HABACUC 3:16 - Dios Rimashcata Quillcashcami

¹⁶ Chaita uyashpaca, ñuca shungu mancharcami. Rimacta uyashpaca, ñuca shimipish chucchurcami. Ñuca tullucunapish ismucuc shinami tucurca. Ñuca changacunapish chucchucurcami. Chashna cashpapish ñucanchicta llaquichiccunata llaquichi punzhatami ñucaca casilla shuyacuni.

HABACUC 3:16 ပူးပေါင်းရင်းမြစ်များ

JOB 30:17

Tutacunaca tullucamanmi nanan. Nanaicunaca manatac samarinchu.

JOB 30:30

Ñuca aicha caraca yanayashpami urman. Ñuca tullucunapish rupacunmi.

SALMOS 119:120

Cambac ñaupapica ñuca cuerpoca chucchucunmi. Can llaquichinataca manchacunimi.

SALMOS 91:15

Pai ñucata mañacpica, ñucaca uyashami. Pai yallita llaquihuan cacpica, ñucaca paihuanmi casha. Paita quishpichishpami alli nishca cachun ruhuasha.

PROVERBIOS 12:4

Yuyaisapa huarmica paipac cusapac corona shinami. Ashtahuanpish yuyai illac huarmica cusapac tulluta ismuchic shinami.

PROVERBIOS 14:30

Cushilla shunguca cuerpomanpish causaita cunmi. Ashtahuanpish shucpac charishcata munacca tullucunamanmi ungüita apamun.

ISAÍAS 21:3

Chaimantami ñuca huashaca nanacun. Shuc huarmita sajuarina nanai japic shinami llaqui japirca. Yallita llaquilla cashpami, mana uyai pudini. Yallita manchaihuan cashpami mana ricui pudini.

JEREMÍAS 23:9

Jeremiasca: «Llullashpa huillaccunamantaca shungu nanarishpa, yallita llaquirishpami tucui ñuca tullucunacaman chucchucuni. Jucha illac Mandac Dios rimashcata uyashpaca, paipac ñaupapi yuyai chingaricta vinota ubiashca runa shinami tucuni.

JEREMÍAS 30:7

¡Aij, chai punzhaca yalli llaquimi cagrin! Chashna llaquica jaicapi mana tiyashcachu. Jacobopac huahua huahuacunamanca yalli llaqui punzhami canga. Shina cacpipish, paicunataca quishpichishami» ninmi.

JEREMÍAS 4:19

Shina nicpimi Jeremiasca: «¡Aij, ñuca shungulla, ñuca shungulla! Ñuca shunguca nanaihuan pitirigrinmi. Ñuca shunguca yallitami saltacun. Jatun macanacuita huillac cornetapi tocashcatapish, yallita caparishcatapish uyashpaca, ¡ima shinatac upalla cashayari!

JEREMÍAS 5:15

Israelcunalla, cancunata llaquichichunca caru llactamantami ñaupa pachamanta causac, sinchi runacunata apamugrini. Paicunaca mana ricsishca rimaitami rimancuna. Paicuna rimashcataca mana entendinguichicchu.

LAMENTACIONES 1:13

Mandac Diosca jahua pachamanta ninata cachashpami, ñuca tullucunacaman rupachirca. Ñuca purina ñanpi tucllata churashpami huashaman cutichirca. Tucuita tucuchishpa saquishpami, punzhanta llaquihuan saquirca.

LAMENTACIONES 1:20

Mandac Dioslla, ñuca yallita llaquirishpa, shunguta nanachicuctaca ricuiyari. Canta mana cazushcata yuyarishpami ñuca shunguca yallita llaquirishpa nanacun. Canzhapica espadami gentecunataca tucuchicun. Ucupica huañuillami tiyan.

EZEQUIEL 3:14

Quipaca Diospac Espiritumi ñucata sinchiyachishpa pusharca. Ñucaca shungupi yallita llaquirishpami rircani. Ashtahuanpish Mandac Diospac maquica sinchita charirashpami ñucataca pusharca.

DANIEL 10:8

Shina ricpimi, ñucalla saquirishpa chai mancharinata muscuipi shina ricurcani. Chaipica fuerza illac saquirishpami, yallita irquiyashpa ñahuipish quilluyashca carcani.

DANIEL 10:9

Chai quipaca pai rimashcatami uyarcani. Chai rimashcata uyashpaca urai singa urmashpami sueñushpa saquirishca carcani.

DANIEL 8:27

Daniel ñucaca yallita irquiyashpami, maijan punzhacunata ungushca carcani. Ña alliyashpaca jatun mandacpac ima ruhuaicunatami ruhuashpa catircani. Ñuca muscuipi shina ricurishcata yuyarishpa manchaihuanmi carcani, pi chaimanta huillacca mana tiyarcachu.

HABACUC 3:2

Mandac Dioslla, can rimashcata uyashpaca mancharircanimi. Mandac Dioslla, can ruhuashcacunata ricushpa mana amirinimi. ¡Ñaupa huatacunapi ruhuashcata cunan punzhacunapi ricuchiyari! Can piñarishca cashpapish llaquiyari.

SAN LUCAS 21:19

Chashna llaquichicucpipish, tucui shunguhuan catirashpaca quishpiringuichicmi.