, mana pingaichishcachu cangui. Ama pingaichu, cantaca pi mana burlangachu. Ashtahuanpish huambrarac cashpa, pingashcata, viuda cashpa, pingashcataca mana ashtahuan yuyaringuichu.

ISAÍAS 60:15

Shitashca pamba, pipish mana ricunayachishca, pipish mana purinata munashca cacpipish, ñucami cantaca huiñai huiñaita alli nishca cachun ruhuasha. Tucui quipa huiñaicuna cushicushpa causanatami ruhuasha.

ISAÍAS 60:21

Tucui gentecunami cashcata ruhuaccuna canga. Llactataca huiñaita causangapacmi japingacuna. Paicunaca ñuca tarpushca yura sapimanta huiñashca yura shinami canga. Ñucata alli ningapacca ñuca maquihuan ruhuashca chagra shinami canga.

ISAÍAS 65:13

Chaimantami Mandac Diosca: «Ñucata serviccunaca yallita micucungami, ashtahuanpish cancunaca yarcaihuanmi canguichic. Ñucata serviccunaca yacuta ubiacungami, ashtahuanpish cancunaca yacunayaihuanmi canguichic. Ñucata serviccunaca cushicungami, ashtahuanpish cancunaca pingaihuanmi canguichic.

SOFONÍAS 3:19

Chai huatapica cancunata tucui llaquichiccunatami llaquichisha. Shinallatac suchucunataca quishpichishami. Chingarishca oveja shina puriccunatapish tandachishami. Cancunata pingaichishca llactacunapica tucuipac alli nishca, tucuipac ricsishcatami ruhuasha.

ZACARÍAS 8:12

Ashtahuanpish paicunapacca cushi causaica muyuta tarpushca shinami canga. Uvaspish achcami pucunga, allpapipish achca granomi pucunga, jahua pachaca tamyatami cachanga. Chai tucui allicunataca maijan saquirishcacunamanmi cusha.

ZACARÍAS 9:12

Prezumanta cutina yuyailla caccucunalla, muyundita pircashcaman cutimuichicyari. Cunanca, cancuna yallita llaquita apashcamantaca chaupihuan yalli allicunata cancunaman cunatami huillacuni.

SAN MATEO 25:46

Paicunaca jaicapi mana tucuric, jatun llaquimanmi ringa. Ashtahuanpish cashcata ruhuaccunaca, huiñai causaimanmi ringa— nirca.

2 CORINTIOS 4:17

Cai causaipi ashacamanlla llaquita apacushcaca tucuringami. Shina cashpapish, llaquicunaca tucuimanta yalli huiñai causaiyuctami ruhuacun.

DEUTERONOMIO 21:17

Piñashca huarmipi charishca churimanmi tucui churicuna japinamanta chaupi yallita punta churi cashcamanta cuna can. Tucui fuerzahuan charishca punta churi cashcamantami punta churi japinataca japina can.

2 TESALONICENSES 2:16

Ñucanchicta cuyac Diosllatac, shinallatac pai cuyashcallamanta huiñai huiñaita cushi canatapish, cushicushpa shuyanatapish cuc ñucanchic Apunchic Jesucristollatac