ESDRAS 6:14 - Dios Rimashcata Quillcashcami

¹⁴ Cutin Judá llactapi causaccunata mandaccunaca Dios ima nishcata huillac Hageopish, Iddopac churi Zacariaspish, huillashca shinallatacmi chai huasita shayachishpa, tucui alli ruhuarcacuna. Chashnami israelcunapac Dios, shinallatac Persia llactata jatun mandac Ciro, Darío, Persia Artajerjes mandashca shinallatac chai huasita shayachirca.

ESDRAS 6:14 ပူးပေါင်းရင်းမြစ်များ

ESDRAS 3:8

Jerusalenpi causac Diospac huasiman cutimushca ishcai huata callari ishcai quilla tucucpimi, Salatielpac churi Zorobabelpish, Josadacpac churi Jesuapish, caishuc huauquicunapish, curacunapish, levitacunapish, tucui prezu cashcamanta Jerusalenman cutimushcacunapish Mandac Diospac huasita shayachi callarircacuna. Diospac huasita shayachiccunata pushachunca ishcai chunga huata yallita charic levitacunatami churarca.

ESDRAS 4:24

Chaimantami Diospac huasita Jerusalenpi shayachinaca jarcarirca. Persia llactata jatun mandac Darío ishcai huatata mandangacamanmi chaipi saquirirca.

ESDRAS 4:3

Shina nicpimi, Zorobabelpish, Jesuapish, ñaupa taitacunapac huasi ucupura israelcunata mandaccunapish rimashpaca: —Ñucanchic Diospac huasitaca mana cancunahuan shayachisha ninchicchu. Ashtahuanpish Persia llactata jatun mandac Ciro mandashca shinami, israelcunata Mandac Diospac huasitaca ñucanchiclla shayachina canchic— nirca.

ESDRAS 5:1

Hageohuan, Iddopac churi Zacarias-huanmi Dios ima nishcataca Judá llactapi, Jerusalenpi causaccunaman israelcunapac Diospac shutipi huillarca. Diosca paicunahuanmi carca.

ESDRAS 5:13

Shina cacpipish, Babilonia llactata jatun mandac Ciro punta huatata mandacushpami Diospac huasita cutin shayachichun, mandarca.

ESDRAS 5:2

Shina huillacpimi, Salatielpac churi Zorobabelpish, Josadacpac churi Jesuapish Diospac huasita Jerusalenpi cutin shayachi callarirca. Shinallatac Dios ima nishcata huillaccunapish paicunata ayudarcacunami.

ESDRAS 6:3

«Jatun mandac Ciro Babilonia llactata mandai callari huatami jatun mandac Ciro Jerusalenpi causac Diospac huasita cutin shayachichun mandan. Chai mandashcapica: Callari rumita churashpa pircata ruhuashpa Diospac huasita cutin shayachichic. Chai huasipimi animalcunata Diosman cushpa huañuchina canga. Altomanca ishcai chunga canchis metro, anchomanpish ishcai chunga canchis metromi canga.

ESDRAS 6:8

Diospac huasita cutin shayachichun Judá llactata mandaccunata ayudachunmi cancunataca mandani. Chai huasi ruhuana ama jarcarichunca, jatun yacu chimba ladopi causaccuna cushca impuestota, jatun mandacpac ima valishcacunata randichun cunguichic. Pacta cungaringuichicman.

ESDRAS 7:1

Jatun mandac Artajerjes, Persia llactata mandacui punzhacunami Seraiaspac churi Esdras curaca Babilonia llactamanta chayamurca. Seraiasca Azariaspac churi, Azariasca Hilciaspac churi

ESDRAS 9:9

Ñucanchic chashna servishpa causacucpipish, ñucanchic Dioslla, mana saquishpami, Persia llactata jatun mandacpac ñaupapipish ñucanchicta llaquishcata ricuchircangui. Cambac huasi tigrashcata, urmashcata cutin shayachichunmi causaita curcangui. Judá llactapipish Jerusalenpipish cuidashcanguimi.

NEHEMÍAS 6:15

Jerusalén muyundi pircataca Elul quilla ishcai chunga pichca punzhapimi tucuchircanchic. Tucui ruhuanaca pichca chunga ishcai punzhapimi tucurirca.

ISAÍAS 44:28

Ñucami mandac Cirotaca: “Canmi ñuca ovejacunata michingui. Ñuca tucui imata ruhuachun nishcatami ruhuangui. Jerusalenta cutin allichi nicpi, ñuca huasitapish shayachi” nicpica, chashnami ruhuangui» ninimi.

HAGEO 1:1

Jatun mandac Darío ishcai huata, sucta quilla, shuc punzhata mandacucpimi, Mandac Diosca pai ima nishcata huillac Hageota Salatielpac churi Judá llactata mandac Zorobabelman, Josadacpac churi curacunata mandac Josueman huillachirca. Chashna huillachishpaca:

HAGEO 1:8

Urcumanta caspicunata apamushpa, ñuca huasita cutin shayachichic. Chashna ruhuacpimi, yallita cushicushpa, alli nishcapish casha. Chaitaca tucuita Mandac Dios ñucami nini.

ZACARÍAS 1:1

Jatun mandac Darío Persia llactata ishcai huata, pusac quillata mandacucpi, Mandac Dios Berequiaspac churi, Iddopac nieto Zacariasman huillashpaca:

ZACARÍAS 1:16

Chaimantami Mandac Dios ñucaca Jerusalentaca cutinllatac llaquichisha. Chaipimi ñuca huasitaca shayachinga. Jerusalenpimi plomadata churanga. Chaitaca tucuita Mandac Dios ñucami nini” ninmi.

ZACARÍAS 4:9

“Zorobabelmi ñucapac huasi callari rumitaca churarca. Paillatacmi tucuchinga. Chaita ricushpami, Mandac Diosllatac ñucataca cachashcata yachanguichic.

ZACARÍAS 8:9

Tucuita Mandac Diosca: «Ñucapac huasita shayachingapac callari rumita churashca punzhamanta pacha ñuca ima nishcata huillaccuna rimashcata uyaccuna sinchiyaichic.