2 TESALONICENSES 1:7 - Dios Rimashcata Quillcashcami

⁷ Cutin cancuna llaquita apacuccunataca ñucanchicta samachic shinallatac samachingapacmi Apunchic Jesusca paipac poderyuc angelcunahuan jahua pachamanta nina culun nicuc chaupita shamunga.

Nuevo Testamento en Quichua Cañar 1996

⁷ Shinallatac cancuna llaquita apacuccunatapish, ñucanchicta samachic shinallatac samachingami. Chashnaca, Apunchic Jesús paipac imatapish ruhuaclla angelcunahuan jahua pachamanta shamushpami samachinga.

2 TESALONICENSES 1:7 ပူးပေါင်းရင်းမြစ်များ

ÉXODO 19:18

Mandac Dios nina chaupita urcuman urai shamushcamantami chai urcuca hornota cushni tapashca shina carca. Tucui chai urcumi yallita chucchucurca.

ÉXODO 3:2

Chaipimi Mandac Diospac angelca rupacuc zarza yura chaupipi ricurirca. Moisesca zarza yura tucui nina tapashca cashpapish mana rupactami ricurca.

ISAÍAS 57:2

Chaica pai huañushpaca cushilla causangapacmi rin. Diospac ñaupapi alli causacca tucuimi samaringa.

ISAÍAS 66:15

Mandac Diosca yallita piñarishpa, ninahuan jarcashpa yallita llaquichingapacmi rupacuc nina chaupipi, jatun acapana huaira shina, callpac carretacunahuan shamunga.

EZEQUIEL 1:13

Causaita chariccunaca carboncuna jagan nicuc shinami carca. Paicunapac chaupipica mechacuna rupacuc shinami, caiman chaiman cuyuricurca. Chai ninaca yallitami achicyachicurca, shinallatac relampa jagan nicucmi llucshicurca.

DANIEL 7:9

Chashna ricucucllapitacmi mandaccuna tiyarinata churashpa, shuc yuyac runata tiyachirca. Chai runaca rasu shina yuranlla churanata churashca, acchaca chuya oveja millma shina yuranllami carca. Chai mandashpa tiyarinapish, chai tiyarinapac ruedacunapish rupacuc shinami carca.

SAN MATEO 16:27

Ashtahuanpish Runa Tucungapac shamushca ñucaca, ñuca Taitapac sumaimana achic nicuc-huan, paipac angelcunahuan cutimushpaca, tucuimanmi imata ruhuashca shina cusha.

SAN MATEO 16:28

Runa Tucungapac shamushca ñuca mandacucta ricungacamanmi, maijan caipi caccunaca manarac huañunguichic. Chaica chashnatacmi canga— nirca.

SAN MATEO 25:31

Runa Tucungapac shamushca ñuca sumaimana achic nicuc-huan achicyachishpa, tucui angelcunahuan shamushpaca, jatun mandac tiyarinapimi tiyarisha.

SAN MATEO 25:41

Lluqui maquiman caccunataca: “Millaicuna, caimanta anchurichic. Diabloman, paita servic angelcunaman allichishca, mana huañuc ninapimi shitashca canguichic.

SAN MATEO 26:64

Shina nicpimi Jesusca: —Ari, canllatac nishcanguimi. Ashtahuanpish ñucaca: Cunanmanta pachami Runa Tucungapac shamushca ñucataca, poderyuc Diospac alli maquiman tiyacucta ricunguichic. Shinallatac jahua pachamanta puyupi shamucuctapishmi ricunguichic ninimi— nirca.

MARCOS 14:62

Chashna tapucpimi Jesusca: —Ari, ñucami cani. Runa Tucungapac shamushca ñucataca, poderyuc Diospac alli maquiman tiyacuctapish, puyupi jahua pachamanta shamucuctapishmi ricunguichic— nirca.

MARCOS 8:38

Maijanpish cai pachapi Diosta mana cazuc, juchayuc gentecunapac ñaupapi ñucamanta, ñuca huillashcacunamanta huillanata pingacpica, Runa Tucungapac shamushca ñucapish ñuca Taitapac poderhuan, paipac sumac jucha illac angelcunahuan achicyachishpa cutimushpa pingashami— nirca.

SAN LUCAS 16:25

Chashna caparicpimi Abrahamca: “Huahua, can causacushpa allita causashcata yuyari. Ashtahuanpish Lazaroca llaquitami causarca. Cunanca caipica cushicushpami tiyacun.

SAN LUCAS 17:30

Chashnallatacmi Runa Tucungapac shamushca cutimuna punzhapipish canga.

SAN JUAN 1:3

Paillahuantacmi Diosca tucuita ruhuarca. Mana paihuan ruhuashcaca imatapish mana tiyanchu.

SAN JUAN 1:51

Shinallatac Jesusca: —Jahua pacha pascarictapish, Diospac angelcuna Runa Tucungapac shamushca ñucapac jahuata huichicucta, uricuctami ricunguichic. Chaica chashnatacmi canga— nirca.

HECHOS 1:11

Chashna ricurishpaca: —Galilea llacta runacuna, ¿ima nishpatac huichailla ricucunguichic? Cai cancunapacmanta jahua pachaman pushashca Jesusllatacmi, cutin shamunga. Ima shinami pai ricta ricurcanguichic, chashnallatacmi cutimunga— nirca.

HECHOS 3:19

Cancunapac juchacunata perdonachunca, llaquirishpa, Diosman cutirichic. Chashna ruhuacpimi, Diosca cushi causaita cushpa samachinga.

ROMANOS 8:17

Paipac huahuacuna cashpaca, pai cusha nishcatapish Cristohuan pacta japishunmi. Apunchic Jesucristo llaquita apashca shina llaquita apashpami, alli nishca cashun.

1 CORINTIOS 3:13

Shina cacpipish quiquin imahuan ruhuashcaca, taripai punzhapimi ricuringa. Chaipi Dios ninahuan rupachishpa ricucpimi quiquin imalaya ruhuashcaca yacharinga.

2 CORINTIOS 4:17

Cai causaipi ashacamanlla llaquita apacushcaca tucuringami. Shina cashpapish, llaquicunaca tucuimanta yalli huiñai causaiyuctami ruhuacun.

EFESIOS 1:2

ñucanchic Diospish, Apunchic Jesucristopish cancunataca mai cuyashpa, sumac causaita cushca cachun nini.

COLOSENSES 1:16

Diosca paihuanmi jahua pachapi tiyac imacunatapish, cai pachapi tiyac imacunatapish, ricuipaccunatapish, mana ricuipaccunatapish, poderta charic mandac espiritucunatapish ruhuarca. Tucuitami paihuan ruhuashpa, paipaclla cachun ruhuarca.

1 TESALONICENSES 3:13

Shinallatac Dios cancunata sinchi cricta ruhuachunmi munanchic. Chashna cashpami, Apunchic Jesús paipaclla caccunahuan shamucpica, ñucanchic Diospac ñaupapica pi mana juchanchipac jucha illac cashun.

2 TIMOTEO 2:12

Llaquicunata apashpaca, paihuanmi mandashun. Pingashpa ‘mana paipacchu cani’ nicpica, paipish ‘mana ñucapacchu cangui’ ningami.

TITO 2:13

shinallatac ñucanchicta Mandac Dios Quishpichic Jesucristo sumaimana cashcahuan, cutimuna cushicui punzha pactana cashcata shuyanata yachachicun.

HEBREOS 10:27

Ashtahuanpish manchana taripana punzha, rupachishpa chingachic ninallami shuyacun. Chai ninaca Diosta mana cazuccunatami tucuchinga.

HEBREOS 12:29

Chaica, ñucanchic Diosca tucuita rupachic nina llama shinami.

HEBREOS 4:1

Chaimanta samarinapi Dios yaicuchisha nicucpirac huacaichiringuichic. Pacta cancunapuramanta maijan mana yaicui pudishpa saquiringuichicman.

HEBREOS 4:11

Chai ñaupa mana cazuccuna shina maijanpish ama chashna tucungapacca, mana saquirishpami chai samarinaman yaicungapac catirana canchic.

HEBREOS 4:9

Chaimantami Diospac huahuacunamanca shuc samarina tiyanrac.

HEBREOS 9:28

Apunchic Jesusca achca gentecunapac juchacunata pichangapacmi, shuc cutinlla pai quiquinllatac huañurca. Quipataca ña mana juchacunata anchuchingapacchu shamunga, ashtahuanpish paita shuyacuccunata quishpichingapacmi shamunga.

1 PEDRO 3:22

Jesucristomi jahua pachaman rishpa, Diospac alli maquiman tiyacun. Paimi angelcunatapish, poderta charic mandac espiritucunatapish mandacun.

2 PEDRO 3:7

Shina cashpapish jahua pachapi, cai pachapi cunan ima tiyashcacunataca, chai rimashcallahuantacmi ninahuan tucuchingapac Diosca huacaichishpa charicun. Chai ninaca Dios taripashpa millaicunata llaquichina punzhapimi, rupachishpa tucuchinga.

SAN JUDAS 1:7

Chashnallatacmi Sodoma pueblopi, Gomorra pueblopi shinallatac chai cuchulla pueblocunapi causaccunapish huacllirishpa, caricunapura, huarmicunapura chayarinacushpa, millaillapi causarcacuna. Chaimantami huiñaita rupacuc ninapi llaquita aparcacuna. Cunan punzha causaccuna ricushpa yuyarichunmi, chashnaca tucurca.

APOCALIPSIS 1:7

¡Uyaichic, Cristoca puyupimi shamucun! Paitaca tucuimi ricunga. Paita chacatashpa huañuchiccunapish ricungami. Tucui cai pachapi causac gentecunapish ricushpaca, shungupi huactarishpami paimanta huacangacuna. ¡Chaica chashnatacmi canga! Chashna cachun.

APOCALIPSIS 14:10

Diosmanta shamuc jatun llaquitami imahuan mana chagrushca vinota vasopi tallishpa ubiac shina Diospac piñaitaca chasquinga. Chaicunaca Pactalla Ovejapac ñaupapi, shinallatac Diospaclla cac angelcunapac ñaupapimi ninahuanpish, azufrehuanpish llaquichishca canga.

APOCALIPSIS 14:13

Cutin jahua pachamanta shuc rimashca uyarishpaca: «Caita quillcai: Caimanta quipaman Apunchic Jesus-huan shuclla tucushpa huañuccunamanca, ¡mai cushicuimi canga! Diospac Espiritupish: Ari, chashnami can. Paicuna ima ruhuacushcamantaca samaringacunami. Paicuna ima ruhuashcapish paicunahuanmi canga» nishcatami uyarcani.

APOCALIPSIS 20:11

Chai quipaca shuc jatun yuranlla mandashpa tiyarinapi shuc tiyacuctami ricurcani. Paipac ñaupamantaca cai pachapish, jahua pachapish tucui chingarishpami maipi mana ricurirca.

APOCALIPSIS 21:4

Paica tucui huiquitami ñahuicunamantaca pichanga. Huañuipish, llaquilla canapish, huacaicunapish, nanaicunapish ña mana tiyangachu. Ñaupaman ima tiyashcapish cunanca ña mana tiyangachu» nirca.

APOCALIPSIS 22:16

Shinallatac Jesusca: —Ñucaca Jesusmi cani. Ñucami tucui tandanacushca criccunaman huillachun ñuca angelta cacharcani. Ñucami yura retoñac shina, Davidpac aillupuramanta shamushcaca cani. Ñucaca tutamanta llucshic jagan nicuc lucero shinami cani— nirca.

APOCALIPSIS 22:6

Chai quipaca chai angelca: —Cai ñuca rimashcacuna chashnatac cashcamanta shunguta churanallami. Diosmanta huillaccunaman yuyaita cuc Mandac Diosllatacmi, angelta ñalla ima tucuna cashcata paipacta ruhuaccunaman ricuchichun cacharca— nirca.

APOCALIPSIS 22:9

Shina ruhuagricpimi paica: —Ama chashna ruhuaichu. Ñucapish can shinallatac Diosmanta ñaupa huillaccuna shina, tucui cai libropi quillcachishcata cazuccuna shina, Diospacta ruhuacllami cani. Diostami alli nina cangui— nirca.

APOCALIPSIS 6:11

Chashna nicpimi paicunaman yuranlla churanata cushpaca: «Cancuna shinallatac Jesucristopacta ruhuaccuna cashcamanta mashnacuna huañuna cashca pactangacaman, ashata samaricuichiclla» nictami uyarcani.