EZEQUIEL 38:9 - Dios Rimashcata Quillcashcami

⁹ Canca huairahuan tamya ric shina ringui. Cambac tucui soldadocunahuan, achca gentecunahuan rishpa, puyu shina, chai llactata tapangui.

EZEQUIEL 38:9 ပူးပေါင်းရင်းမြစ်များ

ISAÍAS 25:4

Canca huacchacunapac jarcarinami cangui. Imata mana chariccuna llaquihuan cacpica, canmi jatun torre shina pacarcangui. Canca tamya huairamantaca pacarcanguimi. Inti rupachinamantaca llandurcanguimi. Mana llaquic runacunapac samai huaira shina shamushpapish patapi huactaric shinami tucun.

ISAÍAS 28:2

Riquichic, Mandac Diosca manchana rundu shina, jatun acapana huaira shina, pi mana jarcaipac yacu shina, imatapish tucuchiclla, jatun poderyuc runatami cachan. Paimi cai llactataca pambaman urmachinga.

ISAÍAS 5:28

Paicunapac flechacunapish alli mulashcami canga. Arcocunapish allichishcami canga. Caballocunapac shillucunaca yacu rumi shina sinchimi canga. Carretacunapac ruedacunaca acapana huaira shinami callpanga.

JEREMÍAS 4:13

Piñac runacunaca puyu huichai shamuc shina, carretacunaca acapana huaira shinami shamun. Caballocunaca angata yallimi callpan. Chashna shamucpica cancunaca: “¡Aij, ñucanchiclla, imachari tucushun!” ninguichicmi.

EZEQUIEL 13:11

Chai pircata turuhuan llutaccunataca: Pircaca urmangami ningui. Shinallatac manchana tamyami shamunga. Rumi shina rundu shamushpami chai pircataca urmachinga. Jatun acapana huairami chai pircataca urmachinga.

EZEQUIEL 30:18

Jatun tucushca Egipto llactata llaquichicui punzhami Tafnes llactapica punzha tutayanga. Chaipimi jatun tucushca mandacca tucuringa. Chai llactataca manchana puyumi tapanga. Muyundi uchilla llactapi causaccunataca prezumi apanga.

EZEQUIEL 38:16

Puyu shina rishpa, ñuca acllashcacunata tucuita tapashpa llaquichingui. Jatun mandac Goglla, quipa punzhacunapimi shuctac llactacunapi causaccunapac ñaupapi ñuca jucha illac cashcata ricuchichun, ñuca acllashcacunata llaquichichun cantaca ñucallatac cachasha.

DANIEL 11:40

Ashtahuanpish tucuri punzhacunaca ura llacta jatun mandacmi paihuan macanacungapac shamunga. Chashna shamucpimi, jahua llacta jatun mandacca carretacunahuan, caballopi ric soldadocunahuan, barcocunahuan yacu jundamuc shina macanacungapac shamunga. Chashna yacu jundamuc shina shamushpami, llactacunaman yaicushpa tucuchinga.

JOEL 2:2

¡Chai punzhaca pura tutami tucunga! ¡Puyushca llandu punzhami canga! ¡Tutamanta achicyachic luz shinami, sinchi runacunaca lomacunata shamunga! ¡Chashnaca ñaupa huatacunapish mana ricurishcachu! ¡Quipamanpish, huahua huahuacunacaman chai shinaca mana tiyangachu!

APOCALIPSIS 20:9

Chaicunaca tucui cai allpata quillpashpami, Diospaclla caccuna causana Dios cuyashca pueblota muyushpa shayarircacuna. Ashtahuanpish jahua pachamanta nina urmashpami, tucui tucuchirca.