FILIPENSES 2:1 - Dios Rimashcata Quillcashcami

¹ Cristo cancunata cushichicucpi, paipac cuyai cancunata sinchiyachicucpi Diospac Espiritupish cancunahuan cacpi, llaquinacushpa caishuc chaishuc cuyanacui tiyacpica,

Nuevo Testamento en Quichua Cañar 1996

¹ Cristo paipac c'uyaihuan cancunata sinchiyachishpa cushichicucpica, Diospac Espiritupish cancunahuanmi. Chaimantami caishuc chaishuc c'uyanacuipish, llaquinacuipish tiyan.

FILIPENSES 2:1 ပူးပေါင်းရင်းမြစ်များ

SALMOS 133:1

¡Huauquicunapura, panicunapura cuyanacushpa causana mai sumac cashcataca ricuichicyari!

ISAÍAS 16:11

Moab llactapi causaccunamantaca ñuca shunguca arpa huacac shinami llaquilla tucun. Kir-haresetpi causaccunamantaca tucui shunguhuanmi huacani.

SAN LUCAS 2:25

Simeón shuti runami Jerusalenpi causarca. Paica Diosta cazucpish, cashcata ruhuacpishmi carca. Paica israelcunata Dios quishpichingapac shamuctami shuyacurca. Diospac Espiritumi paihuan carca.

SAN JUAN 14:18

Mana cancunallata saquishachu, cancunapacman cutimushami.

SAN JUAN 14:27

Sumac cushicui causaitami cuni, sumac cushicui causaitami saquini. Ñucaca mana gentecuna cushca cushi causaitachu cuni. Chaimanta ama llaquirichicchu, ama manchaichicchu.

SAN JUAN 17:13

Can maipi cashcamanmi rini. Ñuca shinallatac paicunapish yallita cushicuchunmi, cai pachapi cashparac cashna mañani.

HECHOS 2:46

Punzhantami Diosta mañana huasipi tandanacuc carca. Shinallatac paicunapac huasicunapipish tandanacushpa, Jesús huañushcata yuyarishpa, cuyai shunguhuanmi micuc carca.

HECHOS 4:32

Criccunaca achca cashpapish, tucuimi shuc shungulla, shuc yuyailla carcacuna. Pi “caica ñucapacmi, chaica cambacmi” mana ninacucchu carca. Chaimantami ima charishcacunapish tucuipac carca.

ROMANOS 5:5

Diosca paipac Espirituta cachashpami, ñucanchic shungupi cuyaita churashca. Chaimantami mana yanga shuyacunchic.

ROMANOS 8:26

Ñucanchic irquiyashca cacpipish, Diospac Espiritumi ayudan. Ima shina Diosta mañanatapish mana yachanchicchu. Shina cacpipish, Diospac Espiritullatacmi llaquirishpa, ñucanchic mana rimaipac rimaicunahuan ñucanchicmanta mañacun.

1 CORINTIOS 12:13

Chaica, tucui ñucanchicmi Israel cashpa, mana Israel cashpa, servic, mana servic cashpapish, Diospac shuclla Espirituhuan bautizarishca canchic. Diosca chai Espiritullatatacmi yacuta ubiachic shina, curca.

1 CORINTIOS 15:31

Cuyashca criccuna, ñucaca tucui punzhacuna huañunalla cashpapish, cancuna Apunchic Jesucristota criccuna cashcamantami mai cushicuni.

1 CORINTIOS 3:16

Cancunaca Dios causana huasi cashcata, shinallatac Diospac Espiritupish cancunapac shungupi causacushcataca, ¿manachu yachanguichic?

2 CORINTIOS 13:14

Apunchic Jesucristo sumac cuyaita cucpi, Dios cuyacpi, shinallatac Diospac Espíritu shuc shinallatac ruhuacpi, cushilla causachunmi munani.

2 CORINTIOS 2:14

Diostaca pagui ninimi. Paimi ñucanchictaca Cristo Jesus-huan mishaccuna cashcata ricuchishpa punzhanta pushacun. Shinallatac mai llactapipish mishquilla ashnacuc shina Cristopac alli huillaica ñucanchicmantami huillaricun.

GÁLATAS 4:6

Ñucanchic ña paipac huahuacuna cacpica, Diosca paipac Churipac Espiritutami ñucanchic shunguman cacharca. Chai Espiritumi: “Ñuca Taitalla” nishpa mañachun ñucanchictaca yuyachicun.

GÁLATAS 5:22

Ashtahuanpish Diospac Espíritu yuyaita cushca causaccunaca cuyaccunami, cushi causaccunami, sumacta causaccunami, mana utca piñariccunami, llaquiccunami, cuccunami, Diospi shunguta churaccunami,

EFESIOS 4:4

Diospac Espirituca shucllami. Tandanacushca criccunapish shuc cuerpo shinami can. Diospish cancunata shuclla japina cashcata cushicushpa shuyachunmi cayarca.

FILIPENSES 1:8

Jesucristo cuyac shinallatac, ñuca tucui shunguhuan cancunata cuyacushcataca Diosllatacmi yachan.

FILIPENSES 3:3

Ashtahuanpish ñucanchicmi, Diospac Espíritu yuyaita cucpi Diosta shungumanta alli niccuna cashpa, Jesucristomanta cushicushpa, circuncisión ruhuashcatatac ricuchicunchic. Shina cashpami ñucanchicca aichapi imalla ruhuashcacunallapica mana shunguta churanchic.

COLOSENSES 2:2

Paicuna tucui shunguhuan crishpa, cuyanacushpa, sinchiyashpa catichunmi, chashnaca ruhuacuni. Chashna ruhuacpimi, Dios pacashca ima shina cashcataca tucui allita yachanga. Chaica Cristomi.

COLOSENSES 3:12

Diosca cancunata cuyashpami, paipaclla cachun acllarca. Chaimantami mushuc churanata churaric shina, shungumanta llaquishpa, cuyashpa, mana jatun tucushpa, mana piñarishpa, shinallatac cuyac shunguhuan causana canguichic.

HEBREOS 6:18

Dios paipac shutipi cusha nishcamanta, cashcata nic cashcamantaca, cushicushpa shuyashpa, pai huacaichichun munaccunaca cushicuitami japishcanchic.

1 PEDRO 1:2

Cancunataca Diosmi ña ñaupamanta pacha pai munashca shina paipaclla cachun acllashca. Diosca paita cuyashpa causachun, shinallatac Jesucristopac yahuarhuan chuyayachishca cachunmi, cancunataca paipac Espiritumanta paipacllatac ruhuashca. Dios mai cuyashpa, cancunaman sumac causaita yallita cushca cachun ninimi.

1 JUAN 3:24

Pai mandashcata pactachiccunaca paicunapish Dios-huan, Diospish paicunahuanmi shuclla causancuna. Shina cacpimi pai ñucanchic-huan cashcataca, pai cushca Espiritullatac yuyaita cucpi yachanchic.

1 JUAN 4:12

Diostaca jaicapi pipish mana ricushcachu. Shina cacpipish caishuc chaishuc-huan cuyanacushpa causacpica, Diosca ñucanchic-huanmi causan. Chashna cuyanacushpami, Dios cuyac cashcataca ashtahuan ricuchinchic.

1 JUAN 4:16

Chashnami Dios ñucanchicta cuyac cashcata yachashpa crinchic. Diosca cuyacmi. Maijanpish Diospac cuyaita charicca Dios-huanmi shinallatac Diospish paihuanmi can.