EZEQUIEL 22:4 - Dios Rimashcata Quillcashcami

⁴ Huañuchishcamanta, ruhuashcalla dioscunata adorashpa mapayashcamantami juchanchishca cangui. Chashnami can tucurina punzhacunata quichquiyachishpa, tucurina huatacunapi cangui. Chaimantami cantaca mana alli nishpa rimachun, burlashpa asichun shuctac llactapi causaccunaman curcani.

EZEQUIEL 22:4 ပူးပေါင်းရင်းမြစ်များ

1 REYES 9:7

ñucami israelcunataca paicuna causachun ñuca cushca llactamanta llucchishpa cachasha. Shinallatac ñuca shutipi mañana ñucapac cachun chicanyachishca cai huasitapish ñuca ñaupamanta anchuchishami. Chashna ruhuacpimi, israelcunataca shuc llactacunapi causaccunaca parlanacushpa asingacuna.

2 REYES 21:16

Judá gentecunata juchata ruhuachishca jahuami Manasesca mana faltayuc gentecunata huañuchishpa, Jerusalenpica caishuc ladomanta chaishuc ladocaman yahuarta yallita jicharca.

2 CRÓNICAS 7:20

ñucami cancunaman cushca llactamanta llucchishpa cachasha. Shinallatac ñuca shutipi mañana ñucapaclla cachun chicanyachishca cai huasitapish ñuca ñaupamanta anchuchishami. Shina ruhuacpimi, tucui llactapi causaccuna parlanacushpa burlashpa asingacuna.

SALMOS 79:4

Ñucanchic vecinocunapac camishcami canchic. Ñucanchic muyundi llactapi causaccunapac burlashpa asishcami canchic.

JEREMÍAS 18:16

Chashnami paicunapac llactaca llaquinayaita tucuchicun. Tucui causaipi yallita burlashpa asina llactami tucunga. Maijanpish chai llactata pasacushpaca mancharishpa, umata cuyuchishpami pasanga.

JEREMÍAS 24:9

Paicunataca tucui llactacunapi causaccuna asichun, mancharishpa parlanacuchun, yuyarina parlocunata paicunamanta llucchishpa, burlachunmi saquisha. Chashnami mai llactaman ñuca cachacpipish, llaqui tucunga.

JEREMÍAS 44:8

Cancunaca Egipto llactapi causangapac yaicumushpaca cancuna ruhuashca shuctac dioscunaman inciensota rupachishpa, ñucata piñachishcamantami cancunallatac tucuringuichic. Shinami shuctac llacta gentecunapac mana alli nishca, burlashca causanguichic.

EZEQUIEL 16:57

Can millaita ruhuashcata manarac ricuchicpimi, chashna carcangui. Cunanca Siria llactapi, Filistea llactapi causaccunamari canta burlancuna. Maipi cashpapish cantaca millancunami.

EZEQUIEL 21:28

Huañunalla runa, canca: “Mandac Dios amonitacuna mana allita rimashcamanta rimashpaca: Cancunata huañuchingapacmi espadaca huacaichinamanta llucchishca tiyacun. Tucui tucuchishpa jagan nicungapacmi alli mulashca tiyacun.

EZEQUIEL 22:2

«Huañunalla runa, chai pueblopi causac huañuchic runacunataca, ¿manachu juchanchigringui? Paicuna millaita ruhuashcataca, ¿manachu ricuchigringui?

EZEQUIEL 23:32

Chaimantami Mandac Diosca: Cambac ñañaman cushca ubiana shina llaquillahuantacmi llaquichisha. Chai ubiana vasoca ancho, shinallatac jatunmi can. Shuctac llactapi causaccunaca burlashpami cantaca asinga.

EZEQUIEL 23:7

Paicunahuanmi huainayashpa, mana allita ruhuarca. Paicunaca Asiria llactamanta ashtahuan acllashca runacunami carca. Shinallatac paicunapac ruhuashcalla dioscunata adorashpami mapayarca.

EZEQUIEL 24:7

Cai llactaca yahuarpi cahuirishcami. Chai yahuarta allpa tapachunpish mana allpapi tallircachu, ashtahuanpish llambuclla rumi jahuapimi tallishca.

EZEQUIEL 24:8

Ñuca piñarishpa, paicuna llaquichishca shina llaquichingapacmi, chai yahuartaca llambuclla rumi jahuapi tallircani. Chaipica mana ñuto allpa tapangachu.

EZEQUIEL 36:15

Shuctac llactapi causaccunapish ña mana ashtahuan camishpa rimangachu, ña mana burlashpa asingachu. Huahuacunapish mana ashtahuan huañungachu. Chaitaca Mandac Dios ñucami nini” ninmi ningui» nirca.

DANIEL 9:16

Mandac Dioslla, cashcata ruhuac cashca shinallatac Jerusalenmanta, cambaclla chicanyachishca urcumanta cambac nina japiric shina yallita piñarishcata anchuchiyari. Ñucanchic juchacunamanta, ñucanchic taitacuna millaita ruhuashcamantami ñucanchic muyundipi causaccunaca Jerusalentapish, can acllashcacunatapish burlashpa rimancuna.

LEVÍTICO 26:32

Llactatapish chushacllatami saquisha. Cancunata piñaccuna causangapac shamushpaca, mancharishpami saquiringa.

NÚMEROS 32:14

Cunan cancunapish millaita ruhuac juchayuc taitacunapac churicuna cashpami, ashtahuan Dios-huan israelcunahuan piñanacuchishcanguichic.

DEUTERONOMIO 28:37

Mandac Dios mai llactacunaman apacpipish, chai llactapi causaccunapac burlashcalla, asishcallami canguichic.

DEUTERONOMIO 29:24

Chaita tucui llactacunapi causaccuna tapushpaca: “¿Imamantatac Mandac Diosca cai llactataca cashna ruhuarca? ¿Imamantatac Diosca nina japiric shina piñarirca?” ningami.

1 TESALONICENSES 2:16

Mana israelcuna quishpirichun, ñucanchic huillashun nicpipish mana saquinchu. Chashnami ashtahuan juchayuc tucuncuna. Chaimantami Diosca yallita piñarishpa llaquichinga.