ISAÍAS 31:1 - Dios Rimashcata Quillcashcami

¹ ¡Aij, Egiptopi causaccunata ayudai ningapac urai riccunalla! ¡Aij, caballocunapi ric soldadocunapi, achca carretacunapi, sinchi caballocunapi shunguta churashpa “paicunaca ayudangallami” nishpa yuyaccunalla! Shina yuyacushpapish, israelcunapac jucha illac Diostaca mana yuyarincunachu. Mandac Diospac ayudata mana mañancunachu.

ISAÍAS 31:1 ပူးပေါင်းရင်းမြစ်များ

GÉNESIS 47:17

José chashna nicpica, Egipto runacunaca paicunapac caballocunatapish, ovejacunatapish, vacacunatapish, burrocunatapish Joseman curcami. Chashna cucpica, Joseca shuc huatapacmi micunata curca.

2 CRÓNICAS 16:7

Chai huatapimi, Dios ricuchishcata huillac Hanani Judá llactata jatun mandac Asapacman shamushpaca: «Canca, canta Mandac Diosta ayudachun mañanapac randica, Siria llacta jatun mandactami ayudai nishpa mañarcangui. Chaimantami Siria llactata jatun mandacpac soldadocunaca cambac maquimanta atishpa rirca.

2 CRÓNICAS 16:9

Mandac Diosca alli shunguhuan allita ruhuashpa, paita cazuccunaman tucui imatapish ruhuashpa ayudangapacmi tucui cai pachata ricucun. Canca mana yuyaita charic shinami ruhuashcangui. Chashna ruhuashcamantaca cunanmanta pachami ashtahuan canhuan macanacungapac shamungacuna» nirca.

JOB 39:11

¿Chai huagra fuerzasapa cashcamantaca yapungallami yuyanguichu? ¿Tucui trabajota chai huagrahuan tucuchi pudinguichu?

SALMOS 20:7

Shuctac gentecunaca carretacunapi, caishuccunaca caballocunapimi shunguta churancuna. Ashtahuanpish ñucanchicca, ñucanchicta Mandac Diospimi shunguta churanchic.

ISAÍAS 10:17

Israelcunapac luzca ninami tucunga. Jucha illac Diosca rupacuc ninami tucunga. Chashnami shuc punzhallapi cardoscunata, cashacunata rupachic shina tucuchinga.

ISAÍAS 2:7

Paicunapac llactaca cullqui, curi jundami. Paicuna ima sumac charinacunapish mana yupaipacmi. Paicunapac llactapica caballocunapish, carretacunapish mana yupaipac achcami.

ISAÍAS 20:5

Shina apacpimi, Etiopía llactapi shunguta churaccunapish, Egipto llacta sumacmi niccunapish pingaihuan musparinga.

ISAÍAS 22:11

Mauca tanquemanta yacuta japingapacmi ishcai jatun pirca chaupipi tanqueta allichircanguichic. Ashtahuanpish chai tanqueta ruhuac Diostaca mana cazurcanguichicchu. Chaita utcallapitac ruhuashcata mana yuyarircanguichicchu.

ISAÍAS 30:16

Ashtahuanpish cancunaca: «Caballocunapi callpashpa quishpirishunllami» nircanguichicmi. ¡Cancuna nishca shinallatac miticushpa callpanguichicmi! Shinallatac: «Yallita callpac caballocunapimi callpashun» nircanguichicmi. ¡Shina cacpipish, cancunata caticcunaca alli callpac caballocunallapitacmi catinga!

ISAÍAS 36:6

Canca carrizo caspita taunac shinami, Egiptopi causaccunapi shunguta churangui. Maijanpish chaipi shunguta churashpa, taunarictaca astilla maquipi yaicushpa chugrichic shinami, Egipto llactata jatun mandac Faraonca ruhuanga” nirca.

ISAÍAS 36:9

Egiptomanta carretacunapi, caballopi ric soldadocunapi shunguta churashpaca ñuca amopac soldadocunapuramanta yangalla soldadocunahuanpish, ¿ima shinatac sinchiyashpa macanacui pudinguiyari?

ISAÍAS 43:15

Mandac Dios ñucami, cancunapac jucha illac Dios cani. Israel llactata callarichic, cancunata Jatun Mandacmi cani» nin.

ISAÍAS 5:12

Jatun micuita ruhuashpa, vinota ubiashpa, arpacunapi, salteriocunapi, tamborcunapi, flautacunapi tocashpami, Mandac Dios ruhuashcataca mana ricuncuna, mana yuyarincuna.

ISAÍAS 57:9

Jatun mandacpacmanmi jambicunahuan, mishquilla ashnacuc-huan cahuirishpa rircangui. Huillaccunata caru llactaman cachashpami, Seolcaman cachac shina pingaichircangui.

ISAÍAS 64:7

¡Cambac shutita mañacca pipish mana tiyanchu! ¡Pipish canhuan cangapac mana sinchiyanchu! Chaimantami cambac ñahuitaca ñucanchicmanta pacarcangui. Ñucanchic mana allicunata ruhuashcacunallatac mandac shina, charicucpimi, anguyac shina, llaquita apachun saquircangui.

ISAÍAS 9:12

Chaimantami inti llucshina ladomantaca siriocunata, inti tigrana ladomantaca filisteocunata pushamunga. Paicunami israelcunataca shuc amullita shina ruhuashpa tucuchinga. Chashna llaquichishpapish Mandac Diosca nina japiric shina piñarishcataca mana pasachishcachu. Ashtahuanpish llaquichingaracmi.

ISAÍAS 9:13

Shina llaquichicpipish, paicunaca llaquichicpacmanca mana cutirircachu. Tucuita Mandac Diostaca mana mashcarcachu.

JEREMÍAS 17:5

Mandac Diosca: «Ñucamanta anchurishpa, huañuclla runapi shunguta churashpa causacca llaqui tucungatacmi. Paipac shungupish ñucamanta anchuricunmi.

JEREMÍAS 2:13

Ñuca acllashcacunaca cai ishcai mana allitami ruhuarca. Puntaca tucyacuc yacu shina, causaita cuc ñucatami saquirca. Chai quipaca yacu mana jundaric chictarishca jutcucunatami yacu tandarichun ruhuarca.

JEREMÍAS 37:7

«Israelcunata Mandac Dios ñucaca cancunata ñucaman tapuchun cachac Judá llactata jatun mandactaca: “Cancunata ayudangapac shamuc Faraonpac soldadocunaca Egiptollamantac cuti rigrinmi.

JEREMÍAS 42:14

Chaipac randica Egiptomanmi rishun. Chaipica jatun macanacuitapish mana ricushunchu, macanacuipi tocana trompetatapish mana uyashunchu. Yarcaipish mana tiyangachu. Chaipica allita causashun” nishpaca,

EZEQUIEL 17:15

Chashna ari nishca cashpapish mana cazushpami, maijan huillaccunata Egipto llactapi caballocunatapish, achca runacunatapish mañachun cacharca. Chashna ruhuashpaca, ¿allichu causanga? Ari nishcata paquic runaca, ¿quishpiringachu?

EZEQUIEL 29:16

Israelcunaca Egipto gentecunapi mana ashtahuan shunguta churangachu. Ashtahuanpish paicunata catishpa juchallishcataca mana yuyaringachu. Shina ruhuacpimi, ñucataca Mandac Dios cashcata yachangacuna nini” ninmi ningui» nirca.

DANIEL 9:13

Moisés mandashpa quillcachishca shinaca, cai tucui llaquicuna ñucanchicta japicpipish Mandac Diosta mana mañashcanchicchu. Cashcata nic rimashcatapish mana uyashcanchicchu. Millaita ruhuanatapish mana saquishcanchicchu.

OSEAS 11:5

Paicuna ñucapacman mana cutinata munashcamantami Egipto llactamanca mana cutinga. Ashtahuanpish Asiria llactapi causaccunami paicunata jatun mandac tucunga.

OSEAS 11:9

Ñucaca mana runachu cani, ashtahuanpish Mandac Diosmi cani. Ñucaca cancunapac chaupipi causac jucha illac Diosmi cani. Chaimanta mana Efraín aillutaca nina japiric shina piñarishpa llaquichishachu. Mana llaquichingapac yaicushachu.

OSEAS 14:3

Asiriocunaca ñucanchictaca mana quishpichingachu. Caballocunapipish mana montashunchu. Ñucanchicllatac ruhuashca dioscunataca jaicapi mana: “Caimi ñucanchic diosca” nishunchu. Taita mama illac huahuataca canllami llaquingui» nishpa mañaichicyari.

OSEAS 7:7

Tucui paicunami rupacuc horno shina, paicunapac juezcunataca tucuchirca. Jatun mandaccunapish tucuimi huañurca. Paicunapurapica shucllapish ñucata mañacca mana tiyanchu.

HABACUC 1:12

Mandac Dioslla, jucha illac Dioslla, canca, ¿manachu imapish manarac tiyacpi, ña tiyarcangui? ¡Shina cashcamantaca ñucanchicca mana huañushunchu! Mandac Dioslla, llaquichichunmi Babilonia runacunataca caipi churarcangui. Jatun Rumi shina Dioslla, canca llaquichinpacmi paicunataca cacharcangui.

HABACUC 3:3

Diosca Temán llactamantami shamun. Jucha illac Diosca Parán urcumantami shamun. Paipac sumaimana achicca jahua pachatami tapan. Cai pachapica paita alabashcami jundan.

ZACARÍAS 10:5

Mandac Dios ñucami paicunahuanca casha. Chaimantami paicunaca sinchi soldado piñaccunata saruc shina sinchi runacuna canga. Caballocunapi ric soldadocunaca pingaichishcami canga.

DEUTERONOMIO 17:16

Chai jatun mandacca mana achca caballota charina yuyaita charinachu can. Caballocunata charingaraicu israelcunata Egipto llactaman mana cachanachu can. Mandac Diosca: “Chai llucshishca ñantaca jaicapi mana cutinachu canguichic” nircami.

DEUTERONOMIO 20:1

Cancunata piñaccunahuan macanacungapac llucshishpa caballocunata, carretacunata achcata ricushpa, achca gentecunata ricushpaca, ama manchanguichicchu. Cancunaca Egipto llactamanta llucchimuc Mandac Dios-huanmi canguichic.