DEUTERONOMIO 15:11 - Dios Rimashcata Quillcashcami

¹¹ Cai llactapica huacchacunaca mana illangachu. Chaimantami cancunapac llactapi imata mana chariccunataca maquita pascashpa ayudana canguichic.

DEUTERONOMIO 15:11 ပူးပေါင်းရင်းမြစ်များ

ÉXODO 23:11

Canchisniqui huatapica cambac llactamanta huacchacuna, sacha animalcuna micuchunmi saquina cangui. Chashnami uvas chagratapish, olivos yuracunatapish ruhuana cangui.

PROVERBIOS 19:17

Huacchacunaman imata cushpaca Mandac Diosmanmi mañachingui. Allita ruhuashcamantaca Diosmi allita cunga.

PROVERBIOS 22:2

Chayuc runapish, huaccha runapish chaipurallatami. Mandac Diosca ishcaitatacmi ruhuashca.

PROVERBIOS 31:20

Huacchacunamanpish, imata mana chariccunamanpish maquita chutashpami caran.

EZEQUIEL 18:7

Pitapish mana llaquichinchu, debimanta prendashcatapish cutichinmi. Mana shuhuanchu, yarcaihuan caccunamanpish caranmi, churana illaccunamanpish churachinmi.

SAN MATEO 26:11

Huacchacunaca punzhantami cancunahuan, ashtahuanpish ñucaca mana cancunahuanca causacushallachu.

SAN MATEO 5:42

Mañacmanca, cunguilla. Maijanpish imata mañacpica, ama misarishpa mañachinguichiclla.

MARCOS 14:7

Huacchacunaca punzhantami cancunahuan canga. Paicunaman allita ruhuasha nishpaca ruhuanguichicllami, ashtahuanpish ñucaca cancunahuanca mana causacushallachu.

SAN LUCAS 12:33

Imalla charishcata catushpa, huacchacunaman cuichic. Chashna ruhuashpaca, mana ismuclla cushtalpi huacaichic shinami, jahua pacha huiñai causaipi charicyanguichic. Chaipica shuhuacpish mana yaicunchu, polillapish mana micunchu.

SAN JUAN 12:8

Huacchacunaca punzhantami cancunahuan. Ashtahuanpish ñucaca mana cancunahuan causacushallachu— nirca.

HECHOS 2:45

Paicunapac allpatapish, ima charishcacunatapish catushpami, mana chariccunaman caishuc chaishucman cuc carca.

DEUTERONOMIO 15:7

Mandac Dios cancunaman cushca llactacunapi cancunapac huauqui imata minishticpica, ama misa canguichicchu, ama maquita huichcanguichicchu.

DEUTERONOMIO 15:8

Ashtahuanpish imata mañacpica, ama misashpa maquita pascashpa mañachinguichiclla.