2 REYES 6:17 - Dios Rimashcata Quillcashcami

¹⁷ Chaimanta Eliseo Diosta mañashpaca: «Mandac Dioslla, pai ricuchun paipac ñahuita pascaiyari» nishpa mañarca. Chashna mañacpimi, Mandac Diosca chai servicpac ñahuita pascarca. Chashna pascacpimi, paica Eliseopac muyundipi caballocunapi ric gentecuna nina japirishca carretacuna chai loma junda shayacucta ricurca.

2 REYES 6:17 ပူးပေါင်းရင်းမြစ်များ

GÉNESIS 21:19

Chai quipami, Diosca Agarpac ñahuipi shuc yacu junduta ricuchirca. Chaita ricushpami, purupi yacuta jundachishpa, huahuaman ubiachirca.

GÉNESIS 32:1

Jacobo paipac llactaman cuticucpica, Diospac angelcunami tupangapac llucshirca.

GÉNESIS 32:2

Chaita ricushpami Jacoboca: —¡Caica Diospac campamentomi!— nirca. Chaimantami chai pambataca Mahanaimta shutichirca.

GÉNESIS 32:3

Chai quipami Jacoboca huillaccunata Edom llactapi cac Seir pambapi causac paipac huauqui Esaupacman cacharca.

2 REYES 2:11

Paicuna chashna parlanacushpa ricucllapitacmi, nina japiricuc caballocunaca nina japiricuc carretacunata aisashca shamushpa, paicunata chicanyachirca. Shina chicanyachicpimi, Eliasca acapana huairapi huichai rirca.

SALMOS 104:3

Can causana huasitaca yacucuna jahuapimi churashcangui. Puyupimi carretapi shina puringui. Huaira jahuatami puringui.

SALMOS 104:4

Huairataca canmanta huillachun, culun nicuc ninataca canta servichunmi ruhuangui.

SALMOS 119:18

Cambac sumaimana mandashcata ricungapac ñuca ñahuita pascaiyari.

SALMOS 125:2

Jerusalén puebloca, muyunditami urcucunata charin. Chashnallatacmi Mandac Diospish pai acllashcacunapac muyundita cuidacun.

SALMOS 34:7

Mandac Diosta manchaccunataca paipac angelmi muyundita cuidashpa charicun.

SALMOS 68:17

Diospac macanacuna carretacunaca huaranga huarangami. Chaicunahuanmi Sinaí urcumantaca huasiman shamurca.

SALMOS 91:11

Paipac angelcunatami can mai ñanta ricpipish, cuidachun cachanga.

SALMOS 91:15

Pai ñucata mañacpica, ñucaca uyashami. Pai yallita llaquihuan cacpica, ñucaca paihuanmi casha. Paita quishpichishpami alli nishca cachun ruhuasha.

ISAÍAS 42:7

ñahui mana ricuccunapac ñahuita pascachun, prezumanta cacharichichun, amsapi caccacunata llucchichunmi churasha.

DANIEL 10:7

Chaitaca, Daniel ñucallami muscuipi shina ricurcani. Ashtahuanpish ñucahuan cac runacunaca mana ricurcachu. Shina cashpapish paicunaca yallita manchai japicpimi, miticushpa callparca.

ZACARÍAS 1:8

Tutami shuc runa puca caballopi montashca pugru pambapi tiyac arrayán yuracuna chaupipi shayacucta ricurcani. Chai montashcapac huashapica puca, bayu, yurac caballocunami shayacurca.

NÚMEROS 22:31

Mandac Dios Balaamta ñahuita pascac shina ruhuacpimi, Balaamca Mandac Diospac ángel espadata maquipi apashpa, ñanpi shayacucta ricurca. Shina ricushpami Balaamca paipac ñaupapi pambaman cumurirca.

SAN MATEO 26:53

Ñuca Taitaman huaranga huaranga angelcunata ñucata cuidachun mañacpica, cunanllatacmi cachanman. Chaitaca, ¿manachu yachangui?

HECHOS 26:18

Chaica, amsapi causaccuna ñahuita pascac shina achicman llucshichun, Satanás mandashca causaccuna, Dios mandashca causachunmi huillana cangui. Ñucata crishcamantami Diosca paicunapac juchacunata perdonanga. Paicunaca Dios paipaclla cachun acllashcacunaman cusha nishcatami chasquinga” nircami.

EFESIOS 1:18

Cancuna pai cayacpi imata shuyana cashcata yachachun, shinallatac paipaclla caccunaman Dios cusha nishcaca sumac cashcata yachachunmi, alli yuyaita cuchun nishpa mañani.

HEBREOS 1:14

Angelcunaca Diospacta ruhuachun churashca espiritucunallami, shinallatac Dios quipata quishpichishcacunata ayudachun cachashcacunallami.

APOCALIPSIS 19:11

Chai quipaca jahua pacha pascaricpi, shuc yurac caballopi montashpa tiyacuctami ricurcani. Chai tiyacucpac shutica Mana Llullac, shinallatac Imatapish Pactachicmi carca. Paica cashcata ruhuashpa, taripac shinallatac macanacucmi carca.

APOCALIPSIS 19:14

Jahua pacha soldadocunaca, chuyanlla yalli valishca yuranlla lino churanata churashcami yurac caballopi tiyarishpa paitaca catircacuna.

APOCALIPSIS 3:7

Filadelfia pueblopi cac tandanacushca criccunata ricuc angelman quillcai: “Mandac Davidpac llaveta charicuc, pi mana pascaipacta huichcac, pi mana huichcaipacta pascac, cashcata ruhuac jucha illacca: