EZEQUIEL 6:9 - Dios Rimashcata Quillcashcami

⁹ Cancunapuramanta mana huañushpa saquiriccunaca shuctac llactacunapi prezu causacushpami, paicunapac shungupi huainayac shina, ruhuashcalla dioscunata paicunapac shungupi munashpa, ñucamanta anchuringa. Chaimantami ñuca ima shina llaquichishcata yuyaringa. Paicuna millana juchacunata ruhuashcata yuyarishpaca, yallita pingangami.

EZEQUIEL 6:9 ပူးပေါင်းရင်းမြစ်များ

2 REYES 16:10

Chai quipami jatun mandac Acazca Asiria llactata jatun mandac Tiglat-pileserta Damasco pueblopi tupangapac rirca. Chaiman chayashpami, jatun mandac Acazca Damascopi tiyac altarta ricushpa, chai altar mashna medishcata ima shina cacta dibujashpa, Urías curaman cuchun cacharca.

JOB 42:6

Chaimantami yallita llaquirishpa, ñuto allpapi, uchupapi tiyarini» nirca.

SALMOS 137:1

Babilonia llacta yacu ladocunapi tiyarishpami, Sión pueblota yuyarishpa huacac carcanchic.

SALMOS 78:40

¡Tauca cutinmi shitashca pambapi piñachircacuna! ¡Imapish mana tiyac pambapimi llaquichircacuna!

ISAÍAS 43:24

Mishquillata ashnacuctapish ñucaman mana randircanguichu. Huiratapish mana ñucaman cushpa rupachircanguichicchu. Chaipac randica cancunapac juchacunatami ñucaman apachic shina cushpa llaquichircanguichic. Millaita ruhuashpa causashpami, ñucata shaicuchircangui.

ISAÍAS 63:10

Ashtahuanpish paicunaca mana cazushpami, paipac jucha illac Espirituta piñachirca. Chaimantami Diosca paicunata piñashpa, paicunahuan macanacurca.

ISAÍAS 64:6

Tucui ñucanchicmi mapayashca runa shina canchic. Ñucanchic cashcata ruhuashcapish mapa llachapa shinami. Tucui ñucanchicmi chaquishca panga shina urmashcanchic. Ñucanchic mana allita ruhuashcallatacmi huaira shina aparca.

ISAÍAS 7:13

Shina nicpimi Isaiasca: —Davidpac huahuacuna uyaichic. ¿Cancunaca runata piñachina ashalla cacpichu, ñuca Diostapish piñachicunguichic?

JEREMÍAS 3:13

Mandac Dios ñucatami mana cazushcangui. Chai mana allita ruhuashcata yuyarishpa llaquiriyari. Jatun yura ucucunapimi mana ricsishcacunahuan huainayarcangui. Ñuca cayacpica, manatac uyarcanguichu. Chaitaca Mandac Dios ñucami nini.

JEREMÍAS 3:6

Jatun mandac Josías mandacui punzhacunapi Mandac Dios rimashpaca: «Mana cazuc israelcuna, ¿imata ruhuashcataca ricushcanguichu? Paicunaca lomacunapi, jatun yura ucucunapimi cullquimanta huainayac huarmi shina juchallirca.

JEREMÍAS 51:50

Mandac Diosca: «¡Jatun macanacuipi mana huañushpa, saquirishcacunaca mana samarishpa, utca callpaichicyari! Carupi cashpapish Mandac Diosta yuyaringuichicyari. Jerusalentaca cancunapac yuyaipi charinguichic» ninmi.

EZEQUIEL 12:16

Paicunapuramantaca ashallatami jatun macanacuipi yarcaihuan, ungüihuan huañunamantaca quishpichisha. Paicunami mai llactaman rishpa, yalli millana juchacunata ruhuashcata huillanga. Shina huillacpimi, ñucataca Mandac Dios cashcata yachangacuna” ninmi ningui» nirca.

EZEQUIEL 16:43

Can huambrarac cashpa, ima shina causacushcata mana yuyarishpami, cai tucui millaicunata ruhuashpa, ñucata llaquichircangui. Chashna millaita ruhuashcamantami ñucapish cantaca yallita llaquichisha. Canca yallita millaicunata ruhuashpami, yallita ñucata piñachircangui.

EZEQUIEL 16:61

Cambac punta ñañacunata, quipa ñañacunata cambac huahuacuna cachun ñuca cucpica, can ima shina causashcata, ima shina purishcata yuyarishpa pinganguimi. Mana canhuan ari nishcamantachu, paicunaca cambac huahuacuna shina canga.

EZEQUIEL 16:63

Can tucui millaita ruhuashcata perdonashca quipami, chaicunata yuyarishpa pingangui. Ña mana pingashpa rimaringuichu. Chaitaca Mandac Dios ñucami nini” ninmi ningui» nirca.

EZEQUIEL 20:24

Paicunaca ñuca imata ruhuachun nishcacunatapish, ñuca mandashcacunatapish mana cazurcachu, samana punzhatapish yangapi churashpami, paicunapac taitacunapac ruhuashcalla dioscunata yuyarishpa causarca.

EZEQUIEL 20:28

Maquita alzashpa, cushami nishca llactaman pushamucpica, chaipi tiyac jatun lomacunata, jatun yuracunata ricushpami, animalcunata cushpa rupachirca. Mishquilla ashnacuc inciensotapish rupachircami, vinotapish cushpa tallircami. Chashnami ñucataca yallita piñachirca.

EZEQUIEL 20:43

Chai llactapi causacushpami cancunaca utcapi ima shina causashcata, imata ruhuashpa mapayashcata yuyaringuichic. Shinami cancuna ruhuashca juchacunataca cancunallatac millanguichic.

EZEQUIEL 20:7

Chai ruhuashcalla dioscunata cancunapac ñaupamanta anchuchichic. Egiptopi tiyac ruhuashcalla dioscunahuan ama mapayaichicchu. Ñucami cancunata Mandac Dios cani nircani.

EZEQUIEL 23:30

Shuctac llactapi causaccunahuan huainayashcamanta, paicunapac ruhuashcalla dioscunata adorashpa mapayashcamantami cai llaquicunaca japinga.

EZEQUIEL 5:13

Chashnami ñuca yallita piñarishcataca paicunata llaquichishpa pasachisha. Chashna llaquichishpa, shungupi cushicucpimi, Mandac Dios ñucaca ñucapaclla cachun munac cashcataca yachanga.

EZEQUIEL 6:10

Chaimantami ñucataca Mandac Dios cashcata, shinallatac llaquichishami nishpa mana yanga nicushcata yachangacuna” ninmi ningui» nirca.

EZEQUIEL 7:16

Maijan llaquimanta quishpirishcacunaca pambapi causac paloma shinami, urcucunapi miticugringa. Chashnami paicunallatac millaita ruhuashcamantaca huacashpa ringacuna.

OSEAS 11:8

Efraín aillulla, ¿cancunataca imatac shitashpa saquishayari? Israelcunalla, ¿imatac shuccunapac maquipi saquishayari? Cancunataca, ¿imatac Adma llactata shina, mana cashpaca Zaboím llactata shina llaquichishayari? Ashtahuanpish cancunataca shungupi nanarishpami yuyaricunilla.

AMÓS 2:13

Ñucaca cancunataca achca gavillata jundachishca carreta saruc shinami sarusha.

MIQUEAS 5:13

Rumimanta ruhuashca dioscunatapish, imaman ricchac dioscunatapish cancunapac chaupillapitacmi tucuchisha. Shina ruhuacpimi, cancuna ruhuashca dioscunapac ñaupapica mana ashtahuan cumuringuichic.

ZACARÍAS 10:9

Ñuca shuctac llactacunaman caita chaita cachacpi, paicuna caru llactapi causacushpapish ñucataca yuyaringami. Paicuna chaipi huahuacunahuan causacushpapish cutimungami.

NÚMEROS 15:39

Chai flecoscunapi murucunata huarcuchishcata ricushpaca, ñuca mandashcacunata pactachinata yuyarishpami paicuna ricushpa, shungupi munanamanta jarcaringa.

2 PEDRO 2:14

Maijan huarmita ricushpaca, huainayana yuyaillami cancuna. Juchallinataca manatac shaicuncunachu. Manarac sinchi criccunataca pandachincunami. Paicunaca tucuita atishpa imatapish charinallata munaccuna, shinallatac Dios mana ricunayachishca gentecunami can.