ISAÍAS 40:1 - Dios Rimashcata Quillcashcami

¹ Mandac Diosca: «¡Ñuca acllashcacunata cushichichic, cushichichic!

ISAÍAS 40:1 ပူးပေါင်းရင်းမြစ်များ

NEHEMÍAS 8:10

Chai quipa paicunataca: «Cai punzhaca ñucanchic jatun Diospac chicanyachishca punzhami. Chaimanta alli micunacunata micuichic, mishqui vinotapish ubiaichic. Ima micunata mana chariccunaman micunata cachaichic. Mana llaquirinachu canguichic. Ashtahuanpish Mandac Diosmi cushichishpa sinchiyachin» nirca.

SALMOS 85:3

Piñarishca cashpapish tucuimi cungarircangui. Nina japiric shina piñarishca cashpapish, alli tucurcanguimi.

SALMOS 85:8

Mandac Dios rimashcata uyashami. Pai acllashcacunamanca cushi causaitami huillanga. Paipacllacuna imapish mana allita ama ruhuachun, ima mapapipish ama urmachunmi rimanga.

ECLESIASTÉS 3:4

Huacangapacpish, asingapacpish punzha tiyanmi. Duelo cangapacpish, bailangapacpish punzha tiyanmi.

ISAÍAS 12:1

Chai punzhapica canca: «Mandac Dioslla, cantami cantasha. Canca ñucahuan piñarishpapish chai piñarishcata pasachishpami cushichishcangui.

ISAÍAS 3:10

Cashcata ruhuaccunataca “allitami causangui” nichic. Paipac maquihuan imatapish ruhuashpami micunata japinga.

ISAÍAS 41:27

Ñucami Sionpi causaccunamanca punzhanta caicunata huillacurcani. Ñucallatacmi cai Jerusalenpi causaccunaman cushicunata huillachun shuc huillacta cachasha.

ISAÍAS 50:10

Cancunapuramantaca, ¿pitac Mandac Diosta manchashpa, paita servic huillashcatapish uyaccuna canguichic? Luz illac cashcamanta amsa purapi puricushpaca Mandac Diospac shutipi shunguta churaichic. Paipac maquipi chariraichic.

ISAÍAS 51:12

Mandac Diosca: «Ñucami cancunata cushichic cani. ¿Ima nishpatac cupa shina huañushpa chingariclla runata mañanguichic?

ISAÍAS 51:3

Mandac Dios ñucaca Sión llactapi causaccunata cushichishatacmi. Tucui llaquilla caccunatami cushichisha. Shitashca pambataca sumac sisa huerta shinata, chaquishca pambataca Mandac Dios ñucapac huertata shinatami ruhuasha. Chaipica yallita cushicushpami, ñucata alli nishpa cantangacuna.

ISAÍAS 52:9

Jerusalén llactalla, Mandac Diosmi llaquimata quishpichishpa cushichishca. Chaimanta tandanacushpa cushicuihuan cantaichicyari.

ISAÍAS 60:1

¡Sión llactalla, jatariyari! ¡Achicyachiyari! Canta achicyachic luzca ñami shamushca. Cambac jahuapica Mandac Diospac achic nicucmi achicyachicun.

ISAÍAS 61:2

Mandac Dios quishpichina huata chayamucushcatapish, ñucanchic Dios llaquichina punzha chayamucushcata huillachunpish, shinallatac llaquilla causaccunata cushichichunpishmi cacharca.

EZEQUIEL 16:42

Shina ruhuashpami, ñuca yallita piñarishcataca pasachisha. Chaimantami canca ñucapaclla causangui. Chashnami ñuca samarisha.

ZACARÍAS 1:13

Shina nicpimi, Mandac Diosca ñucahuan parlacuc angeltaca cushichic sumac rimaicunata rimarca.

ZACARÍAS 1:17

Shinallatac angeltaca: “Tucuita Mandac Diosca: Ñuca acllashca llactacunaca achca allicunatami charinga. Cutinllatacmi Sión urcutaca cushichisha. Cutinmi Jerusalentaca acllashami” nishpa, caparishpa huillai» nirca.

ZACARÍAS 9:9

¡Sionpi causaccunalla, yallita cushicuichicyari! Jerusalenpi causaccunalla, cushicushpa caparichicyari. Riquichic, cancunata jatun mandacca mama burropac huahua maltón burritopimi cancunapacman shamunga. Paica cashcata ruhuac, quishpichic, cuyac shungumi canga.

2 CORINTIOS 1:4

Diosca llaquihuan caccunata cushichichunmi, ñucanchic tucui llaquicunapi cushichin.

1 TESALONICENSES 4:18

Chaimanta cai rimashcacunahuan caishuc chaishuc cushichinacuichic.