ISAÍAS 5:28 - Dios Rimashcata Quillcashcami

²⁸ Paicunapac flechacunapish alli mulashcami canga. Arcocunapish allichishcami canga. Caballocunapac shillucunaca yacu rumi shina sinchimi canga. Carretacunapac ruedacunaca acapana huaira shinami callpanga.

ISAÍAS 5:28 ပူးပေါင်းရင်းမြစ်များ

SALMOS 120:4

¡Macanacuc runapac flecha shinami filoyuc cangui! ¡Rupacuc retama shinami cangui!

SALMOS 45:5

Pueblocunapi causaccunaca cambac chaqui ucupimi urmanga. Cambac filosapa flechacunaca can jatun mandacta piñaccunapac shungutami chaupishpa pasanga.

ISAÍAS 13:18

Mosocunatapish flechahuanmi huañuchinga. Llullu huahuacunatapish mana llaquingachu. Huahuacunata ricushpaca, ashallatapish mana llaquingachu.

ISAÍAS 21:1

Mama cucha patapi tiyac shitashca pamba llaqui tucunamanta huillashcami: Shitashca pamba Neguevmanta acapana huaira shamuc shinami, manchana llactamanta shitashca pambata shamunga.

ISAÍAS 66:15

Mandac Diosca yallita piñarishpa, ninahuan jarcashpa yallita llaquichingapacmi rupacuc nina chaupipi, jatun acapana huaira shina, callpac carretacunahuan shamunga.

JEREMÍAS 4:13

Piñac runacunaca puyu huichai shamuc shina, carretacunaca acapana huaira shinami shamun. Caballocunaca angata yallimi callpan. Chashna shamucpica cancunaca: “¡Aij, ñucanchiclla, imachari tucushun!” ninguichicmi.

JEREMÍAS 47:3

Caballocuna tulun nishpa callpamucta uyashpa, carreta ruedacuna huacashcata uyashpami taitacunaca huahuacunata shitashpa callpanga. Yallita manchaihuan chucchushpami imata mana ruhuai pudinga.

JEREMÍAS 5:16

Tucui paicunami yalli sinchi runacuna. Paicunapac flechacunata huacaichinaca huañushcata enterrana jutcu shinami.

EZEQUIEL 26:11

Caballocunaca tucui ñancunatami sarushpa puringa. Gentecunataca espadahuanmi huañuchinga. Sinchi rumi pilarcunatapish tigrachingami.

EZEQUIEL 38:9

Canca huairahuan tamya ric shina ringui. Cambac tucui soldadocunahuan, achca gentecunahuan rishpa, puyu shina, chai llactata tapangui.

DANIEL 11:40

Ashtahuanpish tucuri punzhacunaca ura llacta jatun mandacmi paihuan macanacungapac shamunga. Chashna shamucpimi, jahua llacta jatun mandacca carretacunahuan, caballopi ric soldadocunahuan, barcocunahuan yacu jundamuc shina macanacungapac shamunga. Chashna yacu jundamuc shina shamushpami, llactacunaman yaicushpa tucuchinga.

MIQUEAS 4:13

Mandac Diosca: «¡Sionpi causaccunalla, jatarishpa trillac shina tucuchichicyari! Cancunamanca fierro gachuyuc, bronce shillucunayuc huagraman shinami fuerzata cusha. Chaimantami achca llactacunata ñutuchic shina tucuchinguichic. Paicunamanta quichushcacunataca Mandac Diosmanmi cunguichic. Imata charishcatapish, tucui cai pacha Mandac Diospaclla cachun, paiman cunguichic» ninmi.

NAHÚM 3:2

Anguhuan huactashcatapish, carreta ruedacuna huacashcatapish, caballocuna sarushcatapish, carretacuna huajiashcatapish,

JUECES 5:22

Caballocunapac chaquicuna caruman uyarictami callparca. Sinchi soldadocuna chashna callpacpimi cashna uyarirca.