ISAÍAS 44:2 - Dios Rimashcata Quillcashcami

² Ñucaca cancunata ruhuac, mamapac huicsapi cacpirac huiñachic Mandac Diosmi cani. Ñucata servic Jacobopac huahuacunalla, ama manchaichicchu. Ñuca acllashca Jerusalenlla, ama manchaichu.

ISAÍAS 44:2 ပူးပေါင်းရင်းမြစ်များ

SALMOS 46:5

Diosmi chai pueblo chaupipi tiyacun. Chai pueblotaca pi mana cuyuchingachu. Tutamanta achicyanataca Diosmi ayudanga.

SALMOS 71:6

Ñucataca mamapac huicsapi cacpiracmi cambac maquipi charircangui. Ñuca mamapac huicsamantapish canmi llucchircangui. Chaimantami canllata alabasha.

SALMOS 95:6

¡Paita jatunyachishpa, paipac ñaupapi cumuringapac shamuichic! Ñucanchicta ruhuac Mandac Diospac ñaupapi cungurishunchic.

ISAÍAS 27:11

Chai ramacuna chaquicpica, paquishpami saquinga. Chaicunataca huarmicunami yantashpa rupachinga. Cai gentecunaca mana entendincunachu. Chaimantami paicunata ruhuac Diosca manatac llaquinga. Paicunata ruhuac Diosca mana llaquishpami llaquichinga.

ISAÍAS 41:10

Ñucaca cancunahuanmi cani. Chaimanta ama manchaichicchu. Ñucaca cancunapac Diosmi cani. Chaimanta ama manchaichicchu. Ñucaca cashcata ruhuashpami cancunapac tucui causaipi ayudasha.

ISAÍAS 41:14

Israelcunapac jucha illac quishpichic Mandac Diosmi caitapish nini: Curucuna shina ashalla Jacobopac huahua huahuacunapish, curucuna shina ashalla israelcunapish ama manchaichicchu. Ñucaca cancunata ayudac Diosmi cani.

ISAÍAS 41:8

Israelcunalla, cancunaca ñucata serviccunami canguichic. Jacobopac huahua huahuacunalla, ñuca acllashcacunami canguichic. Cancunaca ñucahuan apanacuc Abrahampac huahua huahuacunami canguichic.

ISAÍAS 43:1

Jacobopac huahua huahua Israel llactata callarichic Mandac Diosca: «Ama manchaichu, Ñucami quishpichircani. Cantaca shutipimi cayarcani, ñucapacmi cangui.

ISAÍAS 43:21

Cai acllashcacunataca ñucapac cachunmi ruhuarcani. Tucui paicunami ñucataca alli nishpa cantanga.

ISAÍAS 43:5

Ñucaca canhuanmi cani. Chaimanta ama manchaichu. Cambac huahuacunataca inti llucshina ladomantapish, inti tigrana ladomantapish tandachishpa pushamushami» ninmi.

ISAÍAS 43:7

Ñuca shutipi cayashcacunataca tucuita cachaichic. Paicunataca sumaimana cachunmi ruhuarcani» ninmi.

ISAÍAS 44:21

Mandac Diosca: «Jacobopac huahua huahuacunalla, israelcunalla, cancunaca ñucata serviccunami canguichic. Chaitaca alli yuyarichicyari. Israelcunalla, cancunataca ñucami ruhuarcani. Ñucata serviccunami canguichic. Ñucata ama cungarichicchu.

ISAÍAS 44:24

Mamapac huicsapi cacpirac cuidac, cancunata quishpichic Mandac Diosca: «Ñucami tucuita ruhuac Mandac Diosca cani. Ñucallami jahua pachatapish, cai pachatapish pañota tendic shina churarcani.

ISAÍAS 45:11

Israelcunata ruhuac jucha illac Mandac Diosca: «¿Quipa punzha ima tucunatachu tapunguichic? ¿Ñuca maquihuan ruhuashca huahuacunamantachu tapunguichic?

ISAÍAS 49:1

¡Mama cucha patapi causaccunalla, caru llactapi causaccunalla, alli uyaichic! Mandac Diosca mamapac huicsapi cacllapitacmi ñucataca cayarca. Ñucata manarac huacharicpimi, ñuca shutitaca cayarca.

ISAÍAS 49:5

Mandac Diosca ñuca mamapac huicsamanta pachami paita servichun acllarca. Jacobopac huahua huahua israelcunata paipacman tandachimuchunmi acllarca. (Mandac Diospac ñaupapimi yallita alli nishca cani. Ñuca Diosmi sinchiyachin).

JEREMÍAS 1:5

«Cantaca mamapac huicsapi manarac tiyacpimi, ña ricsircani. Manarac huacharicpimi, ñucapaclla cachun chicanyachishpa, llactacunapi ñuca ima nishcata huillachun churarcani» nirca.

JEREMÍAS 30:10

Mandac Dios ñucaca: «Ñucata servic Jacobolla, ama manchaichu. Israelcunalla, ama chucchuichicchu. Ñucami canpish, cambac huahuacunatapish caru llactapi prezu causacucpi, chaimanta llucchishpa quishpichisha. Jacobopac huahua huahuacunaca mana manchashpami cushilla causanga. Pipish mana ashtahuan manchachingachu.

SAN LUCAS 12:32

Cancunaca ashalla ovejacuna shina cashpapish ama manchaichicchu. Diosmi cushicushpa cancunahuan mandasha nicun.

ROMANOS 8:30

Callarimanta chicanyachishcacunataca Diosca cayarcami. Chai cayashcacunataca chasquircami. Chasquishcacunataca alli nircami.

EFESIOS 1:4

Diosca paipac cuyaimantami manarac cai pachata ruhuashpa, ñucanchictaca jucha illac paipac ñaupapi paipaclla cachun acllashca.

DEUTERONOMIO 32:15

Jesurunca yallita huirayashpa, huira tapashpa cashpami paita ruhuac Mandac Diostaca mana cazurca. Quishpichic jatun Rumi shina Diostaca mana chasquircachu.

DEUTERONOMIO 33:26

¡Jesurunpac Dios shinaca, mana shucca tiyanchu! Paica, jatun cashcahuanmi puyu jahuapi tiyarin. Paica canta ayudangapacmi jahua pachapi tiyarin.

DEUTERONOMIO 33:5

Israelcunata mandaccunahuan, caishuc mandaccunahuan tandanacucpica, Mandac Diosca Jesurunpimi mandac carca.

1 TESALONICENSES 1:4

Cuyashca criccuna, Diosllatac cancunata cuyashpa acllashca cashcataca yachanchicmi.

HEBREOS 4:16

Chaimanta cuyac Dios ñucanchicta llaquichun, paipac jatun cuyaimanta ayudachun, paipacman tucui shunguhuan cuchuyashpa mañashunchic.