EZEQUIEL 13:9 - Dios Rimashcata Quillcashcami

⁹ Manapish ricushpa yangata rimaccunatapish, llullac huillaccunatapish ñucaca piñashami. Paicunaca ñuca acllashca israelcunahuan mana tandanacungachu. Israelcunapac shuticunata quillcana libropipish mana quillcashcachu canga. Israel llactamanpish mana cutingachu. Chashna ruhuacpimi, ñucataca Mandac Dios cashcata yachanguichic.

EZEQUIEL 13:9 ပူးပေါင်းရင်းမြစ်များ

1 REYES 13:18

Shina nicpimi, caishuc runaca: —Ñucapish can shinallatac Dios ima nishcata huillacmi cani. Mandac Dios cachashca shuc ángel shamushpami ñucataca: “Tandata micuchun, yacutapish ubiachun, cambac huasiman pushamugri” nishpa cacharca— nirca. Cai rimaicunataca llullashpami nirca.

ESDRAS 2:59

Tel-mela, Tel-harsa, Querub, Addán, Imer pueblocunamanta cutimuccunaca pi huasi ucupura cashcatapish, pi aillu cashcatapish mana ricuchi pudircacunachu.

NEHEMÍAS 7:62

Delaiaspac, Tobiaspac, Necodapac huahua huahuacunaca sucta patsac chuscu chunga ishcaimi carca.

NEHEMÍAS 7:64

Paicunapac shuticuna paicunapac ñaupa taitacunapac shuticunata quillcashcapi mashcacpica, mana ricurircachu. Chaimantami curacunapurapi canamantaca anchuchirca.

SALMOS 101:7

Ñuca mandana huasipica umac millai shungu runaca mana causangachu. Llullata rimac runaca ñuca ñaupapica mana causangachu.

SALMOS 69:28

Shuticunatapish causaccunapac quillcashca libromanta anchuchishca cachun. Shinallatac cashcata ruhuaccunahuan pactaca ama quillcashca cachun.

SALMOS 69:5

Dioslla, ñuca yuyai illac cashcataca canllatac yachanguimi. Ñuca juchacunapish mana pacaipacchu.

SALMOS 87:6

Mandac Dios, gentecunapac shuticunata quillcashpaca: «Caipish chaipimi huacharishca» ningami.

SALMOS 95:11

Chashna yallimana piñarishpami ñuca samachina llactapica manatac yaicungacunachu nircani» nirca.

ISAÍAS 4:3

Shinallatac Sionpi, Jerusalenpi saquirishcacunaca Diospaclla chicanyachishca nishcami canga. Jerusalenpi saquirishcacunapac shutita quillcashcami canga.

JEREMÍAS 14:15

Chaimantami Mandac Dios ñucaca chai manapish ñuca cachacpi rishpa huillaccunataca: “Jatun macanacuipish, yalli yarcaipish mana tiyangachu” nishpa, ñuca shutipi llullaccunaca paicunaracmi jatun macanacuipi yarcaihuan huañunga.

JEREMÍAS 17:13

Israelcuna shunguta churana Mandac Dioslla, tucui canta cungariccunaca pingaichishcami canga. Yacu llucshicuc shina, causaita cuc Mandac Diosmanta anchuriccunaca ñuto allpapi quillcashca shinami canga.

JEREMÍAS 23:20

Mandac Diosca pai yuyashca shinata ruhuashpa, pactachingacamanmi pai piñarishcataca manatac pasachinga. Quipa punzhacunami chaicunataca allita yachanguichic» nirca.

JEREMÍAS 4:9

Mandac Diosca: «Chai llaqui punzhacunapica, jatun mandacpac shungupish, pai churashca mandaccunapac shungupish yallita manchaihuanmi shaicushca shina tucunga. Curacunapish mancharishpami musparinga. Ñucamanta huillaccunapish manchaihuan chucchungami» ninmi.

EZEQUIEL 11:10

¡Cancunaca jatun macanacuipimi huañunguichic! Israel llacta linderocunapimi cancunataca taripashpa llaquichisha. Chashna ruhuacpimi, ñucataca Mandac Dios cashcata yachanguichic.

EZEQUIEL 12:20

Gentecuna causacuc llactacunapish tucuimi tucuchishca canga. Pambacunaca llaquinayaitami shitashca saquiringa. Chashna ruhuacpimi, ñucataca Mandac Dios cashcata yachangacuna nini” ninmi ningui» nirca.

EZEQUIEL 13:14

Chashnami cancuna turuhuan llutashca pircataca urmachishpa, tucui chingachisha. Callari rumicunapish ricunallami saquiringa. Chai pirca urmacpica, tucuimi huañunguichic. Chashna ruhuacpimi, ñucataca Mandac Dios cashcata yachangacuna.

EZEQUIEL 13:23

Chaimantami muscuipi shina yangalla ricunatapish mana ricunguichic. Mana llullashpa huillanguichic. Ñuca acllashcacunataca cancunapac maquimantami cacharichisha. Shina ruhuacpimi, ñucataca Mandac Dios cashcata yachanguichic” ninmi ningui» nirca.

EZEQUIEL 20:38

Chashnami cancunapuramantaca ñucata mana cazushpa cariyaccunata anchuchisha. Paicunaca mana Israel llactamanca yaicungacunachu. Shina ruhuacpimi, ñucataca Mandac Dios cashcata yachanguichic.

DANIEL 12:1

Chai punzhacunaca cambac llactapi causaccunata ayudangapacca mandac Miguelmi shamunga. Chai punzhacunapica cai jatun llactacuna callarishcamanta pacha jaicapi mana tiyashca jatun llaquicunami tiyanga. Shina cacpipish, chai punzhacunapica tucui shuticunata libropi quillcachishca cambac llactamanta caccunaca quishpiringami.

OSEAS 4:5

Punzha pachami llaquipi urmanguichic. Ñucamanta huillacpish cancunahuanmi llaquipi urmanga. Cancunapac mamapish chingaringami

OSEAS 9:3

Efraín ailluca Mandac Dios cushca llactapica mana saquiringachu. Ashtahuanpish Egiptoman, Asiria llactamanmi cutinga. Chaipimi millana micunata micunga.

MIQUEAS 3:5

Mandac Diosca llactacunata pandachishpa huillaccunata rimashpaca: «Paicunaca: “Micuna tiyacpica, cushi causaimi tiyanga. Ashtahuanpish micuna mana tiyacpica, macanacuimi tiyanga” nincunami.

MIQUEAS 3:6

Chaimantami tutaca ña mana ñuca ima nishcataca uyanga. Shamuc punzha ima tucunatapish mana yachangachu. Chai huillaccunapacca intipish tigrangami, punzhapish tutayangami.

SAN LUCAS 10:20

Shina cacpipish, ama supaicuna cazushcallamanta cushicuichicchu, ashtahuanpish cancunapac shuticuna jahua pacha libropi quillcashca cashcamanta cushicuichic— nirca.

FILIPENSES 4:3

Shinallatac can ñucahuan Diospacta ruhuacuc huauquitapish: “Chai panicuna alli tucuchun rimashpa cui” ninimi. Chai panicunaca huauqui Clementendi, shinallatac caishuc huauquicunandicmi pi imata nicucpipish, mana manchashpa alli huillaitaca ñucahuan pacta huillarcacuna. Paicunapac shuticunaca huiñaita causangapac rina libropimi quillcashca tiyacun.

HEBREOS 12:23

jahua pacha libropi quillcashca, Diospac punta huahuacuna tandanacushcaman chayarcanguichic. Shinallatac tucuita taripashpa ricuchic Diospacman, cashcata ruhuaccunata Dios allita ruhuashca almacunapacmanmi chayarcanguichic.

APOCALIPSIS 13:8

Tucui cai pachapi causaccunami chai animaltaca “allimari cangui” nircacuna. Chaicunaca cai pachata Dios ruhuashca punzhamanta pacha huiñaita causangapac rina, huañuchishca cac Pactalla Oveja charicuc libropi shutita mana quillcashcacunami can.

APOCALIPSIS 19:20

Chai manchana animaltapish, llullashpa huillactapish prezumi japircacuna. Chai llullashpa huillacca chai manchana animalpac ñaupapimi pi mana ruhuaipaccunata ruhuashpa ricuchic carca. Cai ruhuashcacunahuanmi chai llullashpa huillacca manchana animalpac shutita frentepi chariccunatapish, shinallatac chai animalman ricchata alli niccunatapish umashca carca. Chai ishcaicunataca causactami azufrehuan rupacuc nina cuchapi shitashca carca.

APOCALIPSIS 20:12

Chaipica huañushcacunatami jatuncunatapish, uchillacunatapish mandashpa tiyarinapac ñaupapi shayacucta ricurcani. Shinallatac librocunapish pascashcami carca. Huiñaita causangapac rina libropi quillcashcatapish pascashcatami ricurcani. Chai huañushcacunaca paicuna imata ruhuashca librocunapi quillcashca cashca shinami taripashca carca.

APOCALIPSIS 20:15

Huiñaita causangapac rina libropi mana quillcashca cacca, rupacuc nina cuchapimi shitashca carca.