AMÓS 3:10 - Dios Rimashcata Quillcashcami

¹⁰ Mandac Diosca: «Paicunaca imatapish mana allita ruhuanata yachanchu. Macashpa quichushcallatami, paicunapac mandashpa tiyana huasicunapi jundachin.

AMÓS 3:10 ပူးပေါင်းရင်းမြစ်များ

JOB 20:21

Pai mana micushcaca imapish mana tiyarcachu. Chaimantami pai imalla charishcacunaca mana unaicaman canga.

SALMOS 14:4

Mandac Diosta mana mañac, millai gentecunaca, ima allitaca mana entendincunachu Ñuca acllashcacunataca tandata micuc shinami tucuchincuna.

PROVERBIOS 1:13

Tucuilaya charishcacunatami japishun. Tucui chaicunata quichushpami, ñucanchic huasicunapi jundachishun.

PROVERBIOS 11:16

Alli shungu huarmica alli nishcami canga. Ashtahuanpish utca imatapish ruhuacca charicyangami.

PROVERBIOS 28:5

Millai runacunaca allita ruhuanataca mana entendincunachu. Ashtahuanpish Mandac Diosta mashcaccunaca tucuitami entendin.

ECLESIASTÉS 4:1

Tigrarishpa ricushpaca cai pachapi tucuita ruhuashpa, yallita llaquichicuctami ricurcani. Llaquihuan huacacucpipish pi mana cushichircachu. Poderta chariccunapish llaquichiccuna parte carca. Cushichiccunaca shucllapish mana tiyarcachu.

JEREMÍAS 4:22

Ñuca acllashcacunaca ñucata mana ricsic yuyai illaccunami. Ñuca huahuacunaca imatapish mana yachac, imatapish mana entendiccunami. Millaita ruhuanataca allita yachancunami. Ashtahuanpish allita ruhuanataca mana yachancunachu.

JEREMÍAS 5:4

Ñucaca: «Mandac Dios mandashcatapish, pai munashca shina causanatapish mana yachashcamantami, imatapish mana yachashpa, yuyai illac tucushca.

EZEQUIEL 18:7

Pitapish mana llaquichinchu, debimanta prendashcatapish cutichinmi. Mana shuhuanchu, yarcaihuan caccunamanpish caranmi, churana illaccunamanpish churachinmi.

EZEQUIEL 22:29

Cai pueblopi causaccunaca llaquichina, shuhuana, llullana yuyaillahuanmi causancuna. Llaquilla causaccunatapish, huacchacunatapish, shuctac llacta runacunatapish yallitami llaquichin.

EZEQUIEL 8:17

Chaimantami ñucataca: «Huañunalla runa, ¿manachu caitaca ricungui? ¿Judá llactapi causaccuna yalli millaita ruhuashcaca ashallachu? Paicunaca millaita ruhuashpami, cai llactapi yalli piñanacuita churashpa, ñucataca ashtahuan piñachin. Paicunapac singapipish ramacunatami churarin.

OSEAS 7:1

Israelcunata ñuca jambicpica, Efraín aillupac mana allita ruhuashcapish, Samaria llactapi causaccuna millaita ruhuashcapish ricurinmi. Paicunaca llullaccunami, huasiman yaicushpapish, ñanta pasaccunatapish macashpa shuhuashpami causan.

AMÓS 4:1

Mandac Diosca: «Basán llacta huirayashca vacacuna shina Samariapi causac huarmicunalla, caita alli uyaichic. Cancunaca huacchacunata, imata mana chariccunata sarushpami llaquichinguichic. Cutin cancunapac cusacunataca: “¡Vinota apamushpa machashunchic!” ninguichicmi» ninmi.

AMÓS 5:7

¡Cancunaca cashcata ruhuanataca jayac ajenjota shina ruhuashpami, imapacpish mana valichinguichic!

AMÓS 6:12

¿Caballocunaca rumi quingraita callpanchu? ¿Mama cuchata yuntahuan yapunchu? ¡Cancunaca allita ruhuashpa causanataca venenota shinami ruhuashcanguichic! ¡Cashcata ruhuashpa causanataca jayac ajenjota shinami ruhuashcanguichic!

AMÓS 6:3

Cancunaca “Llaqui punzhaca mana shamungachu” yuyarircanguichicmi. Shina cashpapish, llaqui punzhamanmi cuchuyacunguichic.

AMÓS 6:8

Tucuita ruhuac, tucuita Mandac Dios paipac shutipi ari nishpaca: «Jacobopac jatun tucushca huahua huahuacunataca mana ricunayachinichu. Mandashpa tiyana huasicunatapish millanayanmi. Chaimantami chai llactataca chaipi tucui tiyaccunandi, paicunata piñaccunapac maquipi churasha» ninmi.

MIQUEAS 6:10

Paica: «Ñucata mana manchac runapac huasipica, ¿shuhuashcacuna tiyangaracchu? ¿Ñuca millana, mana alli medinacuna tiyangaracchu?

SOFONÍAS 1:9

Chai punzhallatacmi pungu jahuata saltashpa pasaccunatapish, paicunapac amocunapac huasicunapi shuhuashpa jundachiccunatapish, umaccunatapish llaquichisha» ninmi.

2 PEDRO 3:5

Chai gentecunaca Dios rimashpalla jahua pachatapish, cai pachatapish ñaupamanta pacha ña ruhuashcata, shinallatac allpatapish yacumanta chicanyachishpa, yacu chaupipi charicushcataca mana entendishun nincunachu.