APOCALIPSIS 3:17 - Dios Rimashcata Quillcashcami

¹⁷ Canca, ñucaca chayucmi cani, imapish mana illanchu, tucuipimi alli ricuni nicunguimi. Ashtahuanpish imatapish mana charic, lluchulla, ñahui mana ricuc, misa, pipish mana cuyashca cashcataca mana yachanguichu.

Nuevo Testamento en Quichua Cañar 1996

¹⁷ Shina cashpapish cancunaca ‘chayuccunami canchic, imapish mana illanchu, tucuipimi alli ricurinchic’ nishpami niricunguichic. Cancunaca imatapish mana charic, lluchulla, ñahui mana ricuc, misa, pipish mana c'uyashca cashcataca mana yachanguichicchu.

APOCALIPSIS 3:17 ပူးပေါင်းရင်းမြစ်များ

GÉNESIS 3:7

Shina micucpimi, ñahuica ishcaipacta pascarirca. Chaimantami lluchulla cashcata ricushpa, higo pangata sirashpa, jarcarinata ruhuarca.

ÉXODO 32:35

Aaronta ruhuashca curi becita alli nishcamantami Mandac Diosca israelcunata ungüihuan llaquichirca.

PROVERBIOS 13:7

Maijanpish chayucyasha nishpapish imata mana charinchu. Shinallatac maijanpish huaccha casha nishpaca achca charicmi tucuncuna.

PROVERBIOS 30:9

Pacta huicsa pactata micushpa, canta cungarishpaca: «¿Mandac Diosca pitacyari?» niman. Pacta huacchayashpa shuhuashpa, ñuca Diospac shutita mana alli niman.

ISAÍAS 42:19

¿Pi serviccunata yalli ñahui mana ricucca? ¿Pitac ñuca cachashcacunata atishpa ringri mana uyaccunaca? ¿Pitac ñuca acllashcacuna shina, Mandac Dios ñucata serviccuna shina mana ricuccunaca?

JEREMÍAS 2:31

¡Quipa huiñaicunalla, ñuca rimashcata alli uyaichic! Ñucaca israelcunapacca, ¿shitashca pamba shina, mana cashpaca pura tutapi cac llacta shinachu carcani? ¿Imamantatac ñuca acllashcacunaca: “Cunanca cacharishcami canchic, jaicapi cambacmanca mana cutishunchu” nincuna?

OSEAS 12:8

Chaimantami Efraín ailluca: «Ñucanchicca yallita japishpami yallita chayucyashcanchic. Pipish ñucanchictaca mana juchanchingachu. Ñucanchicca ima mana allita mana ruhuashcanchicchu» ninmi.

ZACARÍAS 11:5

Chai ovejacunata randiccunaca mana llaquishpami huañuchinga. Cutin catuccuna catushpaca: “Chayucyashcanimi, chaimanta Mandac Diosca alli nishca cachun” nicunmi. Michiccunapish mana llaquinchu.

SAN MATEO 5:3

«Juchayuc cashcamanta Diosta mashcaccuna, ¡cushicuichic! Jahua pacha Dios mandacucca cancunapacmi.

SAN MATEO 9:12

Chaita Jesús uyashpaca: —Mana ungushcacunaca jambictaca mana mashcanchu, ashtahuanpish ungushcacunallami jambictaca mashcan.

SAN LUCAS 1:53

Yarcaihuan caccunamanca, allicunatami achcata carashca. Chayuccunataca, chushac maquitami cachashca.

SAN LUCAS 6:24

¡Chayuccunalla, imachari tucunguichic! Cancunaca ñami charishcahuan cushicushcanguichic.

ROMANOS 11:20

Ari, chai israelcunaca mana crishcamantami, pitishca shina tucurcacuna. Ashtahuanpish canca crishcallamantami chai yurapi huiñashca cangui. Chaimanta ama canllatac “allimi cani” nirichu, ashtahuanpish Diosta manchai.

ROMANOS 11:25

Cuyashca criccuna, cancuna ama jatun tucuchunmi, Dios manarac piman yachachishcata yachachun munani. Tucui mana israelcuna cringacamanmi, maijan israelcunaca sinchi shungu tucunga.

ROMANOS 12:3

Dios ñucata cuyashcamantami, cancunataca ama yachac tucuichicchu, chaipac randica Dios crina yuyaita cushca shina, causachunmi ninimi.

ROMANOS 7:24

¡Aij, ñucalla! Ñuca cuerpopi tiyac munai huañuiman apacucmantaca, ¿pitac cacharichinga?

2 PEDRO 1:9

Ashtahuanpish caicunata mana charicca caruta ñahui mana ricuc shinami, ñaupa pai ruhuashca juchacunamanta chuyayachishcatapish cungarishca.

APOCALIPSIS 16:15

«Uyaichic, ñucaca cancuna mana yuyashca horaspimi shuhua shamuc shina shamusha. Maijanpish riccharishca, churanata churarishca chapacucmanca, ¡mai cushicuimi canga! Chashna churarishca mana lluchulla cashpami, mana pinganachinga»

APOCALIPSIS 2:9

Can ima shina llaquicunata apacushcatapish, can huaccha cashcatapish yachanimi. Shina cashpapish canca chayucmi cangui. Maijan: ‘Israelcunami canchic’ niccuna, canta mana alli nishpa, rimac cashcatapish yachanimi. Chaicunaca mana israelcunatacchu, ashtahuanpish Satanaspacta ruhuangapac tandanacuccunami.

APOCALIPSIS 3:16

Shina cacpipish rupacpish, chiripish mana cashcamanta ashtahuanpish cunuclla cacpimi shungu tigrasha.