HEBREOS 7:27 - Dios Rimashcata Quillcashcami

²⁷ Jesusca mana shuctac curacuna shina puntaca paipac juchacunamanta, quipaca tucui gentecunapac juchacunamanta animalta Diosman cushpa, rupachicchu, ashtahuanpish Apunchic Jesucristoca huiñaipac shuc cutinlla huañushpami, paillatac Diosman curishpa huañurca.

Nuevo Testamento en Quichua Cañar 1996

²⁷ Jesusca mana caishuc curacuna shina puntaca paipac juchacunamanta, chai q'uipaca tucui gentecunapac juchacunamanta animalcunata Taita Diosman cushpa, rupachic cura shinachu, ashtahuanpish Apunchic Jesucristoca huiñaipac shuc cutinlla huañushpami, paillatac Taita Diosman curishpa huañurca.

HEBREOS 7:27 ပူးပေါင်းရင်းမြစ်များ

EZEQUIEL 43:19

Sadoc curapac huahua huahua levita curacunami ñucata servingapac cuchuyanga. Paicunamanca juchacunamanta cushca shuc becita cungui.

LEVÍTICO 16:11

Aaronca paipac juchamantapish, paipac familiapac juchamantapish Diosman cungapacmi becita apamuna can. Chashnami becitaca juchata pichachun huañuchinga.

LEVÍTICO 16:15

Chai quipaca israelcuna juchata pichachun cushca ovejata huañuchishca yahuartaca cari becipac yahuarhuan ruhuashca shinallatacmi pañohuan jarcachishca ñucapaclla chicanyachishca ucuman apamushpa, tapa jahuapipish, ñaupa ladopipish chirapanga.

LEVÍTICO 16:6

Quipaca Aaronca paipac juchata, paipac familiapac juchata pichachun cungapacmi shuc becita apamunga.

ROMANOS 6:10

Cristoca shuc cutinlla huañushpami tucui juchacunata atirca. Ña causarishpaca, Diospacllami causacun.

EFESIOS 2:22

Shinallatacmi cancunapish Jesucristohuan shuc shinalla cashpaca, tucuilla tandanacushpa, Diospaclla cac huasi shina tucunguichic. Chashna cacpica Diosmi paipac Espiritumanta chaipi causacun.

EFESIOS 5:2

Jesucristo ñucanchicta cuyac shinallatac, cancunapish cuyanacushpa causaichic. Paica Diosman cushpa rupachishca mishquiman ashnacuc shina cangapacmi pai quiquinllatac japi tucushpa, ñucanchicmanta huañurca.

TITO 2:14

Paica juchacunata anchuchishpa tucui millaimanta quishpichingapac, shinallatac paipaclla cashpa imapish allita ruhuaccuna cachunmi, ñucanchicmanta llaquita apashpa huañurca.

HEBREOS 5:1

Tucui jatun mandac curacunami, gentecunapuramanta Diospacta ruhuachun acllashca can. Paicunaca tucui gentecunapac juchacunamanta Diosman ofrendata cungapac, animalcunata huañuchishpa Diosman cungapacmi can.

HEBREOS 5:3

Chaimantami paipish urmanalla cashcamanta, paicunapac juchacunamanta, shinallatac tucui gentecunapac juchacunamanta animalcunata Diosman cushpa, rupachina can.

HEBREOS 8:4

Cai pachapica Moisés mandashca shina, Diosman cushpa, rupachic curacuna tiyanmi. Chaimanta paica cai pachapi cashpaca, curallapish mana canmanchu carca.

HEBREOS 9:12

Jesucristoca mana chivocunapac, becicunapac yahuarta Diosman cungapacchu Diospaclla chicanyachishca ucuman yaicurca, ashtahuanpish paipac quiquin yahuarta ñucanchicta huiñaita juchapi huatashcamanta cacharichingapacmi shuc cutinlla yaicurca.

HEBREOS 9:14

¡Apunchic Jesuspac yahuarcarin, tucuimanta yalli valishcami! Paica huiñaita causacuc Diospac Espirituhuan cashpami, ima millaita mana ruhuac cashpapish, pai quiquin Diosman curishpa huañurca. Paipac yahuarmi millai yuyaicunahuan mana allita ruhuashpa, causacucpi, causacuc Diosta servicta ruhuan.

HEBREOS 9:25

Jatun mandac curaca huatantami animal yahuarta Diosman cungapac Diospaclla chicanyachishca ucuman yaicun. Ashtahuanpish Jesusca mana cutin cutin yahuarta cungapacchu jahua pachamanca yaicurca.

HEBREOS 9:26

Chashna ruhuana cacpica, Apunchic Jesusca cai pachata ruhuashca punzhamanta pacha, tauca cutinmi huañuna canman carca. Ashtahuanpish Apunchic Jesusca cunan punzhacunapica, shuc cutinllami tucui gentecunapac juchacunata anchuchingapac, pai quiquinllatac Diosman curishpa huañurca.

HEBREOS 9:28

Apunchic Jesusca achca gentecunapac juchacunata pichangapacmi, shuc cutinlla pai quiquinllatac huañurca. Quipataca ña mana juchacunata anchuchingapacchu shamunga, ashtahuanpish paita shuyacuccunata quishpichingapacmi shamunga.

HEBREOS 9:7

Ashtahuanpish chai quipa ucumanca jatun mandac curallami huatapi shuc cutin yaicuc carca. Paicunaca quiquin juchamantapish, gentecuna mana yachashcamanta juchata ruhuashcamantapish animalta huañuchishca yahuarta Diosman cungapacmi yaicuc carca.