ISAÍAS 42:13 - Dios Rimashcata Quillcashcami

¹³ Mandac Diosca sinchita macanacuc jatun soldado shinami, tucuchina yuyaihuan shayaringa. Paita piñaccunahuanca caparishpa, sinchita rimashpami manchachishpa mishanga.

ISAÍAS 42:13 ပူးပေါင်းရင်းမြစ်များ

SALMOS 118:16

Mandac Diospac alli maquica jahuaman churashpa alli nishcami. Mandac Diospac alli maquica aticunllami.

SALMOS 78:65

Shina cacpipish, Mandac Diosca sueñuimanta riccharic shinami jatarirca. Shuc macanacuc runa mishashpa caparic shinami caparirca.

ISAÍAS 26:11

Mandac Dioslla, llaquichingapac cambac maqui alzashca cacpipish, paicunaca mana ricunchu. Can acllashcacunata ricushpa, paicuna shina canata munashpa pingachun. Canta piñaccunata nina tucuchichun.

ISAÍAS 31:4

Mandac Diosca: «Shuc león ovejata japishpa micushpaca, tucui michiccuna tandanacushpa manchachingapac shamucpipish, mana manchanchu. Chashnami tucuita Mandac Dios ñucapish, ñucapac Sión urcupi macanacungapac urai shamusha.

ISAÍAS 37:32

Maijan saquirishcacunaca Jerusalenmanta, Sión urcumantami llucshinga. ¡Tucuita Mandac Dios yallita cuyashcamantami chaitaca pactachinga!

ISAÍAS 63:15

Jahua pachamanta ñucanchicta ricuiyari. Can causana, cambaclla sumaimana huasimanta chapaiyari. ¿Maipitac cambac jatun cuyaica? ¿Maipitac cambac poderca? ¿Maipitac ñucanchicta tucui shunguhuan llaquichicca? ¿Manachu llaquingui?

ISAÍAS 66:14

Cancunaca chaita ricushpami, tucui shunguhuan cushicunguichic. Cancunapac tullucunapish quihua sisac shinami mushucyanga. Mandac Diosca paipac poderta paita serviccunaman ricsichingami. Ashtahuanpish paita piñaccunataca piñangami.

ISAÍAS 9:7

Jatun mandac Davidpac tiyarinapi tiyarishpami, huiñaita cushi causaita cushpa, cashcata ruhuashpa, cunanmanta huiñaicaman mandanga. Pai mandanaca mana tucuringachu. Tucuita Mandac Diosca pai yallita cuyashcamantami chaitaca pactachinga.

JEREMÍAS 25:30

Can Jeremías paicunaman huillashpaca: “Mandac Diosca jahuamantami caparishpa shamunga. Pai causacuc jucha illac huasimantami sinchita rimanga. Pai acllashcacunata piñashpami caparishpa shamunga. Cai llactapi causaccunataca caparishpa uvasta saruc runa shinami ruhuanga.

OSEAS 11:10

Paicunaca Mandac Dios ñucata catishpami puringa. Ñuca león huacac shina, rimashcata uyashpami, paicunapac huahuacunaca inti tigrana ladomanta chucchushpa shamunga.

JOEL 3:16

Mandac Diosca Sión urcumantami león huacac shina caparinga. Pai rimashcaca Jerusalenmantami uyaringa. Jahua pachapish, cai pachapish chucchungami. Shina cacpipish, Mandac Diosca pai acllashca israelcunata cuidangami. Paica miticuna sinchi torre shinapishmi canga.

AMÓS 1:2

Amosca: «¡Sión urcumanta, Jerusalenmantami Mandac Diosca león huacac shina caparishpa uyaringa! Michinapish mana tiyangachu. Carmelo urcupish chaquingami» nirca.

NAHÚM 1:2

¡Mandac Diosca, paipaclla cachun munacmi! Ima shina paita llaquichishca shinallatac llaquichicmi. Paita mana ricunayachiccunata llaquichicmi, paita piñaccunata piñacmi.

SOFONÍAS 1:18

Mandac Dios piñarishpa llaquichi punzhapica paicunapac cullquipish, curipish mana quishpichingachu. Tucui cai pachataca nina japiric shinami tucuchinga. Cai pachapi causaccunataca cungaillami tucuchinga.

SOFONÍAS 3:8

Chaimanta llaquichina punzha chayangacaman shuyaichic. Ñucaca tucui llactacunata tandachingapac, jatun mandaccuna mandana llactacunata nina japiric shina llaquichinatami yuyarircani. Chaimantami nina japiric shina piñarishpa, tucui cai pachata tucuchisha. Chaitaca Mandac Dios ñucami nini.