2 REYES 7:9 - Dios Rimashcata Quillcashcami

⁹ Cutin quipata caishuc chaishuc parlanacushpaca: —Ñucanchicca mana allitachu ruhuacunchic. Cunanca cai alli huillaita huillana punzhami. Shina cacpipish, mana huillashpami upalla canchic. Caya pacaringacaman mana huillashpaca, ñucanchicmi juchanchishca cashun. Shina cashcamanta cunanllata jatun mandacpac huasiman rishpa, cai alli huillaita huillagrishun— nircacuna.

2 REYES 7:9 ပူးပေါင်းရင်းမြစ်များ

2 REYES 5:4

Shina nicpi, Naamán paipac amopacman rishpaca: «Israel llactamanta shuc solteraca cashna chashnami» nishca nirca.

2 REYES 7:10

Chaimantami paicunaca Samaria pueblo yaicunapi cuidac soldadocunapacman rishpaca: «Ñucanchicmi siriocunapac carpacuna shayachishca pambaman rircanchic. Chaipica pipish mana ricurircachu. Maijan parlashcallapish mana uyarircachu, ashtahuanpish caballocuna, burrocunallami huatashca shayacurca. Carpacunapish ima shina shayachishca shinallatacmi carca» nircacuna.

2 REYES 7:3

Samaria pueblo yaicunapimi lepra ungüi japishca chuscu runacuna tiyarca. Paicunami caishuc chaishuc parlanacushpaca: —¿Ima nishpatac caipica huañuita shuyashpa tiyacunchic?

2 REYES 7:6

Mandac Diosca siriocunapac carpacuna shayachishca pambapica macanacuna carretacuna, caballocuna, shinallatac achca soldadocuna bullashpa uyarishca cachunmi ruhuashca carca. Chaita uyashpami, paicunaca caishuc chaishuc parlanacushpaca: «Israel llactata mandacmi ñucanchicta llaquichichun heteocunata, Egipto runacunata jatun mandaccunata cayashca canga» nircacuna.

2 REYES 7:8

Lepra ungüihuan cac runacuna carpa huasicuna shayachishca pambaman chayashpaca, shuc carpaman yaicushpami micushpa, ubiashpa carcacuna. Shinallatac cullquitapish, curitapish, churanacunatapish japishpami pacangapac rircacuna. Chaimanta cutin cutishpaca, shuc carpaman yaicushpami chai carpamantapish apashpa pacarcacuna.

PROVERBIOS 24:16

Chaica, cashcata ruhuac runaca canchis cutin urmashpapish jataringallami. Ashtahuanpish Diosta mana manchaccunaca jatun llaquipimi urmanga.

ISAÍAS 41:27

Ñucami Sionpi causaccunamanca punzhanta caicunata huillacurcani. Ñucallatacmi cai Jerusalenpi causaccunaman cushicunata huillachun shuc huillacta cachasha.

ISAÍAS 52:7

¡Cushichic alli huillaita huillangapac jahua urcuta callpashpa shamuc runaca sumacmari! Chai runaca cushi causaimantapish, quishpirinamantapish, imapish allicunallatami huillan. Sionpi causaccunamanpish: «¡Cancunapac Diosmi mandagrin!» nishpami huillan.

NAHÚM 1:15

¡Riquichic, sumac causaimanta alli huillaita huillacmi, jahua urcucunata shamucun! ¡Judá llactalla, canca fiestacunata ruhuailla. Can imatapish Diosman cusha nishcataca cuilla. Millaita ruhuaccunaca mana ashtahuan llaquichingachu, chaica ñami tucui chingarirca!

NÚMEROS 32:23

Cancuna mana chashna ruhuashpaca, Mandac Diospac ñaupapimi juchayuc tucunguichic. Chai juchata cancuna ruhuashcamanta ima horaspish jatun llaquitami apanguichic.

SAN LUCAS 2:10

Chaimantami angelca: —Ama mancharichicchu. Cancunaman alli huillaita huillangapacmi shamuni. Caita uyashpaca, tucuimi yallita cushicunga.

FILIPENSES 2:4

Maijanpish quiquinlla alli canataca ama yuyaichicchu, ashtahuanpish shuccuna alli cachun munaichic.