AMÓS 8:8 - Dios Rimashcata Quillcashcami

⁸ Llaquichina punzhapica, ¿manachu allpaca chucchunga? Cai llactapi tucui causaccunaca, ¿manachu duelo churanata churarishpa llaquiringa? Cai pachaca, jatun yacu shinami miranga. Shina mirashpapish Egipto jatun yacu shinami ashalla tucunga.

AMÓS 8:8 ပူးပေါင်းရင်းမြစ်များ

SALMOS 18:7

Pai piñaricpica, cai pachaca mancharinatami chucchurca. Jatun urcu callari rumicunapish chucchurcami.

ISAÍAS 5:25

Mandac Diosca nina japiric shina piñarishpami pai acllashcacunata llaquichirca. Urcucunapish chucchungami. Huañushcacunaca imapish mapa shinami chaupi ñancunapi shitashca canga. Chashna ruhuashpapish pai yallita piñarishcataca mana pasachingachu. Ashtahuanpish llaquichingatacmi.

JEREMÍAS 12:4

¿Ima punzhacamantac ñucanchic allpaca quihuacunapish mana huiñashca shitashca pamba shina canga? Cai llactapi causaccuna mana allita ruhuashcamantami pambata puric animalcunapish, volac animalcunapish huañushpa tucurirca. Paicunaca: «Diosca ñucanchictaca mana tucuchingachu» nishpami, mana allita ruhuarca.

JEREMÍAS 46:7

¿Pitac jatun Nilo yacu shina huacyashpa shamucun?

JEREMÍAS 46:8

Egipto llacta gentecunaca jatun Nilo yacu shinami miramun. Paicunaca: “Huichai rishpa, tucui llactata tapashpami, llactapi causaccunatapish tucuchishun” nincuna.

JEREMÍAS 51:29

Mandac Diosca Babilonia llactata tucuchishpa pipish mana causana shitashca pambata ruhuangapac yuyarishcataca pactachigrinmi. Chaimantami cai pachaca cuyurishpa chucchunga.

DANIEL 9:26

Sucta chunga semana quipa Dios cachashca quishpichicta huañuchicpica, imata mana charic saquiringachu. Shuctac jatun mandacpac gentecuna shamushpami, Jerusalentapish, Diospaclla chicanyachishca ucutapish tucui tucuchinga. Yacu jundashpa shamuc shinami tucuchinga. Jatun macanacuita tucuchingacaman llaquichinami tiyacunga.

OSEAS 10:5

Samariapi causaccunaca Bet-avenpi tiyac beci dioscunatami manchanga. Chaipi causaccunapish duelo churanatami churaringa. Chai beci diosta sumaimanami cangui nic curacunapish chai dioscunata apacpi, yallitami huacanga.

OSEAS 4:3

Chaimantami cai llactaca duelo churanata churarishca shina llaquilla canga. Cai llactapica tucuimi huañunga. Sacha animalcunapish volac animalcunapish, mama cuchapi causac challuacunapish huañungami.

AMÓS 8:10

Cancunapac cushicuna fiesta punzhacunataca, llaqui punzhacunatami ruhuasha. Tucui cancunapac cantocunataca huañuipi cantanatami ruhuasha. Sharpa churanatami churachisha. Chashnami llaquirishpa, acchata pitinga. Chaipica, shuclla churi huañushcamanta shinami huacanga. Tucurina punzhaca yalli llaqui punzhacunami canga.

AMÓS 9:5

Tucuita Mandac Dios cai pachapi tuparicpica, cai pachaca yacuyangami. Cai pachapi causaccunaca llaquirishpami huacanga. Cai pachaca jatun yacu shina miraricpica, Egipto jatun yacu shinami ashalla tucunga.

NAHÚM 1:8

Ashtahuanpish paita mana ricusha niccunataca jatun yacu tucuchic shinami tucuchin. Paita piñaccunataca pura tutami catishpa tucuchinga.

SAN MATEO 24:30

Chashna tucucpimi, Runa Tucungapac shamushca ñuca cutimucuc señalca jahua cielopi ricuringa. Chaita ricushpami, tucui cai pachapi causaccunaca mancharishpa huacanga. Runa Tucungapac shamushca ñucataca poderhuan, sumaimanata achicyachishpa puyupi shamucucta ricunga.