FILIPENSES 2:26 - Dios Rimashcata Quillcashcami

²⁶ Epafroditoca tucui cancuna ima shina cashcata ricugrina yuyaillami puricun. Ashtahuancarin pai ungushca cashcata cancuna yachashcamantami, mai llaquiricun.

Nuevo Testamento en Quichua Cañar 1996

²⁶ Epafroditoca tucui cancuna ima shina cashcata ricugrina yuyaillami puricun. Ashtahuancarin pai ungushca cashcata cancuna yachashcamantami, tucui shungumanta llaquiricun.

FILIPENSES 2:26 ပူးပေါင်းရင်းမြစ်များ

2 SAMUEL 13:39

Jatun mandac Davidca Amnón huañushcamanta ña cungarishpami, Absalonta ricuna munaihuan carca.

2 SAMUEL 24:17

Ángel gentecunata llaquichishpa tucuchicucta David ricushpami Mandac Diostaca: —Riqui, ñucaca juchallishcanimi, ñucami mana allita ruhuacca cani. Cai yangalla gentecunaca ¿Imatatac ruhuashcayari? Llaquichina cacpica Ñucata shinallatac ñuca huasi ucupurata llaquichiyari— nirca.

JOB 9:27

Ñucaca: “Nanaihuan aij ninata saquishpa, cushilla ñahuimi tucusha” nini.

SALMOS 69:20

Camishpami ñuca shungutaca yallita llaquichincuna. Urmashpa mana jataripacmi cani. Maijanpish ñucata llaquingapishchari yuyarcanimi. Shina cacpipish mana pi tiyarcachu. Maijanpish ñucata cushichingapishchari nishpami mashcarcani. Shina mashcashpapish mana tarircanichu.

PROVERBIOS 12:25

Shungu yallita llaquihuan cashpaca ima yuyaitapish chingachinllami. Ashtahuanpish allita rimashcaca cushichinmi.

ISAÍAS 61:3

Sión llactapi llaquilla causaccuna uchupahuan cahuirishca canapac randica, corona churashca cachun, llaquilla canapac randica, cushicuihuan cachun, shungupi llaquilla canapac randica, jahualla churanata churaric shina, cushilla cachunmi huillac cacharca. Paicunaca Mandac Dios sumaimana cashcata ricuchingapacmi, pai tarpushca encina yura shina cangacuna.

SAN MATEO 11:28

Aparishca, shaicushca shina causaccuna, tucuilla ñucapacman shamuichic. Ñucami cancunataca samachisha.

SAN MATEO 26:37

Jesusca Pedrotapish, Zebedeopac ishcai churicunatapish pushashpa, rishpami, shungupi yallita llaquiri callarirca.

HECHOS 21:13

Chashna jarcacpipish Pabloca: —¿Ima nishpatac chashna huacashpa, ñucata llaquichinguichic? Jerusalenpi huatashun nicucpipish, chaiman rishallami. Chaipi huañuchishun nicpipish, Apunchic Jesusmantaca huañushallami— nirca.

ROMANOS 1:11

Cancuna sinchi cric cachunmi, Diospac Espíritu yuyaita cushcata cancunaman huillangapac rinata munacuni.

ROMANOS 12:15

Cushilla caccunahuanca cushicuichic. Huacaccunahuanca huacaichic.

ROMANOS 9:2

Ñuca shungupica yallita llaquirishpami punzhanta nanaihuan cani.

1 CORINTIOS 12:26

Cuerpopi shuc parte llaqui tucucpica, caishuc partecunapish llaquirinmi. Shinallatac shuc parte allita japicpica, tucui partemi cushicun.

2 CORINTIOS 9:14

Dios mai cuyac cashcata cancuna ricuchishcamantami, tucui cuyaihuan cancunamantaca Diosta mañangacuna.

GÁLATAS 6:2

Caishuc chaishuc llaquicunata apanata ayudanacushpami, Cristo mandashcataca pactachinguichic.

EFESIOS 3:13

Shina cashcamanta ñuca cancunamanta llaquita apacucpipish ama llaquirishpa, ashtahuanpish ñaupaman catichunmi mañani. Cancunapac allipacmi cashna llaquicunata apacuni.

FILIPENSES 1:3

Cancunata yuyarishpaca, ñuca Diostami pagui nicunilla.

FILIPENSES 1:8

Jesucristo cuyac shinallatac, ñuca tucui shunguhuan cancunata cuyacushcataca Diosllatacmi yachan.

FILIPENSES 2:25

Shinallatac huauqui Epafroditotaca cachana alli caipac yuyachicpimi, cutichishpa cachagrini. Paimi llaquita apana cacpipish, mana manchashpa alli huillaitaca ñucahuan pacta huillacun. Ñucata ima ruhuanapipish ayudachunmi, cancunaca cachashca carcanguichic.

FILIPENSES 2:27

Paica huañunalaya, ancha ungushcatacmi carca. Ashtahuanpish Diosmi ñuca llaquita apacushca jahua ama ashtahuan llaquita apachun nishpa, paitapish ñucatapish llaquishpa, paitaca alliyachirca.

FILIPENSES 4:1

Chaimanta cuyashca criccuna, Apunchic Jesus-huan shuclla cashcamantaca, imapipish sinchi caichic. Cancunaca ñucata cushichiccuna, cancunamanta ñuca japina coronami canguichic. Ñucaca cancunata ricuna yuyaillami cani.

1 PEDRO 1:6

Chaimantami cancunaca ashacaman tucuilaya llaquicunata apana cacpipish, mai cushicuna canguichic.