2 SAMUEL 18:17 - Dios Rimashcata Quillcashcami

¹⁷ Chai quipaca, Absalonpac cuerpota japishpami, chai sachapi tiyac jutcupi shitashpa, chai jahuapica jatun rumi montonta ruhuarca. Chai quipaca, israelcunaca tucuimi quiquin carpa huasicunaman miticushpa callparca.

2 SAMUEL 18:17 ပူးပေါင်းရင်းမြစ်များ

2 SAMUEL 19:5

Chashna cacpimi, Joabca jatun mandacpac huasiman yaicushpaca: «Cunanca, cantapish, cambac huarmicunatapish, churicunatapish, ushicunatapish, caishuc huarmicunatapish quishpichic canta serviccunatami pingaichishcangui.

2 SAMUEL 19:8

Shina nicpimi, jatun mandacca jatarishpa, pueblo yaicunaman rishpa tiyarirca. Chaipi tiyarishpaca: «Riqui, cai pueblo yaicunapimi jatun mandacca tiyacun» nirca. Shina nicpimi, tucui gentecuna jatun mandacpac ñaupaman shamurca. Ashtahuanpish israelcunaca paicunapac quiquin carpa huasicunamanmi miticushpa rishca carca.

2 SAMUEL 19:9

Shinallatac tucui israelpurapimi: «Jatun mandacca ñucanchicta piñaccunapac, filisteocunapac maquimanta quishpichirca. Cunanca, Absalonta manchashpami miticushpa rishca.

2 SAMUEL 20:1

Benjaminpac aillupuramanta Bicripac churi millaita ruhuac Sebami chaipi carca. Pai cornetapi tocashpa rimarishpaca: «¡Ñucanchicca Isaipac churi Davidmantaca ima ricunata, ima japinata mana charinchicchu! ¡Israelcuna cancunapac huasicunaman richiclla!» nirca.

2 SAMUEL 20:22

Chai huarmica yuyaisapa cashpami tucui genteta ari nichishpa, Bicripac churi Sebapac umata pitishpa, Joabpac ñaupapi shitarca. Chaita ricushpa Joab cornetapi tocacpimi, tucui gentecuna quiquin huasicunaman cutirca. Cutin Joabca Jerusalenmanmi jatun mandacpacman cutirca.

2 REYES 14:12

Judá gentecunaca israelcuna aticpimi, paicunapac quiquin carpa huasicunaman miticushpa callparca.

2 REYES 8:21

Joramca tucui carretacunahuan Zaír puebloman rishpami, tuta jatarishpa paipish, paipac carretacunata mandaccunapish muyushpa tiyacuc edomitacunata macangapac japirca. Chashna japicpimi, paicunaca carpa huasicunaman callparca.

PROVERBIOS 10:7

Cashcata ruhuac runapac shutica yuyarishcami canga, ashtahuanpish Diosta mana manchaccunapac shutica ismuc shinami chingaringa.

DEUTERONOMIO 21:20

Chashna apashpami, chai llactata pushac yuyaccunamanca: “Cai ñucanchic churica mana cazuc, sinchi shungumi. Ñucanchic nishcatapish mana cazushpami, paipac munashcata ruhuashcata ruhuashpa, machashpa purin” nishpa huillanga.

DEUTERONOMIO 21:21

Chashna huillacpimi, chai llactapi tucui causaccuna rumihuan shitashpa huañuchinga. Chashnami cancunapac chaupimanta juchata anchuchinguichic. Chaita tucui israelcuna uyashpaca manchangami.

JOSUÉ 10:27

Ña inti tigracucpimi, Josueca chai huañushcacunataca yuramanta uricuchishpa paicuna miticushca jutcullapitac shitachun mandarca. Chaipi shitashpami chai jutcu pungutaca jatun rumicunahuan taparca. Chai rumicunaca cunan punzhacamanmi tiyacun.

JOSUÉ 7:26

Chashna paita rupachishca jahuapica rumicunatami montonarca. Chai montonca cunancamanmi tiyan. Chashna rupachicpimi, Mandac Diosca pai nina japiric shina piñarishcataca pasachirca. Chaimantami chai pugru pambataca cunan punzhacaman Acor pamba nincuna.

JOSUÉ 8:29

Cutin Hai pueblota jatun mandactaca tutayangacamanmi jatun yurapi huarcushpa saquirca. Ña tutayacpimi, Josueca chai huañushcata yuramanta uricuchishpa, Hai pueblo yaicunapi shitashpa, chai jahuapica rumicunata montonachun mandarca. Cunancamanmi chai montonca tiyan.

1 SAMUEL 4:10

Filisteocunaca sinchita macanacushpami, israelcunataca atirca. Shina aticpimi, paicunapac quiquin carpa huasicunaman miticushpa callparca. Chaipi yallita huañuchicpimi, chaquillahuan ric israelcunaca quimsa chunga huaranga soldadocuna huañurca.